ވަދު ކަނދުފަތި ކައިރިން ދޮށީގެ މަސްވެރިކަން ކުރުމުގެ ހުއްދަ ދީފި

މަސްވެރިކަމާބެހޭ އާންމު ޤަވާއިދަށް ގެނެވުނު އިސްލާހަކާ ގުޅިގެން، ވަދު ކަނދުފަތިތައް ކައިރިން ދޮށީގެ މަސްވެރިކަން ކުރުމުގެ ހުއްދަ ދީފިއެވެ. މި ބަދަލު ގެނެވުނީ މަސްވެރިކަމާބެހޭ އާންމު ޤަވާއިދަށް ގެނެވުނު ދެވަނަ އިސްލާހުގެ ދަށުންނެވެ.

މަސްވެރިކަމާބެހޭ ވުޒާރާއިން މިއަދު ނެރުނު ބަޔާނެއްގައި ބުނެފައިވާ ގޮތުގައި، މީގެ ކުރިން ވަދު ކަނދުފަތިތަކުގެ އެއް މޭލު ސަރަހައްދުގައި އަތުނަނު ބޭނުންކޮށްގެން ބޮޑު ކަންނެލީގެ މަސްވެރިކަމާއި ދޮށީގެ މަސްވެރިކަން ކުރުން މަނާކޮށްފައި އޮތް އޮތުން ވަނީ އުވާލާފައެވެ. މިހާރު ވަދު ކަނދުފަތިތައް ކައިރިންވެސް ދޮށީގެ މަސްވެރިކަން ކުރެވޭނެއެވެ.

ނަމަވެސް، އޮއިވާލި ނުވަތަ މަސް ކަނދުފަތިތަކާ ގުޅޭ ގޮތުން ގެނެވިފައިވާ ބަދަލެއް ނެތެވެ. އެ ކަނދުފަތިތަކުގެ 3 މޭލު ސަރަހައްދުގައި ކުރެވޭނީ ހަމައެކަނި ދޮށީގެ މަސްވެރިކަމެވެ. އަދި ކަނދުފައްޗަށް ގެއްލުންވާ ގޮތަށް އެއްވެސް ހަރަކާތެއް ހިންގުން މަނާކަމަށް ޤަވާއިދުގައި ބަޔާންކޮށްފައިވެއެވެ.

މި އިސްލާހާއެކު، މަސްވެރިންގެ ދަފްތަރު ބެލެހެއްޓުމާ ގުޅޭ މާއްދާވެސް ވަނީ އުނިކޮށްފައެވެ. މަސްވެރިކަމާބެހޭ ވުޒާރާއިން ބުނީ މި ބައި އުނިކޮށްފައިވަނީ މަސްވެރިންގެ ދަފްތަރުގެ މަސައްކަތް އެހެން ޤަވާއިދެއްގެ ދަށުން ކުރަމުންދާތީއެވެ.

މި އިސްލާހުތައް ގެނެވިފައިވަނީ 2020 ވަނަ އަހަރު އެކުލަވާލެވުނު މަސްވެރިކަމުގެ އާންމު ޤަވާއިދަށެވެ. މި ޤަވާއިދު ފުރިހަމައަށް ތަންފީޒުކުރަން ފެށީ 2021 ވަނަ އަހަރުއެވެ. މިހާތަނަށް މި ޤަވާއިދަށް ދެ އިސްލާހެއް ގެނެވިފައިވެއެވެ.

ސަރުކާރުން މިހާރު ދަނީ ކަނދުފަތިތަކުގެ ޑިޒައިނަށް ބަދަލު ގެނެސް، އިތުރަށް ރަނގަޅުކުރެވޭނެ ގޮތްތައް ދިރާސާކުރަމުންނެވެ.