ކުޑަކުދިން ކުށުގެ މާހައުލަށް ހުށަހެޅޭ ސަބަބުތައް ދެނެގަތުމަށް ދިރާސާއެއް ހަދަނީ

ކުޑަކުދިން ކުށުގެ މާހައުލަށް ހުށަހެޅި ކުށްތަކަށް އަރައިގަތުމަށް މެދުވެރިވާ ސަބަބުތައް ހޯދުމަށް ދިރާސާއެއް ހަދަން ނިންމައިފައިވާކަމަށް ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން ވިދާޅުވެއްޖެއެވެ.

މި ދިރާސާއާ ގުޅޭ މަޢުލޫމާތު ހިއްސާކުރައްވަމުން، އެ ވުޒާރާއިން ވިދާޅުވީ ކުޑަކުދިން ކުށުގެ މާހައުލަށް ހުށަހެޅޭ މައްސަލަތައް ދެނެގަނެ، އެކަމުގައި ރާއްޖޭގެ ހާލަތު މިހާތަނަށް ދެނެގަނެވިފައި ނެތްކަމަށެވެ. އަދި ސައިންޓިފިކް ގޮތުން މިކަމާ ގުޅޭ ދިރާސާއެއްވެސް ހެދިފައި ނުވާކަމަށް އެ ވުޒާރާއިން ފާހަގަކުރެއްވިއެވެ.

މި ދިރާސާގެ މައިގަނޑު މަޤްޞަދަކީ މުޖުތަމަޢުގައި ހިމެނޭ ކުޑަކުދިން ކުށުގެ މާހައުލުން ސަލާމަތްކުރުމާއި، މުޖުތަމަޢުގައި މިފަދަ ކަންކަމަށް މަގުފަހިވާ ކަންކަން ދކަން ދެނެގަނެ އެކަމަށް ފިޔަވަޅު އެޅުންކަމަށް އެ ވުޒާރާއިން ވިދާޅުވިއެވެ. މި ދިރާސާގައި ކުޑަކުދިން ކުށުގެ މާހައުލަށް ހުށަހެޅެނީ ކީއްވެކަމާއި، އެ ކުދިން އެ ހިސާބަށް ދަނީ ކީއްވެކަމާއި، އަދި ކުޑަކުދިންގެ ތެރޭގައި އެންމެ ޓްރެންޑްވަނީ ކޮން ކަމެއްކަން ދެނެގަންނާނެކަމަށް އެ ވުޒާރާއިން ވިދާޅުވިއެވެ.

ދިރާސާ ހެދުމަށް ފަންޑު ހޯދުމަށް ޔުނިސެފްއާއެކު މަޝްވަރާކުރަމުންދާކަމަށާއި، މި ދިރާސާ ހެދުމުގެ މަސައްކަތް ކުރިއަށް ގެންދާނީ ދިވެހިރާއްޖޭގެ އިސްލާމީ ޔުނިވަރސިޓީއާ ގުޅިގެންކަމަށް އެ ވުޒާރާއިން ވިދާޅުވިއެވެ. މިއީ މުޅި ރާއްޖެއަށް އަމާޒުކޮށްގެން ކުރިއަށް ގެންދާ ދިރާސާއެއްކަމަށާއި، މި ދިރާސާ މާރިޗު މަހުގެ ތެރޭގައި ފަށައި މި އަހަރުގެ ނޮވެމްބަރު މަހަށް ނިންމާލުމަކީ އުއްމީދެއްކަމަށްވެސް އެ ވުޒާރާއިން ވިދާޅުވިއެވެ.

މީގެ އިތުރުން، ކުށުގެ މާހައުލަށް ހުށަހެޅޭ ކުޑަކުދިން ރީހެބިލިޓޭޓްކުރުމަށްޓަކައި ޚާއްޞަ ފެސިލިޓީއެއް ހެދުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ. ސަރުކާރުން ވަނީ ޒިންމާ ނަގަންޖެހޭ އުމުރު 12 އަހަރަށް ކުޑަކުރުމާއެކު، 12 އަހަރުގައި ކުށަށް އަރައިގަންނަ ކުދިންވެސް ރީހެބިލިޓޭޓްކުރުމަށް "ހޯޕް އައިލެންޑް" ގެ ނަމުގައި ދަރަވަންދޫގައި ތަނެއް ތަރައްޤީކުރުމުގެ މަސައްކަތް ފަށާފައެވެ.