ޚަބަރު
ރާއްޖޭގެ އެކި ހިސާބުތަކަށް ކުރިއަށް އޮތް ތިންދުވަހު މޫސުން ގޯސްވާނެ ކަމަށް ލަފާކޮށްފި

ރާއްޖެއަށް ވިއްސާރަ ދުވަހެއް ފޮޓޯ: ފައިނޭންޝަލް ރިވިއު
ކުރިއަށް އޮތް 3 ދުވަހުވެސް ރާއްޖޭގެ އެކި ހިސާބުތަކަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ. އެއިދާރާއިން ދެއްވި މަޢުލޫމާތުގައިވާ ގޮތުން، މިއަދުވެސް ދެކުނުގެ ރަށްތަކަށް މޫސުން ގޯސްވާނެއެވެ. އަދި ދެކުނާއި މެދުރާއްޖެތެރޭގެ ރަށްތަކަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށް ވިދާޅުވިއެވެ.
އުތުރުގެ ރަށްތަކަށްވެސް ކެރީގެ އަސަރު ފޯރާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެފައިވެއެވެ. ވޭތުވެދިޔަ 24 ގަޑިއިރަށް ބަލާއިރު، އެންމެ ގިނައިން ވާރޭ ވެހިފައިވަނީ ސ. ގަމަށް ކަމަށާއި، އެއީ 43.1 މިލިމީޓަރުގެ ވާރޭ ކަމަށް އެ އިދާރާއިން ހާމަކުރެއްވިއެވެ.
މޫސުމާ ބެހޭ ޤައުމީ އިދާރާއިން އިތުރަށް ވިދާޅުވީ، ރާއްޖޭގެ ކަނޑުތައް އާދައިގެ ވަރަކަށް މަޑުވެފައި، ވިލާގަނޑުގައި އާދައިގެ ވަރަކަށް ގަދަވާނެ ކަމަށެވެ. އަދި އުތުރާއި އިރުއުތުރުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާކަމަށް ލަފާކުރެވޭ ކަމަށެވެ.
ރާއްޖެއަށް މިހާރު ކުރަމުންދާ ވިއްސާރައަކީ ސްރީލަންކާގެ އިރު ދެކުނުގައި އުފެދިފައިވާ ސާކިއުލޭޝަނެއްގެ ސަބަބުން ކުރަމުންދާ ވިއްސާރައެއްކަމަށް މޫސުމާ ބެހޭ އިދާރާއިން ވިދާޅުވެފައިވެއެވެ. އަދި މި ވިއްސާރަ އަލިވާނެކަމަށް ލަފާކުރެވެނީ އަންނަ ހޮނިހިރު ދުވަހު ކަމަށްވެސް އެ އިދާރާއިން ވިދާޅުވިއެވެ.
މި ވިއްސާރައިގެ ސަބަބުން ރާއްޖޭގެ އެކި ހިސާބުތަކުގައި ދަތުރުފަތުރު ކުރުމުގައި ސަމާލުވުމަށް އާންމުންނަށް އިލްތިމާސް ކުރައްވާފައިވެއެވެ. އަދި ކަނޑުމަތީގައި ދަތުރުކުރާ ފަރާތްތަކުން މޫސުމުގެ މަޢުލޫމާތު ބަލައި، ރައްކާތެރިކަމުގެ ފިޔަވަޅުތައް އެޅުމަށް އިރުޝާދު ދެއްވާފައިވެއެވެ.