ޚަބަރު
ޓްރަމްޕް ސަރުކާރުން އަންހެން އަދި ފިރިހެން ދެ ޖިންސު އެކަނި ބަލައިގަންނަން ނިންމައިފި

އެމެރިކާގެ ރައީސް ޑޮނަލްޑް ޓްރަމްޕް ފޮޓޯ:އިންޓަނެޓް
އެމެރިކާގެ ރައީސް ޑޮނަލްޑް ޓްރަމްޕް މިއަދު ސޮއިކުރައްވާނެކަމަށް ބެލެވޭ އެގްޒެކެޓިވް އޯޑަރެއްގެ ދަށުން، ފެޑެރަލް ސަރުކާރުން ބަލައިގަންނާނީ ހަމައެކަނި ދެ ޖިންސު ކަމުގައިވާ ފިރިހެން އަދި އަންހެން އެކަނި ކަމަށް ނިންމައިފިއެވެ.
މި އޯޑަރުގެ ސަބަބުން، ޖިންސުގެ ގޮތުގައި އެކްސް ފާހަގަކުރުމަށް ބައިޑެން ސަރުކާރުން ދީފައިވާ ހުއްދަ އުވާލެވޭނެއެވެ. މީގެ ތެރޭގައި ޕާސްޕޯޓުގައި ޖިންސު ފާހަގަކުރުމުގެ ގޮތުން ދީފައިވާ ހުއްދަވެސް ހިމެނެއެވެ.
މިއަދުން ފެށިގެން، އެމެރިކާ ސަރުކާރުގެ ރަސްމީ ސިޔާސަތަކީ ދުނިޔޭގައި ވަނީ ދެ ޖިންސު އެކަނި ކަމުގައިވާ ފިރިހެން އަދި އަންހެން އެކަނި ކަމުގައި ބެލުން
ޓްރަމްޕް
މިއީ އޭނާގެ އިންތިޚާބީ ވައުދުތަކުގެ ތެރެއިން އެއް ވައުދު ފުއްދުމަށް އެޅުއްވި ފުރަތަމަ ފިޔަވަޅެވެ.
ޓްރަމްޕް ސަރުކާރުގެ އިސް އޮފިޝަލެއް ވިދާޅުވި ގޮތުގައި މި އޯޑަރުގެ މަޤްޞަދަކީ "ޖިންސާ ގުޅޭ ހައްދުފަހަނަޅާފައިވާ ވިސްނުމުން އަންހެނުން ސަލާމަތްކޮށް، ބަޔޮލޮޖިކަލް ޙަޤީޤަތްތައް ފެޑެރަލް ސަރުކާރަށް އަނބުރާ ގެނައުމެވެ." އަދި ފިރިހެން އަދި އަންހެން މި ދެ ޖިންސަކީ "ބަދަލުނުކުރެވޭނެ އަދި އަސާސީ އަދި ދެކޮޅުނުހެދެވޭނެ ޙަޤީޤަތެއްގެ މައްޗަށް ބިނާވެފައިވާ" ދެ ޖިންސު ކަމުގައި އެ އޮފިޝަލް ވިދާޅުވިއެވެ.
މި އޯޑަރުގެ ދަށުން، ސަރުކާރުގެ ހުރިހާ އިދާރާތަކުން ޕާސްޕޯޓާއި ވީޒާ ފަދަ ރަސްމީ ލިޔެކިޔުންތަކުގައި "ޖިންސު ރަނގަޅަށް ފާހަގަކުރުން" ކަށަވަރުކުރަންޖެހޭނެއެވެ. އަދި ޖަލުތަކާއި، މުހާޖިރުންގެ ހިޔާތަކާއި، ރޭޕް ހިޔާތަކާއި އެހެނިހެން "އަމިއްލަވަންތަ ތަންތަން" ހިންގާ ޑިޕާޓްމަންޓްތަކަށް އެއް ޖިންސުގެ ޖާގަތައް ޙިމާޔަތްކުރުމަށް އަންގާފައިވެއެވެ.
މި އޯޑަރަކީ ބައިޑެން ސަރުކާރުން އެމެރިކާގެ ރައްޔިތުންގެ ޖިންސީ ކަންކަމާ ގުޅޭ ގޮތުން ގެނެސްފައިވާ ބަދަލުތައް އުވާލުމަށް އަޅާ ފިޔަވަޅެކެވެ. 2022 ވަނަ އަހަރުން ފެށިގެން، އެމެރިކާގެ ރައްޔިތުންނަށް ވަނީ ޕާސްޕޯޓުގައި ޖިންސުގެ ގޮތުގައި "އެކްސް" ފާހަގަކުރުމުގެ ހުއްދަ ލިބިފައެވެ.