އޯޕަން އޭއައި އާއި އޮރަކަލް އަދި ސޮފްޓްބޭންކް ގުޅިގެން 100 ބިލިއަން ޑޮލަރުގެ އޭއައި ޑޭޓާ ސެންޓަރު އިންވެސްޓްމަންޓެއް ފަށަނީ

ވައިޓް ހައުސްގައި ބޭއްވުނު ޚާއްޞަ ރަސްމިއްޔާތެއްގައި އެމެރިކާގެ ރައީސް ޑޮނަލްޑް ޓްރަމްޕް ވަނީ އޯޕަން އޭއައި އާއި އޮރަކަލް އަދި ސޮފްޓްބޭންކް ގުޅިގެން 100 ބިލިއަން ޑޮލަރުގެ އާޓިފިޝަލް އިންޓެލިޖެންސް (އޭއައި) ޑޭޓާ ސެންޓަރު އިންވެސްޓްމަންޓެއް ފަށާ ވާހަކަ އިއުލާނު ކުރައްވާފައެވެ. 

"ސްޓާގޭޓް" ގެ ނަމުގައި ކުރިއަށްގެންދާ މި މަޝްރޫއުގެ ދަށުން ކުރިއަށް އޮތް 4 އަހަރު ތެރޭގައި 500 ބިލިއަން ޑޮލަރު އިންވެސްޓް ކުރުމަށް ވަނީ ރޭވިފައެވެ. އޯޕަން އޭއައިގެ ސީއީއޯ ސޭމް އޯލްޓްމަން ވިދާޅުވި ގޮތުގައި މިއީ "މި ޒަމާނުގެ އެންމެ މުހިންމު މަޝްރޫއު" އެވެ.

މި މަޝްރޫއުގެ ދަށުން އޭއައި އިންފްރާސްޓްރަކްޗަރ ތަރައްޤީ ކުރުމަށްޓަކައި ޑޭޓާ ސެންޓަރުތައް އިމާރާތް ކުރެވޭނެއެވެ. އަދި މީގެ ސަބަބުން 100،000 އަށްވުރެ ގިނަ ވަޒީފާގެ ފުރުސަތު އުފެދޭނެ ކަމަށް ރައީސް ޓްރަމްޕް ވިދާޅުވިއެވެ. އޮރަކަލްގެ ޗީފް ޓެކްނޮލޮޖީ އޮފިސަރ ލެރީ އެލިސަން ވިދަން ވިދާޅުވި ގޮތުގައި ފުރަތަމަ ޑޭޓާ ސެންޓަރުތައް ޓެކްސާސްގައި އިމާރާތް ކުރަމުންދާއިރު، އިތުރު ތަންތަނުގައިވެސް ޑޭޓާ ސެންޓަރުތައް އިމާރާތް ކުރެވޭނެއެވެ.

މި މަޝްރޫއުގައި ޔޫއޭއީގެ އެމްޖީއެކްސް އިންވެސްޓަރުންގެ އިތުރުން މައިކްރޯސޮފްޓް، އާމް އަދި އެންވިޑިއާ ފަދަ ޓެކް ކުންފުނިތައްވެސް ބައިވެރިވެއެވެ. މި މަޝްރޫއަކީ އެއް އަހަރަށްވުރެ ގިނަ ދުވަހުގެ މަޝްވަރާތަކަކަށްފަހު ކުރިއަށް ގެންދިއުމަށް ނިންމާފައިވާ މަޝްރޫއެއް ކަމަށް އޯޕަން އޭއައިއިން ބުނެއެވެ.

އޭއައި ދާއިރާގެ ކުރިއެރުމާއެކު، ޑޭޓާ ސެންޓަރުތަކަށް ބޭނުންވާ ހަކަތައިގެ މިންވަރު އިތުރުވެ، އިމާރާތް ކުރުމަށް ބޭނުންވާ ފައިސާގެ އަދަދު ބޮޑުވުމާ ގުޅިގެން، ހަކަތައިގެ ފޯރުކޮށްދިނުމަށް ކުރާނެ އަސަރާއި، ބޭރުގެ އިންވެސްޓަރުންގެ ދައުރާ ގުޅޭގޮތުން ކަންބޮޑުވުންތަކެއް ފާޅުކުރެވެމުންދެއެވެ. ނަމަވެސް، މި ދާއިރާގައި މިފަދަ ބޮޑެތި އިންވެސްޓްމަންޓްތައް ކުރުމަކީ އާކަމެއް ނޫނެވެ. މިސާލަކަށް މައިކްރޯސޮފްޓްއިން މި އަހަރު އޭއައި ޑޭޓާ ސެންޓަރުތައް ތަރައްޤީކުރުމަށް 80 ބިލިއަން ޑޮލަރު އިންވެސްޓް ކުރާނެ ކަމަށް ބުނެފައިވެއެވެ. އަދި އެމެޒޯންއިން ވެސް ފާއިތުވި ދެ މަހުގެ ތެރޭގައި 10 ބިލިއަން ޑޮލަރުގެ ދެ މަޝްރޫއު އިއުލާނުކޮށްފައިވެއެވެ.

މެކިންޒީގެ ރިޕޯޓެއްގައި ބުނެފައިވާ ގޮތުގައި 2030 ވަނަ އަހަރާ ހަމައަށް ޑޭޓާ ސެންޓަރުތަކަށް ބޭނުންވާ ޖާގައިގެ މިންވަރު ތިން ގުނައަށްވުރެ އިތުރުވާނެއެވެ. އަދި މި ޑިމާންޑް ފުއްދުމަށްޓަކައި 2000 ވަނަ އަހަރުން ފެށިގެން މިހާތަނަށް އިމާރާތްކޮށްފައިވާ މިންވަރުގެ ދެ ގުނަ ޖާގަ 2030 ވަނަ އަހަރާ ހަމައަށް އިތުރުކުރަން ޖެހޭނެ ކަމަށް ލަފާކުރެވެއެވެ.

ނަމަވެސް، ތަޙުލީލުވެރިން ވިދާޅުވާ ގޮތުގައި މި މަސައްކަތް ކުރިއަށް ގެންދިއުމުގައި ބިމާއި ހަކަތައިގެ މައްސަލަތަކާއި، ހުއްދަ ހޯދުމުގެ މައްސަލަތަކާ ކުރިމަތިވުމަކީ އެކަށީގެންވާ ކަމެކެވެ.

މި މަޝްރޫއަކީ އެމެރިކާގެ ކުރީގެ ރައީސް ޖޯ ބައިޑަންގެ ވެރިކަމުގެ ދުވަސްވަރު ފަށައިގަނެވުނު މަޝްރޫއެއް ކަމަށްވާއިރު، ރައީސް ބައިޑަން ވަނީ އޭއައި އާ ގުޅުންހުރި ޗިޕްތައް ބޭރު ގައުމުތަކަށް އެކްސްޕޯޓް ކުރުމާ ގުޅޭ ގަވާއިދުތަކެއް ތައާރަފުކުރައްވާފައެވެ. އަދި ސަރުކާރުގެ ބިންތަކުގައި ޑޭޓާ ސެންޓަރުތައް އިމާރާތްކުރުމާ ގުޅޭ އަމުރުތަކެއްވެސް ނެރުއްވާފައިވެއެވެ. މި އަމުރުތަކުގައި ޑޭޓާ ސެންޓަރުތަކަށް ހަކަތަ ފޯރުކޮށްދިނުމުގައި ސާފު ހަކަތައަށް އިސްކަންދިނުމަށް އަންގަވާފައިވެއެވެ.