ރައްކާތެރިކަމަކަށް ނުވުމުން، ބްރިޖުގެ މަސައްކަތަށް ބަންދުކޮށްފައިވާ ޗެނަލްތަކުން ދަތުރުނުކުރުމަށް އަނެއްކާވެސް އެދެފި

މާލެއިން ތިލަފުއްޓާ ހިސާބަށް ގުޅުވާލުމުގެ މަޝްރޫޢާ ގުޅިގެން ބަންދުކޮށްފައިވާ ޗެނަލްތަކުން ދަތުރުކުރުމަކީ ރައްކާތެރިކަމަކަށް ނުވާތީ، އެ ޗެނަލްތައް ބޭނުން ނުކުރުމަށް މިނިސްޓްރީ އޮފް ކޮންސްޓްރަކްޝަން، ހައުސިންގް އެންޑް އިންފްރާސްޓްރަކްޗަރއިން އަނެއްކާ ވެސް އިލްތިމާސްކޮށްފިއެވެ.

އެ މިނިސްޓްރީން ހާމަކޮށްފައިވާ ގޮތުގައި، މި މަޝްރޫޢުގެ މަސައްކަތަށް މާލެ-ވިލިމާލެ ޗެނަލް، ވިލިމާލެ-ގުޅިފަޅު ޗެނަލް އަދި ގުޅިފަޅު-ތިލަފުށި ޗެނަލް ވާނީ ބަންދުކޮށްފައި ކަމަށާއި، އެހެންކަމުން މި ޗެނަލްތަކުން އުޅަނދުފަހަރު ދަތުރުކުރުމަކީ ރައްކާތެރިކަމެއް ނޫންކަމަށެވެ. 

މާލެ-ތިލަފުށި ލިންކް މަޝްރޫޢުގެ މަސައްކަތަށް ގުޅިފަޅު-ތިލަފުށި ޗެނަލް، މާލެ-ވިލިމާލެ އަދި ވިލިމާލެ-ގުޅިފަޅު ޗެނަލްތައް މިހާރުވެސް ވަނީ ބަންދުކުރެވިފައެވެ. އެގޮތުން ކަނޑު އުޅަނދުފަހަރު މި ސަރަހައްދުތަކުން ދަތުރުކުރުން ރައްކާތެރިކަމަކަށް ނުވާތީ، މި ޗެނަލްތަކުން ދަތުރު ނުކުރަން އަދިވެސް އެއްފަހަރު އިލްތިމާސްކުރަމެވެ.

މިނިސްޓްރީ އޮފް ކޮންސްޓްރަކްޝަން، ހައުސިންގް އެންޑް އިންފްރާސްޓްރަކްޗަރއިން ސޯޝަލް މީޑިއާގައިކުރި ޕޯސްޓުގައި ބުނެފައިވެއެވެ.

މި ކޗެނަލްތަކުން ދަތުރުކުރުމަކީ ރައްކާތެރިކަމެއް ނޫންކަމުން، މި ސަރަޙައްދުތަކުން ކަނޑު އުޅަނދުފަހަރު ނުދުއްވުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވެސް މީގެ ކުރިން އިލްތިމާސްކޮށްފައިވެއެވެ. ނަމަވެސް އެ ޗެނަލްތަކުން އަދިވެސް އުޅަނދުފަހަރު ދަތުރުކުރަމުން ގެންދާކަން ފާހަގަކުރެވިފައިވާކަމަށާއި، ވަކިން ޙާއްސަކޮށް ސްޕީޑުބޯޓުފަހަރު މި ޗެނަލްތައް ބޭނުންކުރަމުން ގެންދާކަމަށް އެ މިނިސްޓްރީން ވިދާޅުވެފައިވެއެވެ.

ބްރިޖުގެ މަސައްކަތާ ގުޅިގެން މި ޗެނަލްތަކުގައި ބާޖު އަދި ސެލްޕް އެލެވޭޓަޑް ޕްލެޓްފޯމްތައް އަންނަނީ ބޭނުންކުރަމުންނެވެ. އެހެންކަމުން، މި ތަކެތީގެ ނަގިލި އެޅުމަށް ގިނަ އަދަދެއްގެ ބޮއިތަކާއި ވާތައް އަޅާފައި އޮތުމަކީ، މި ޗެނަލްތައް ބޭނުން ކުރަމުންދާ އުޅަނދުތަކަށް ނުރައްކާތެރި ހާދިސާއެއް ދިމާވުމުގެ ފުރުޞަތު އޮތް ކަމެކެވެ. މި ޗެނަލްތައް ބޭނުން ނުކުރުމަށް ދޭތެރެދޭތެރެއިން ކަމާގުޅުންހުރި އިދާރާތަކުން އިލްތިމާސްކުރަމުން އަންނަނީ މި ސަބަބަށްތަކައެވެ.