އެއަރ އެމްބިއުލާންސްގެ ޚިދުމަތުން 700 ދަތުރު: 804 މީހުން އުފުލައިފި

ސިއްޙަތާ ބެހޭ ވުޒާރާއިން ހާމަކުރައްވާފައިވާ ގޮތުގައި، އެއަރ އެމްބިއުލާންސްގެ ޚިދުމަތް ފެށުނު ފަހުން މިހާތަނަށް 700 ދަތުރު ކޮށްފައިވެއެވެ. މި ދަތުރުތަކުގައި ޖުމްލަ 804 މީހުން އުފުލާފައިވާކަމަށް އެ ވުޒާރާއިން ބުނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންމެ މުހިންމު އެއް ވަޢުދެއްގެ ގޮތުގައި، ވައިގެ މަގުން ބަލިމީހުން އުފުލުމަށް ޚާއްސަ މަތިންދާ ބޯޓެއް ބޭއްވުމުގެ ވަޢުދު ފުއްދުމުގެ ގޮތުން، އެއަރ އެމްބިއުލާންސްގެ ޚިދުމަތް ރާއްޖޭގައި ފެށިފައިވަނީ މިދިޔަ އަހަރުގެ މާރިޗު މަހުއެވެ. މި ޚިދުމަތަށް ޚާއްސަކޮށް ޑޭޝް-8 މަރުކާގެ ބޯޓަކާއި ސީޕްލޭނެއް ވަނީ ކަނޑައަޅާފައެވެ.

ޑޭޝް-8 އެއަރ އެމްބިއުލާންސް ބޯޓަކީ އެއްފަހަރާ ދެ މީހުން އުފުލޭ ކެޕޭސިޓީގެ ބޯޓެކެވެ. މި ޚިދުމަތް ހަރުދަނާކުރުމަށްޓަކައި، 15 މީހުންގެ ޚާއްސަ ޓީމެއް ވަނީ ތަމްރީނު ކުރެވިފައެވެ. މި ޓީމުގައި ޑޮކްޓަރުންނާއި، ނަރުހުންނާއި، އިމަޖެންސީ މެޑިކަލް ޓެކްނީޝަނުން ހިމެނެއެވެ.

ސަރުކާރުގެ އަމާޒަކީ މި ޚިދުމަތަށް ޚާއްސަ ހެލިކޮޕްޓަރެއް ހޯދުމެވެ. މީގެ ކުރިން ރާއްޖޭގައި ބަލިމީހުން އުފުލާފައިވަނީ އިންޑިއާގެ ސިފައިންގެ އެހީތެރިކަމާއެކު ހެލިކޮޕްޓަރުގައާއި މޯލްޑިވިއަންގެ އާންމު ދަތުރުފަތުރުގެ ބޯޓުތަކުގައެވެ. ނަމަވެސް، މިހާރު ސަރުކާރުގެ އަމާޒަކީ ބަލިމީހުން އުފުލުމަށް ޚާއްސަ ބޯޓަކާއެކު، ދިވެހިން އެ މަސައްކަތުގައި ހަރަކާތްތެރިވުމެވެ.

އެއަރ އެމްބިއުލާންސްގެ ޚިދުމަތް ފެށުމާއެކު، ރާއްޖޭގެ އެކި ކަންކޮޅުތަކުގައި ތިބި ބަލިމީހުންނަށް އަވަސް ފަރުވާ ލިބުމުގެ ފުރުސަތު އިތުރުވެ، ސިއްޙީ ޚިދުމަތްތައް ފުޅާވެގެން ގޮސްފައިވާކަން ފާހަގަކުރެވެއެވެ.