ޚާރިޖީ ވަޒީރު، އިންޑިއާގެ އައު ސަފީރު، ޖީ. ބަލަސުބްރަމަނިއަމާ ބައްދަލުކުރައްވައިފި

އިންޑިއާއިން ދިވެހިރާއްޖެއަށް ކަނޑައަޅުއްވާފައިވާ އައު ސަފީރު ޖ. ބަލަސުބްރަމަނިއަމް، ރާއްޖޭގެ ޚާރިޖީ ވަޒީރު، ޑރ. ޢަބްދުﷲ ޙަލީލުގެ އަރިހަށް އިޚްތިރާމްގެ ޒިޔާރަތެއް ކުރައްވައިފިއެވެ. 

ޚާރިޖީ ވުޒާރާގައި މި ދެ ބޭފުޅުންގެ ބައްދަލުވުމެއް ބާއްވާފައިވާއިރު، މި ބައްދަލުވުމުގައި އިންޑިއާއިން ކަނޑައެޅުއްވި އައު ސަފީރަށް، ވަޒީރު މަރުހަބާ ވިދާޅުވެފައިވެއެވެ. ދެ ޤައުމުގެ ދެމެދުގައި އޮތް ގާތް ގުޅުމަށް މިހާރު އައިސްފައިވާ ކުރިއެރުން ދަމަހައްޓައި އިތުރަށް ބަދަހި ކުރެވިދާނެ ގޮތްތަކާ ގުޅޭގޮތުން ވެސް، މި ބައްދަލުވުމުގައި މަޝްވަރާކުރެއްވިއެވެ.

މި ބައްދަލުވުމުގައި، އިންޑިއާ ސަރުކާރުގެ ފަަރާތުން ރާއްޖެއަށް ފޯރުކޮށްދެއްވާފައިވާ އެހީތެރިކަމަށް ޓަކައި ދިވެހި ރައްޔިތުންނާއި ދިވެހި ސަރުކާރުގެ ފަރާތުން، ޚާރިޖީ ވަޒީރު ވަނީ ޝުކުރު އަދާކުރައްވާފައެވެ.

A very warm welcome to the new High Commissioner of India G. Balasubramanian!

I had a productive first meeting with the High Commissioner today. We reflected on the enduring historical bond between our two countries and reaffirmed our commitment to advancing the close… pic.twitter.com/JiG4PGSMML

— Abdulla Khaleel (@abkhaleel) January 20, 2025

މި ބައްދަލުވުމުގައި ޚާރިޖީ ވަޒީރާއެކު ބައިވެރިވެވަޑައިގަންނަވާފައި ވަނީ، ފޮރިން ސެެކްރެޓަރީ ފާތިމަތު އިނާޔާއާއި، އެމްބެސެޑަރ އެޓް ލާޖް، މުހައްމަދު ފަހުމީ ހަސަނާއި،  އިންޑިއާ ޑިވިޜަންގެ ޖޮއިންޓް ސެކްރެޓަރީ ޑރ. އިބްރާހިމް ޒުހުރީއާއި، ޑިރެކްޓަރ އަޙްމަދު ސުޒިލް އަދި ޑިރެކްޓަރ އާއިޝަތު ޝަހުލާއެެވެ. 

އިންޑިއާ ސަރުކާރުން ދިވެހިރާއްޖެއަށް ކަނޑައެޅުއްވި އައު ސަފީރު، ޖީ. ބަލަސުބްރަމާނިއަން، އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް މި މަހުގެ 6 ވަނަ ދުވަހު އަރުވާފައިވެއެވެ.