ޚަބަރު
ރާއްޖޭގައި އިއާދަކުރަނިވި ހަކަތަ އިތުރުކުރުމަށް ޖަޕާނާއެކު މަޝްވަރާކޮށްފި
ރާއްޖޭގައި އިއާދަކުރަނިވި ހަކަތަ އިތުރުކުރުމަށް ޖަޕާނާއެކު ކުރިއަށްދިޔަ މަޝްވަރާ ބައްދަލުވުން ފޮޓޯ:ވުޒާރާ
ރާއްޖޭގައި އިއާދަކުރަނިވި ހަކަތައާއި ދެމެހެއްޓެނިވި ތަރައްޤީގެ ފުރުޞަތުތައް ފަހިކުރުމަށް ޖަޕާނާއެކު މަޝްވަރާތަކެއް ކުރިއަށް ގެންގޮސްފިއެވެ. މި މަޝްވަރާތައް ކުރިއަށް ގެންދެވުނީ މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤް އިބްރާހީމް އާއި ޖަޕާނުގެ އަސަކުރާ ތަކެކަޒޫ އަދި އެޤައުމުގެ ވަފުދެއްގެ ދެމެދުގައެވެ.
Minister @Thoriqibrahim met with Mr. Asakura Takekazu and his delegation from Japan.
— Min. of Climate Change, Environment and Energy (@MoEnvmv) January 20, 2025
Discussions centred on progressing renewable energy and low emission development opportunities through Japanese aid and investments. pic.twitter.com/lRIeZz1QcP
މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާގައި ބޭއްވުނު މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ޖަޕާނުގެ އެހީއާއި އިންވެސްޓްމަންޓްގެ ޒަރީއާއިން ދިވެހިރާއްޖޭގައި އިއާދަކުރަނިވި ހަކަތައާއި ލޯ އެމިޝަން ތަރައްޤީގެ ފުރުޞަތުތައް ކުރިއެރުވުމާ ގުޅޭގޮތުންނެވެ.
މި ބައްދަލުވުމުގައި ވަޒީރު ޠާރިޤް އިބްރާހީމް ވިދާޅުވީ ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް މަސައްކަތްކުރައްވާނެ ކަމަށެވެ. އަދި ޖަޕާނުގެ ވަފުދުން ވަނީ ދިވެހިރާއްޖެއަކީ ތިމާވެށި ރައްކާތެރިކުރުމަށް ގިނަގުނަ މަސައްކަތްތަކެއް ކުރަމުންދާ ޤައުމެއްކަން ފާހަގަކޮށް، މިދާއިރާއިން ދިވެހިރާއްޖެއަށް އެހީތެރިވުމުގެ ޝައުޤުވެރިކަން ފާޅުކުރައްވާފައެވެ.
ދެ ފަރާތުންވެސް ފާހަގަކުރެއްވި ގޮތުގައި މި ބައްދަލުވުމަކީ ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، ތިމާވެށި ރައްކާތެރިކުރުމުގެ ދާއިރާއިން އިތުރު ފުރުޞަތުތައް ހޯދުމަށް މަގުފަހިވާނެ ބައްދަލުވުމެކެވެ.
ފާހަގަކޮށްލެވޭ ކަމަކީ، 2028 ވަނަ އަހަރާ ހަމައަށް އަންނައިރު ރާއްޖޭގައި ބޭނުންކުރެވޭ ކަރަންޓުގެ %33 އިއާދަކުރަނިވި ހަކަތައަށް ހެދުމަށް ސަރުކާރުން މަސައްކަތް ކުރަމުންދާކަމެވެ. މިގޮތުން މިދިޔަ އަހަރު ރާއްޖޭގައި ޤާއިމްކޮށްފައިވާ އިއާދަކުރަނިވި ހަކަތައަށް 17 މެގަވޮޓް އިތުރުކޮށް، ޖުމްލަ 70 މެގަވޮޓަށް އިތުރުކުރެވިފައިވެއެވެ.
މި ބައްދަލުވުމަކީ ރާއްޖޭގެ ތިމާވެށި ރައްކާތެރިކުރުމާއި އިއާދަކުރަނިވި ހަކަތަ އިތުރުކުރުމުގެ މަސައްކަތަށް އިތުރު ހިތްވަރަކަށް ވެގެންދާނެ ކަމަށް ބެލެވެއެވެ.
