ޚަބަރު
އިނގިރޭސިވިލާތުން މަންކީޕޮކްސްގެ އައު ވޭރިއަންޓެއް ފެނިއްޖެ

މަންކީ ޕޮކްސް ފޮޓޯ:އިންޓަނެޓް
އުގަންޑާއިން އިނގިރޭސިވިލާތަށް ދަތުރުކޮށްފައި އައި މީހެއްގެ ކިބައިން މަންކީޕޮކްސްގެ އައު ވޭރިއެންޓެއް ކަމަށްވާ ކްލޭޑް އައިބީ އެމްޕޮކްސް ފެނިފައިވާ ކަމަށް އިނގިރޭސިވިލާތުގެ ހެލްތު ސޭފްޓީ އެޖެންސީން ހާމަކޮށްފިއެވެ. މި ކޭސް ފެނިފައިވަނީ އީސްޓް ސަސެކްސްގައެވެ. އަދި މިހާރު އެ ފަރާތް ވަނީ ގައިޒް އެންޑް ސެއިންޓް ތޯމަސް އެންއެޗްއެސް ފައުންޑޭޝަން ޓްރަސްޓްގެ ޚާއްޞަ ފަރުވާގެ ދަށުގައެވެ.
ޓެލެގްރާފުން ނަގާފައިވާ ސްކައި ނިއުސްގެ ރިޕޯޓެއްގައި ބުނެފައިވާ ގޮތުގައި މިއީ 2024 ވަނަ އަހަރުގެ އޮކްޓޯބަރު މަހުން ފެށިގެން އިނގިރޭސިވިލާތުގައި ފެނިފައިވާ ކްލޭޑް އައިބީ އެމްޕޮކްސްގެ ހަވަނަ ކޭހެވެ. މިހާރު ވަނީ ބަލި ޖެހިފައިވާ ފަރާތާ ގާތުން އުޅެފައިވާ މީހުން ހޯދުމުގެ މަސައްކަތް ފަށާފައެވެ. އަދި މި މަސައްކަތުގައި އެހެނިހެން އިދާރާތަކުގެ އެހީތެރިކަން ހޯދާފައިވެއެވެ.
ބަލި ފެތުރުން ހުއްޓުވުމަށްޓަކައި، ބަލި ޖެހިފައިވާ ފަރާތާ ގާތުން އުޅެފައިވާ މީހުންނަށް ޓެސްޓުކުރުމާއި ވެކްސިން ދިނުމުގެ ފުރުޞަތު ދެވޭނެއެވެ. އަދި އެ ފަރާތްތަކަށް އިތުރު ފަރުވާ ބޭނުންވާނަމަ، ނުވަތަ ޓެސްޓު ޕޮޒިޓިވްވާނަމަ ކުރިއަށް ދާންވީ ގޮތުގެ އިރުޝާދު ދެވޭނެއެވެ.
ޔޫކޭ ހެލްތު ސޭފްޓީ އެޖެންސީގެ ޑެޕިއުޓީ ޑިރެކްޓަރ ޑރ. މީރާ ޗަންދު ވިދާޅުވެފައިވަނީ އިނގިރޭސިވިލާތުގެ އާންމު ރައްޔިތުންނަށް މި ބައްޔަށް ކުރިމަތިލާންޖެހުމުގެ ނުރައްކާ ކުޑަކަމަށެވެ.
ފާއިތުވި މަސްތަކުގައި އެފްރިކާގެ އެކި ޤައުމުތަކުގައި ކްލޭޑް އައިބީ އެމްޕޮކްސް ފެނިފައިވާ ކަމަށާއި، ބެލްޖިއަމް، ކެނެޑާ، ފްރާންސް، ޖަރުމަނުވިލާތް، ސުވީޑަން އަދި އެމެރިކާ ފަދަ ޤައުމުތަކުގައިވެސް މި ބަލީގެ ކޭސްތައް ކަށަވަރުވެފައިވާ ކަމަށް ޓެލެގްރާފުން ރިޕޯޓުކޮށްފައިވެއެވެ.