ސައިންސް / ދުނިޔެ
ސިކުނޑީގެ ޓިޝޫތައް ހަލާކުކޮށްލާ ނުރައްކާތެރި ދިރޭއެއްޗަކާ ގުޅޭގޮތުން އޮސްޓްރޭލިއާގެ ރައްޔިތުންނަށް އިންޒާރު
"ނެގްލެރިއާ ފައުލެރީ އަމީބާ" ފޮޓޯ:އިންޓަނެޓް
ވެސްޓަން އޮސްޓްރޭލިއާގައި ހޫނުގަދަވެފައިވާ ދުވަސްވަރެއްގައި، ރަނގަޅަށް ސާފުނުކުރާ ފެނުގައި އުޅެދާނެ ނުރައްކާތެރި ދިރޭއެއްޗަކާ ގުޅޭގޮތުން އެ ސްޓޭޓުގެ ރައްޔިތުންނަށް އިންޒާރު ދީފިއެވެ.
"ނެގްލެރިއާ ފައުލެރީ އަމީބާ" އަކީ ބެކްޓީރިއާ ކައިއުޅޭ އަދި ހޫނު، މީރު ފެނުގައި އާންމުކޮށް އުޅޭ ދިރޭއެއްޗެކެވެ. މި ދިރޭއެތީގެ ސަބަބުން "އެމީބިކް މެނިންޖައިޓިސް" ކިޔާ، ނާދިރު ނަމަވެސް ގިނަފަހަރަށް މަރުވުމަށް މަގުފަހިކުރުވާ ބައްޔެއް ޖެހުމަށް މެދުވެރިވެއެވެ. މި ބަލި ޖެހުމުން މީހާގެ ސިކުނޑީގެ ޓިޝޫތައް ހަލާކުވެއެވެ.
ވެސްޓަން އޮސްޓްރޭލިއާގެ ހެލްތު ޑިޕާޓްމަންޓުގެ އެންވަޔަރަންމަންޓަލް ހެލްތު އެގްޒެކެޓިވް ޑައިރެކްޓަރ ޑރ. މައިކަލް ލިންޑްސޭ ވިދާޅުވި ގޮތުގައި މި ދިރޭއެއްޗަށް 28 ޑިގްރީ ސެލްސިއަސްއަށްވުރެ މަތީ ފެނުގައި ދިރިއުޅެވެއެވެ. މިގޮތުން ކޯރު، ކުޅި، ފާމު ޑޭމްތައް، ގޯތިތެރޭގައި ބޭނުންކުރާ ހޮޅިތައް، ސްޕާތައް އަދި ފެންވަޅުތަކުގައި މި އެމީބާ އުޅެވެއެވެ.
ހޫނު މޫސުމުގައި ކޮންމެ ފެނެއްގައިވެސް މި އަމީބާ އުޅެދާނެކަމަށް ބަލައި، ފެން ނޭފަތަށް ވަނަނުދިނުމަށް ސަމާލުވާންޖެހޭނެ
ޑރ. ލިންޑްސޭ
ޚާއްޞަކޮށް އަމިއްލަ ފެންތާނގި، ޑޭމް ނުވަތަ ބޯހޯލު ބޭނުންކުރާ އަަވަށުތެރޭގެ މީހުންނާއި، ދަނޑުހައްދާ ސަރަހައްދުގައި ދިރިއުޅޭ މީހުން އަދި ރަނގަޅަށް ބެލެހެއްޓިފައިނުވާ ފެންވަޅު ހުންނަ މީހުން މިކަމަށް ސަމާލުވާންޖެހެއެވެ. އަދި ކުޑަކުދިންނާއި ޒުވާނުންނަށް މި ބަލި ޖެހުމުގެ ފުރުސަތު ބޮޑުވާނެކަމަށް ޑރ. ލިންޑްސޭ ވިދާޅުވިއެވެ.
މީރު ފެނުގައި ފީނުމާއި، ޖެޓްސްކީ ދުއްވުމާއި، ފެންވެރުމުގައި ނުވަތަ މޫނު ދޮވުމުގައި ނޭފަތަށް ފެން އަރުވައިގެން ވެސް މި ބަލި ޖެހިދާނެއެވެ. ނަމަވެސް ކްލޯރިން ލައިގެން ރަނގަޅަށް ސާފުކޮށްފައިވާ ފެނުގައި މި އަމީބާ ނުހުންނާނެކަމަށް ޑރ. ލިންޑްސޭ ވިދާޅުވިއެވެ.
1980 ގެ އަހަރުތަކުގެ ފަހުން ވެސްޓަން އޮސްޓްރޭލިއާގައި މި ބަލި ޖެހިފައިވާ އެއްވެސް މީހަކު ނެތްކަމަށް ޑރ. ލިންޑްސޭ ވިދާޅުވިއެވެ. ނަމަވެސް މި ބަލި ޖެހުމުގެ ފުރުސަތު އޮތުމާއެކު، ރައްކާތެރިވުމަށް އޭނާ އިލްތިމާސް ކުރެއްވިއެވެ.
