ބްރޯޑްކާސްޓިންގ ކޮމިޝަންގެ މެމްބަރުކަމަށް މުޙައްމަދު ޢަބްދުﷲ އާއި ޞަރާޙަތު އައްޔަންކޮށްފި

މޯލްޑިވްސް ބްރޯޑްކާސްޓިންގ ކޮމިޝަނުގެ މެންބަރުކަމުގެ މަޤާމަށް އެ ކޮމިޝަނުގެ ކުރީގެ މެންބަރު، އަލްއުސްތާޛާ އާމިނަތު ޞަރާޙަތު ޢިއްޒަތާއި ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުޙައްމަދު އަބްދުﷲ ހޯމަ ދުވަހު އައްޔަންކޮށްފިއެވެ.

މޯލްޑިވްސް ބްރޯޑްކާސްޓިންގ ކޮމިޝަނުން މަޢުލޫމާތު ދެއްވިގޮތުގައި، މި ދެ ބޭފުޅުން މަޤާމަށް އައްޔަންކުރުމަށް ރައްޔިތުންގެ މަޖިލީހުން ރުހުން ދީފައިވަނީ މިދިޔަ ބުރާސްފަތި ދުވަހުއެވެ. މަޖިލީހުގެ ވޯޓުގައި، ޞަރާޙަތު ޢިއްޒަތު ކޮމިޝަންގެ މެންބަރުކަމަށް އައްޔަންކުރަން ފާސްވެފައިވަނީ 68 މެންބަރުންގެ ވޯޓުން ކަމަށާއި، މުޙައްމަދު އަބްދުﷲ އައްޔަންކުރަން ފާސްވެފައިވަނީ 58 މެންބަރުންގެ ވޯޓުން ކަމަށް ވެއެވެ.

ބްރޯޑްކާސްޓިންގ ކޮމިޝަނުގެ މި ދެ މަޤާމު ހުސްވެފައިވަނީ އެ ކޮމިޝަންގެ ރައީސާއަކަށް ހުންނެވި މަރިޔަމް ވަހީދާއާއި މެންބަރު އަލީ ޔޫސުފްގެ ދައުރު މިދިޔަ ޑިސެންބަރު މަހުގެ ފަހުކޮޅު ހަމަވުމާ ގުޅިގެންނެވެ. މި ދެ މަޤާމަށް ކުރިމަތިލުމުގެ ފުރުޞަތު ހުޅުވާލުމުން ޖުމްލަ 12 ފަރާތަކުން ކުރިމަތިލާފައިވެއެވެ.