ޗައިނާ-ރާއްޖެ މިނިވަން ވިޔަފާރީގެ އެއްބަސްވުމުގެ ދަށުން 2 މިލިޔަން ރުފިޔާގެ މުދާ އެތެރެކޮށްފި

ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފެށިފަހުން މިހާތަނަށް 1.9 މިލިޔަން ރުފިޔާގެ މުދާ ރާއްޖެއަށް އެތެރެކޮށްފައިވާ ކަމަށް މޯލްޑިވްސް ކަސްޓަމްސް ސާވިސްގެ ތަފާސްހިސާބުތަކުން ދައްކައިފިއެވެ. މިއީ ކަނޑުގެ މަގުންނާއި ވައިގެ މަގުން އެތެރެކޮށްފައިވާ މުދާ ކަމަށް ކަސްޓަމްސްއިން ވިދާޅުވެއެވެ.

ޗައިނާއާއި ރާއްޖެއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފަށާފައިވަނީ މި މަހުގެ އެއްވަނަ ދުވަހުއެވެ. މިއީ ރާއްޖޭގެ ފުރަތަމަ މިނިވަން ވިޔަފާރީގެ އެއްބަސްވުމެވެ. މި އެއްބަސްވުމުގެ ދަށުން ދުނިޔޭގެ ދެވަނައަށް އެންމެ ބޮޑު އިޤްތިޞާދުން ޑިއުޓީ އެއްކޮށް މަޢާފްވާ ގޮތަށް ނުވަތަ ކުޑަކުރެވޭ ގޮތަށް މުދާ އެތެރެކުރުމުގެ ފުރުސަތު ލިބިގެންދެއެވެ.

ކަސްޓަމްސްއިން ހާމަކުރެއްވި ގޮތުގައި މި މަހުގެ 18 ވަނަ ދުވަހުގެ ނިޔަލަށް، ކަނޑުމަގުން 1,040,875 ރުފިޔާގެ މުދާ އަދި ވައިގެ މަގުން 882,381 ރުފިޔާގެ މުދާ އެތެރެކޮށްފައިވެއެވެ. ކަނޑުމަގުން 3 ޝިޕްމެންޓެއްގެ މުދާ އަދި ވައިގެ މަގުން 9 ޝިޕްމެންޓެއްގެ މުދާ ރާއްޖެ އެތެރެކޮށްފައިވާ ކަމަށް ކަސްޓަމްސްއިން ވިދާޅުވިއެވެ.

މި އެއްބަސްވުމުގެ ދަށުން އެކި ސިނާޢަތްތަކަށް ބޭނުންވާ މުދަލުން ޑިއުޓީ ވަނީ މަޢާފްވެފައެވެ. މީގެތެރޭގައި އެލެކްޓްރޯނިކް ސާމާނާއި ފަރުނީޗަރު ފަދަ ހަރުމުދާތަކާއި އިމާރާތްކުރުމުގެ މަސައްކަތަށް ބޭނުންވާ ސާމާނު ހިމެނެއެވެ. އަދި ރާއްޖެއިން ބޭރުކުރާ މަހަށްވެސް ޑިއުޓީ މަޢާފްވެގެންދާނެއެވެ.

މި އެއްބަސްވުމުގެ ދަށުން ލިބޭ ޑިއުޓީގެ ލުއިތައް ހޯދުމަށް ސެޓިފިކެޓް އޮފް އޮރިޖިން ބޭނުންވާނެ ކަމަށް ކަސްޓަމްސްއިން ވިދާޅުވެއެވެ. އަދި ރާއްޖެއިން ބޭރުކުރާ މުދަލަށްވެސް ކަސްޓަމްސްއިން ދޫކުރާ ސެޓްފިކެޓް އޮފް އޮރިޖިން، ޗައިނާގެ އިދާރާތަކަށް ހުށަހަޅަން ޖެހޭނެ ކަމަށް ކަސްޓަމްސްއިން ވިދާޅުވެއެވެ.

ސަރުކާރުން ވިދާޅުވެފައިވާ ގޮތުގައި މިހާރުވެސް ދިވެހިރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ދަނީ ކުރެވެމުންނެވެ. އަދި މި އެއްބަސްވުމަށް އަމަލު ކުރަން ފެށުމާއެކު މި އަދަދު 1 ބިލިޔަން ޑޮލަރަށް އަރާނެ ކަމަށް ސަރުކާރުން ލަފާކުރައްވައެވެ.