ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ ސްކޫލެއް އޭސީކޮށް ނިންމަވާނެ ކަމުގެ ޔަޤީންކަން ރައީސް ދެއްވައިފި

މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ ސްކޫލުތަކެއް އޭސީކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ، ރ.ހުޅުދުއްފާރު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

ރާއްޖޭގެ ހުިރިހާ ސްކޫލުތައް ފިނިކުރުމަށް ރައީސުލްޖުމްހޫރިއްޔާ ވަނީ ޚާއްޞަ މަޝްރޫޢެއް ފަށައިފައެވެ. ރައީސް ވިދާޅުވީ، މި މަސައްކަތް ކުރިއަށް ދާނީ އިޢާދަކުރަނިވި ހަކަތައިގެ ނިޒާމު ބޭނުންކޮށްގެން ކަމަށެވެ. އަދި،  މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ ސްކޫލެއްގައި މި މަސައްކަތް ނިންމަވައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ. 

ރައީސް ވިދާޅުވީ، ހޫނުގަދަ ރަށްރަށުގައި ސްކޫލުތައް ފިނިކުރުމަކީ ކޮންމެހެންވެސް ކުރަންޖެހޭ މުހިންމު މަސައްކަތެއް ކަމަށެވެ. ހަމަ އެއާއެކު، މިކަމަށް ޚާއްޞަކޮށް ފައްޓަވާފައިވާ މަޝްރޫޢަށް ބޮޑު ކުރިއެރުމެއް ލިބިފައިވާކަން ރައީސްގެ ވާހަކާގައި ވަނީ ފާހަގަކުރައްވާފައެވެ. ރައީސް ވިދާޅުވީ، މި މަޝްރޫޢު މިއަހަރުގެ ސެޕްޓެމްބަރު މަހުގެ ކުރިން ނިންމެވުމަށް މަސައްކަތް ކުރައްވަމުން ގެންދަވާކަމަށެވެ. 

ރައީސްގެ ވާހަކަފުޅުގައި ވަނީ ތަޢުލީމު ހޯދާ ދަރިވަރުންނަށް ހިތްހަމަޖެހޭ މާޙައުލެއް ހޯދައިދިނުމުގެ މުހިންމުކަމަށް އަލިއަޅުވާލާފައެވެ. އެމަނިކުފާނު ވިދާޅުވީ، ޤައުމު ތަރައްޤީ ކުރެވޭނީ ޒުވާން ކުދިންނަށް ތަޢުލީމާއި ތަރުބިއްޔަތު ދީގެން ކަމަށެވެ. އެހެންކަމުން އެކަން ކުރުމަށްޓަކައި ބޭނުންވާ ވަޞީލަތްތައް ހޯއްދަވާދެއްވާނެ ކަމަށް އެމަނިކުފާނު ވިދާޅުވިއެވެ. އަދި، ތަޢުލީމީ ދާއިރާ ހަރުދަނާ ކުރެއްވުމަށް ވަރަށް ގިނަ މަސައްކަތްތައް ކުރައްވާނެ ކަމަށް ރައީސް ހާމަކުރެއްވިއެވެ.  

ތަޢުލީމީ ދާއިރާގެ މަސައްކަތްތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ މަސައްކަތްތަކެކެވެ.