ލޮނު ނުލާ ލޮނުރަހަ އިތުރުކުރާ އިލެކްޓްރިކް ސަމުސާ ތަޢާރަފުކޮށްފި

ޖަޕާނުގެ ނަންމަޝްހޫރު ކުންފުންޏެއް ކަމަށްވާ ކިރިން އިން ވަނީ ލޮނު ނުލާ ކާނާގެ ލޮނުރަހަ އިތުރުކުރެވޭ އައު ޓެކްނޮލޮޖީއެއް ތަޢާރަފުކޮށްފައެވެ. މި އީޖާދު ވަނީ ލަސް ވެގަސްގައި ބޭއްވުނު ސީ.އީ.އެސް 2025 ގައި ދައްކާލާފައެވެ.

މި އިލެކްޓްރިކް ސަމުސާ އަކީ ކުދި ކަރަންޓު ޝޮކުތަކެއް މެދުވެރިކޮށް ދުލުގައި ލޮނުރަހަ އުފެދޭ ގޮތަށް ފަރުމާކޮށްފައިވާ އާލާތެކެވެ. މިހާރު މި ސަމުސާ ވިއްކަމުންދަނީ ޖަޕާނުގައި ކަމަށާއި، އަގަކީ ގާތްގަނޑަކަށް 127 އެމެރިކާ ޑޮލަރު ކަމަށް ވަނީ ހާމަކޮށްފައެވެ.

މި އާލާތުގެ މައިގަނޑު މަޤްޞަދަކީ މީހުންގެ ކާނާގައި ހިމެނޭ ލޮނުގެ މިންވަރު މަދުކުރުމަށް އެހީތެރިވުމެވެ. ނަމަވެސް އާދައިގެ ލޮނުރަހަ ދެމެހެއްޓުމަށް މަގުފަހިކޮށްދިނުމެވެ. ޚާއްޞަކޮށް މި އުފެއްދުން އަމާޒުކޮށްފައިވަނީ ޖަޕާނުގެ ބާޒާރަށެވެ. އެއީ ޖަޕާނުގެ ބޮޑެތި މީހުން ބޭނުންކުރާ ލޮނުގެ މިންވަރު ވޯލްޑް ހެލްތު އޯގަނައިޒޭޝަނުން ލަފާދޭ މިންވަރަށްވުރެ ދެގުނަ އިތުރުވާތީއެވެ.

މި އީޖާދަކީ ލޮނުގެ ބޭނުން މަދުކުރުމަށް ކުރެވޭ މަސައްކަތުގައި ލިބިގެންދާނެ ބޮޑު ކުރިއެރުމެއް ކަމަށް ބެލެވެއެވެ. އަދި މިކަމުގެ ސަބަބުން ގިނަ ބަޔަކަށް ޞިއްޙީގޮތުން ފައިދާކުރަނިވި ކާނާ ބޭނުންކުރުމަށް ހިތްވަރު ލިބިގެންދާނެ ކަމަށް ވެސް ލަފާކުރެވެއެވެ.