ޓްރަމްޕް އަލުން ވެރިކަމަށް އައުމާއެކު ވޯލްޑް ހެލްތު އޯގަނައިޒޭޝަނުން އެމެރިކާ ވަކިވުމުގެ މަސައްކަތް ފަށައިފި

ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން އެމެރިކާ ވަކިވުމުގެ މަސައްކަތް ފެށުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އެގްޒެކެޓިވް އޯޑަރެއްގައި ސޮއިކުރައްވާފައެވެ. މިއީ ޓްރަމްޕް ވެރިކަމަށް އައުމާއެކު ވަޒީފާއާ ހަވާލުވި ފުރަތަމަ ދުވަހު ސޮއިކުރެއްވި އެތައް އެގްޒެކެޓިވް އޯޑަރުތަކުގެ ތެރެއިން އެއް އޯޑަރެވެ.

އޯ، މިއީ ވަރަށް މުހިންމު އެއްޗެއް

ވައިޓް ހައުސްއަށް އެނބުރި ވަޑައިގެން މި ލިޔުމުގައި ސޮއިކުރެއްވުމަށްފަހު ޓްރަމްޕް ވިދާޅުވި

މިއީ ޓްރަމްޕް ޑަބްލިއުއެޗްއޯއިން އެމެރިކާ ވަކިކުރުމަށް އަމުރު ކުރެއްވި ދެވަނަ ފަހަރެވެ. ކޯވިޑް-19 ގެ ބަލިމަޑުކަމުގައި ޑަބްލިއުއެޗްއޯއިން ޢަމަލުކުރި ގޮތާމެދު ފާޑުކިޔުއްވުމަށްފަހު، ޓްރަމްޕްގެ ކުރީގެ ދައުރުގައިވެސް ޖެނީވާގައި ހުންނަ މިމުއައްސަސާއިން އެމެރިކާ ވަކިވުމުގެ މަސައްކަތް ފައްޓަވާފައިވެއެވެ. ނަމަވެސް ރައީސް ޖޯ ބައިޑަން ވެރިކަމަށް ވަޑައިގަތުމަށްފަހު އެ ނިންމުން ބަދަލުކުރެއްވިއެވެ.

ވެރިކަމާ ހަވާލުވި ފުރަތަމަ ދުވަހު މި އެގްޒެކެޓިވް އަމުރު ތަންފީޒުކުރެއްވުމުން، އެމެރިކާ ރަސްމީކޮށް މި ބައިނަލްއަޤްވާމީ އޭޖެންސީއިން ވަކިވުމުގެ ފުރުޞަތު ބޮޑުވެގެން ދާނެއެވެ.

އެމީހުން ބޭނުންވަނީ އަޅުގަނޑުމެން އަނބުރާ އައުން. އެހެންވީމާ ބަލަމާ ހިނގާ ކިހިނެއްތޯ ވަނީ

 އޯވަލް އޮފީހުގައި ހުންނަވައި ޓްރަމްޕް ވިދާޅުވި

މިއީ ފަހުން އެމެރިކާ އަނބުރާ ޑަބްލިއުއެޗްއޯއަށް އައުމުގެ ފުރުޞަތު އޮތްކަމުގެ އިޝާރާތެއް ކަމަށް ބެލެވެއެވެ.

މި އެގްޒެކެޓިވް އޯޑަރުގައި ބަޔާންކޮށްފައިވާ ގޮތުގައި، އެމެރިކާ ޑަބްލިއުއެޗްއޯއިން ވަކިވަނީ "ޗައިނާގެ ވޫހާން ސިޓީއިން ފެތުރުނު ކޯވިޑް-19 ބަލިމަޑުކަމާއި އެހެނިހެން ދުނިޔޭގެ ޞިއްޙީ ކާރިސާތަކާ މެދު އެ މުއައްސަސާއިން ޢަމަލުކުރި ގޮތާއި، އަވަސް އިޞްލާޙުތަކެއް ގެނައުމަށް ނުކުޅެދުމާއި، ޑަބްލިއުއެޗްއޯގެ މެމްބަރު ޤައުމުތަކުގެ ނުފޫޒުން މިނިވަންވެފައި ނުވުމުގެ ސަބަބުން" ނެވެ.

