މޯލްޑިވިއަންގެ ވައިޑް-ބޮޑީ މަތިންދާބޯޓުން ޗައިނާއަށް ދަތުރުތައް ފަށައިފި

ޤައުމީ އެއަރލައިން، މޯލްޑިވިއަންގެ ވައިޑް-ބޮޑީ މަތިންދާބޯޓުގެ ދަތުރުތައް ޗައިނާއަށް ފަށައިފިއެވެ. އެންމެ ފުރަތަމަ ދަތުރު ފަށާފައިވަނީ ޗައިނާގެ ޗެންޑޫއަށެވެ. މި މަހުގެ 6 ވަނަ ދުވަހު ރާއްޖެ ގެނެވުނު މި ބޯޓުގައި ޗެންޑޫއަށް ކުރި ފުރަތަމަ ދަތުރުގައި 52 ފަސިންޖަރުން ދަތުރުކޮށްފައިވެއެވެ. މީގެ ތެރެއިން 32 މީހުންނަކީ ފަތުރުވެރިންނެވެ.

މޯލްޑިވިއަންގެ ދަތުރުތައް ޗައިނާއަށް ފެށުމާއެކު، އެއަރލައިނުން ވަނީ ޓިކެޓް އަގުހެޔޮ ފެއަރއެއްވެސް ފަށާފައެވެ. މޯލްޑިވިއަން ހޮލިޑޭސްގެ ޖެނެރަލް މެނޭޖަރ ރިޒަވޭޝަން އެންޑް ޓިކެޓިން އައިމިނަތު ސަމީހާ ވިދާޅުވީ، މިވަގުތު މޯލްޑިވިއަންގެ ޓިކެޓުން ކުރިއަށްގެންދާ ފެއަރއިން މާކެޓްގައި ޗައިނާގެ ޓިކެޓްހުރި އަގާއި އަޅާބަލާއިރު 30 އާއި 50 އިންސައްތައާ ދެމެދު އަގު ހެޔޮވެގެންދާނެ ކަމަށެވެ. މިވަގުތު ހަފްތާއަކު 3 ފްލައިޓް އޮންނާނެ ކަމަށް އޭނާ ފާހަގަކުރެއްވިއެވެ.

A moment to remember! Welcoming our passengers for the inaugural flight to Chengdu. ✈️ A new journey begins.#Maldivian #Maldives #China #chengdu pic.twitter.com/9k3tYuPjVf

— MaldivianAero (@MaldivianAero) January 21, 2025

މޯލްޑިވިއަންގެ ކާގޯ ސަރވިސްގެ ސީނިއަރ މެނޭޖަރ ސިވާ ޙަލީމް ވިދާޅުވީ، މި ދަތުރުތަކާއެކު ޗައިނާއިން ރާއްޖެއަށް ކާގޯ ގެނައުމަށް ބޮޑު ފަސޭހައެއް ލިބިގެންދާނެ ކަމަށެވެ. މިއީ ސީދާ ދަތުރުތަކަށް ވުމާއެކު މޭވާއާއި ތަރުކާރީގެ ބާވަތްތައްވެސް ތާޒާކަމާއެކު ގެނައުމުގެ މަގު ފަހިވެގެންދާނެ ކަމަށް އޭނާ ވިދާޅުވިއެވެ.

މޯލްޑިވިއަންގެ ފުރަތަމަ ދަތުރުގައި ޗެންޑޫއަށް ދަތުރުކުރި ޗައިނާގެ ރައްޔިތަކު ބުނީ މޯލްޑިވިއަންއިން މި ފެށި ސީދާ ދަތުރުތަކާއެކު 1 ދުވަހުގެ ދަތުރެއް 6 ގަޑިއިރަށް ކުޑަވެފައިވާ ކަމަށެވެ. މިއީ އެމީހުންނަށް ލިބިގެންދިޔަ ވަރަށް ބޮޑު ފަސޭހައެއްކަން އޭނާ ފާހަގަކުރެއްވިއެވެ.

މޯލްޑިވިއަންގެ ޚިދުމަތަށް ވައިޑް-ބޮޑީ މަތިންދާ ބޯޓު ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަންނަ އޮކްޓޯބަރ މަހުގެ ތެރޭގައި އިތުރު ވައިޑް-ބޮޑީ މަތިންދާބޯޓެއް ރާއްޖެ ގެނެސް ޔޫރަޕަށް ދަތުރު ފެށުމަށް ޤައުމީ އެއަރލައިނުން ދަނީ ތައްޔާރުވަމުންނެވެ.