ޚަބަރު
ގައްދޫ އައިސްޕަލާންޓަށް ދިމާވި މައްސަލަ ޙައްލުކޮށްފި

ރަށެއްގެ އައިސްޕްލާންޓުން މަސްވެރިން އައިސް ނަގަނީ، ފޮޓޯ: މިހާރު
ހުލާސާ
އައިސް ލިބުމުގައި ދަތިތަކެއް ދިމާވި ނަމަވެސް، މަސް ކިރުމުގައި އެއްވެސް މައްސަލައެއް ނުޖެހޭނެކަމަށް މިފްކޯއިން ހާމަކޮށްފައިވޭ.
ގދ. ގައްދޫގައި ހުންނަ މިފްކޯގެ އައިސްޕްލާންޓަށް ދިމާވި ޓެކްނިކަލް މައްސަލަ ޙައްލުކުރުމަށްފަހު އެ ރަށުން އައިސްގެ ޚިދުމަތް މަސްވެރިންނަށް އަލުން ދޭންފަށައިފިއެވެ.
ބައެއް ރަށްރަށުގެ އައިސްޕްލާންޓުތަކުން އައިސް ލިބުން ދަތިވުމާ ގުޅިގެން މަސްވެރިން ވަނީ ހޯމަ ދުވަހު ކަންބޮޑުވުން ފާޅުކޮށްފައެއެވެ.
އެ ކަންބޮޑުވުންތަކާ ގުޅިގެން މިފްކޯއިން އެ ދުވަހު ބުނީ، ޚިދުމަތަށް ބުރޫއެރީ ޕްލާންޓަށް ދިމާވި މައްސަލައަކުން ކަމަށާއި، އެކަން ޙައްލުކުރުމުގެ މަސައްކަތް ކުރަމުން އަންނަ ކަމަށެވެ.
މިފްކޯގެ މީޑިއާ އޮފިޝަލް ހާމަކޮށްފައިވާ ގޮތުގައި، ސ. ހުޅުމީދޫ އައިސްޕްލާންޓުގެ ޚިދުމަތް މެދުކެނޑުނީ އެ ޕްލާންޓުގެ އެއް ޔުނިޓުގެ ޑްރަމަށް މައްސަލައެއް ޖެހި ދެވަނަ ޔުނިޓުގައި ގޭސް ލީކުވުމުގެ މައްސަލައެއް ކުރިމަތިވުމުން ކަމަށާއި، އަދި ގދ. ދައްދޫ އާއި ގދ. ތިނަދޫގައި މައްސަލަ ކުރިމަތިވީ އައިސް ޕްލާންޓުގެ ކޮންޑެންސާ ޕަމްޕަށް ކަމަށެވެ.
މި މައްސަލައާ ގުޅިގެން އެ ކުންފުނީގެ އިންޖިނިއަރުން ކުރި މަސައްކަތުން މިހާރު މިވަނީ ގައްދޫގެ އައިސްޕްލާންޓު ރަގަޅު ކުރެވިފައެވެ.
މި ރަށްރަށުގައި އައިސް ލިބުމުގައި ދަތިތަކެއް ދިމާވި ނަމަވެސް، މަސް ކިރުމުގައި އެއްވެސް މައްސަލައެއް ނުޖެހޭނެކަމަށް މިފްކޯއިން ހާމަކޮށްފައިވެއެވެ.