ޚަބަރު
ސްކޫލުތަކުގައި ހަކަތަ ބޭނުންކުރުން އިތުރަށް ހަރުދަނާކުރުމަށް އަމާޒުކޮށް އައު އުސޫލުތަކެއް އެކުލަވާލަނީ

ސްކޫލުތަކުގައި ހަކަތަ ބޭނުންކުރުން އިތުރަށް ހަރުދަނާކުރުމަށް އަމާޒުކޮށް ބޭއްވުނު ބައްދަލުވުން ފޮޓޯ:ވުޒާރާ
މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ (އެމްސީސީއީއީ) އާއި ޔޫއެސްއެއިޑްގެ ސައުތު އޭޝިއާ ރީޖަނަލް އެނަރޖީ ޕާޓްނަރޝިޕް (ސާރެޕް) ގުޅިގެން ސްކޫލުތަކުގައި ހަކަތަ މެނޭޖްކުރުމުގެ އުސޫލު އެކުލަވާލުމަށް މަޝްވަރާ ބައްދަލުވުމެއް ބާއްވައިފިއެވެ.
މި އުސޫލުތައް އަމާޒުކުރެވެނީ ސްކޫލު އެޑްމިނިސްޓްރޭޓަރުން، މެއިންޓެނަންސް މުވައްޒަފުން، މުދައްރިސުން އަދި ދަރިވަރުންނަށެވެ. މިއުސޫލުގައި ހިމެނޭނީ ސްކޫލުތަކުގައި ހަކަތަ ބޭނުންކުރުން ހަރުދަނާކުރުމުގެ އުސޫލުތަކާއި، ތިމާވެށްޓަށް ކުރާ އަސަރު ކުޑަކުރުމާއި، ހޫނުމިނާއި ވައި ސާފުކުރުން ރަނގަޅުކުރުމުގެ މަގުތަކެވެ. މީގެ އިތުރުން ސްކޫލުތަކުގައި ހަކަތަ ބޭނުންކުރުމުގައި ހަރުދަނާ އުސޫލުތައް ގެންގުޅުމަށް ޢަމަލީގޮތުން ކުރެވިދާނެ ކަންކަން ވެސް ހިމެނޭނެއެވެ.
މަޝްވަރާ ބައްދަލުވުމުގައި ވާހަކަފުޅު ދައްކަވަމުން އެމްސީސީއީއީގެ ސްޓޭޓް މިނިސްޓަރ ޑރ. މުއާވިޔަތު މުޙައްމަދު ވިދާޅުވީ ސްކޫލުތަކަކީ ހަމައެކަނި ތަޢުލީމު ދޭ ތަންތަން ނޫން ކަމަށާއި، ދެމެހެއްޓެނިވި ގޮތެއްގައި ދިރިއުޅުމުގެ ސަގާފަތެއް އާލާކުރުމުގައި މުހިންމު ދައުރެއް އަދާކުރާ ތަންތަން ކަމަށެވެ. އަދި މި އުސޫލުތަކުގެ ސަބަބުން ސްކޫލުތަކަށް ތިމާވެށްޓަށް ކުރާ އަސަރު ކުޑަކުރުމުގައި ނަމޫނާ ދެއްކޭނެ ކަމަށް ވެސް ވިދާޅުވިއެވެ.
މި ބައްދަލުވުމުގައި ޔޫއެސްއެއިޑް/އިންޑިއާގެ އިންޑޯ ޕެސިފިކް އޮފީހުގެ ޑިރެކްޓަރ އެރަން ޝޫބަރޓް އާއި ސީނިއަރ ރީޖަނަލް ކްލީން އެނަރޖީ ސްޕެޝަލިސްޓް އަޕޫރްވާ ޗަތުރްވެދީ އާއި އެހެނިހެން އިސް ބޭފުޅުން ބައިވެރިވެ ވަޑައިގަތެވެ.
މީގެ އިތުރުން މިނިސްޓްރީގެ އެނަރޖީ ޑިޕާޓްމަންޓާއި، ޔުޓިލިޓީ ރެގިއުލޭޓަރީ އޮތޯރިޓީ، މިނިސްޓްރީ އޮފް އެޑިޔުކޭޝަން، އެސޯސިއޭޝަން އޮފް މޯލްޑިވިއަން ޕްލޭނަރސް އަދި ސާރެޕްގެ މާހިރުން މި ބައްދަލުވުމުގައި ބައިވެރިވެ އެ ފަރާތްތަކުގެ ޚިޔާލު ހުށަހެޅިއެވެ. މި ބައްދަލުވުމުން ލިބުނު މަޢުލޫމާތުގެ އަލީގައި ރާއްޖޭގެ ސްކޫލުތަކުގެ ޚާއްޞަ ބޭނުންތަކަށް އަމާޒުކޮށް އުސޫލުތައް އިތުރަށް ފުރިހަމަކުރެވޭނެ ކަމަށް ބެލެވެއެވެ.