އެމެރިކާއަކީ ޑަބްލިއުއެޗްއޯގެ އެންމެ ބޮޑު އެހީތެރިޔާއެވެ. 2023 ވަނަ އަހަރު އެމެރިކާއިން ވަނީ ޑަބްލިއުއެޗްއޯގެ ބަޖެޓުގެ ފަސްބައިކުޅަ އެއްބައި ހިއްސާކޮށްފައެވެ. ޑަބްލިއުއެޗްއޯގެ އަހަރީ ބަޖެޓަކީ 6.8 ބިލިއަން (5.5 ބިލިއަން ޕައުންޑް) އެމެރިކާ ޑޮލަރެވެ.

ޢާންމު ޞިއްޙަތުގެ ދާއިރާގެ ތަޖުރިބާކާރުން ވަނީ ޓްރަމްޕްގެ މި ނިންމެވުމާމެދު ފާޑުކިޔާފައެވެ. އެމީހުން ބުނާ ގޮތުގައި މިކަމުގެ ސަބަބުން އެމެރިކާގެ ރައްޔިތުންގެ ޞިއްޙަތަށް ނޭދެވޭ އަސަރުތަކެއް ކުރާނެއެވެ. ބައެއް ފަރާތްތަކުން ފާހަގަކުރާ ގޮތުގައި މެލޭރިއާ، ޓީބީ އަދި އެޗްއައިވީ/އެއިޑްސް ފަދަ ގައިންގަޔަށް އަރާ ބަލިތަކާ ދެކޮޅަށް ކުރެވިފައިވާ މަސައްކަތްތަކަށް ހުރަސްއެޅި، އަނބުރާ ބަލި ޖެހިދާނެއެވެ.

ރައީސް ބައިޑަންގެ ވެރިކަމުގައި ކޯވިޑް-19 އާ ގުޅޭ މަސައްކަތްތައް ވިލަރެސްކުރެއްވި އަޝިޝް ޖާ ވަނީ ކުރިން ބުނެފައިވަނީ ޑަބްލިއުއެޗްއޯއިން ވަކިވުމުން "ދުނިޔޭގެ އެކި ކަންކޮޅުތަކުގައި ދިރިއުޅޭ މީހުންގެ ޞިއްޙަތަށް ގެއްލުން ލިބުމުގެ އިތުރުން، އެމެރިކާގެ ލީޑަރޝިޕާއި ސައިންޓިފިކް ޤާބިލުކަމަށްވެސް އުނިކަން އަންނާނެ" ކަމަށެވެ.

މިއީ ވަރަށް ނުރައްކާތެރި ރިޔާސީ ނިންމުމެއް. ޑަބްލިއުއެޗްއޯއިން ވަކިވުމަކީ ދުނިޔޭގެ ޞިއްޙަތަށް ލިބޭ ބޮޑު ގެއްލުމެއް. އަދި އެއަށްވުރެވެސް ބޮޑު ގެއްލުމެއް އެމެރިކާއަށް ލިބިގެންދާނެ

ޖޯޖްޓައުން ޔުނިވަރސިޓީގެ ޕްރޮފެސަރ އަދި ދުނިޔޭގެ ޞިއްޙަތާބެހޭ ތަޖުރިބާކާރެއް ކަމަށްވާ ލޯރެންސް ގޮސްޓިން

މި ނިންމުމުގެ ސަބަބުން ދުނިޔޭގެ ޞިއްޙީ ދާއިރާގައި އެމެރިކާގެ ދައުރު ކުޑަވެ، ބައިނަލްއަޤްވާމީ ފެންވަރުގައި އެމެރިކާގެ ނުފޫޒު ދަށްވެގެންދާނެ ކަމަށް ގިނަ ފަރާތްތަކުން ފާހަގަކުރެއެވެ. އަދި ދުނިޔޭގެ އެކި ކަންކޮޅުތަކުގައި ފެތުރޭ ބަލިމަޑުކަމާއި ޞިއްޙީ ކުއްލި ނުރައްކަލުގެ ޙާލަތްތަކުގައި އެމެރިކާގެ ރައްޔިތުންނަށް ބޭނުންވާ މަޢުލޫމާތާއި އެހީތެރިކަން ހޯދުމަށް ދަތިތަކެއް ކުރިމަތިވެދާނެ ކަމަށްވެސް ބެލެވެއެވެ.