ކުޅިވަރު

ފްރާންސްގެ ލިލް ބަލިކުރުމަށްފަހު ޗެމްޕިއަންސް ލީގުގެ ގަދަ-16 އިން ލިވަޕޫލް ޖާގަ ހޯދައިފި

ފްރާންސްގެ ލިލް ބަލިކުރުމަށްފަހު ޗެމްޕިއަންސް ލީގުގެ ގަދަ-16 އިން ލިވަޕޫލް ޖާގަ ހޯދައިފި

ލިވަޕޫލުގެ ފުރަތަމަ ގޯލު ސަލާޙް ކާމިޔާބުކުރަނީ، ފޮޓޯ: ބީބީސީ ސްޕޯޓްސް

މިފްތާޙް މުޙައްމަދު

މިފްތާޙް މުޙައްމަދު

22 ޖެނުއަރީ 2025، 02:14

22 ޖެނުއަރީ 2025، 02:14

ހުލާސާ

ލިވަޕޫލުން ލީޑު ނެގީ މުޙައްމަދު ޞަލާޙް ޗެމްޕިއަންސް ލީގުގައި ކާމިޔާބުކުރި 50ވަނަ ގޯލާއެކު.

މި ސީޒަންގެ ޗެމްޕިއަންސް ލީގުގައި ކުޅުނު ހުރިހާ މެޗެއް ލިވަޕޫލުން މިވަނީ ކާމިޔާބުކޮށްފައި.

ފްރެންޗު ލީގުގެ ހަތަރުވަނައިގައި އޮތް ލިލް އޮލިމްޕިކް ސްޕޯޓިންގް ކްލަބް (ލިލް) 2-1 އިން ބަލިކުރުމަށްފަހު، ލިވަޕޫލުން ޗެމްޕިއަންސް ލީގުގެ ގަދަ-16ގެ ޖާގައެއް ޔަޤީންކޮށްފިއެވެ.

ބަލިނުވެ 21 މެޗު ހަމަކުރުމަށްފަހު ރޭ ލިވަޕޫލާ ދެކޮޅަށް ނިކުތް ލިލް އިން ވަނީ، ލިވަޕޫލަށް ގޯލެއް ކާމިޔާބު ކުރެވުމާ ހިސާބަށް، މެޗުގެ ކޮންޓްރޯލް ނަގައިގެން ރަގަޅަށް ކުޅެފައެވެ.

އެންފީލްޑްގައި ކުޅުނު މި މެޗުގައި ލިވަޕޫލުން ލީޑު ނެގީ މުޙައްމަދު ޞަލާޙް ޗެމްޕިއަންސް ލީގުގައި ކާމިޔާބުކުރި 50ވަނަ ގޯލާއެކުއެވެ. ކާޓިސް ޖޯންސްގެ ތުރޫ ޕާހަކުން މެޗުގެ 34ވަނަ މިނެޓުގައި ޞަލާޙް މި ގޯލު ކާމިޔާބުކުރީ، ލިލްގެ ގޯލްކީޕަރ ލޫކަސް ޝަވެލިއަރ ކައިރިން ނައްޓާލުމަށްފަހުއެވެ.

އޭގެ ފަހުން ޞަލާޙްއަށް ކީޕަރާއެކު ލިބުނު ވަން-އޮން-ވަން ފުރުސަތެއް ނާކާމިޔާބުވުމުގެ އިތުރުން، ގޯލުގެ ދުރުކަނަށް އޮޅާލި ބޯޅައެއްވެސް ވެސް ވަނީ އަމާޒުނުވެ ގޮސްފައެވެ.

ލިލްއަށް މެޗުގެ ނަތީޖާ އަނބުރާލުމަށް އުނދަގޫވީ، ދެވަނަ ހާފުގައި އެ ޓީމުގެ ފަހަތަށް ކުޅޭ، އައިއްސަ މަންޑީއަށް ދެވަނަ ރީނދޫ ކާޑަކާއެކު ރަތްކާޑެއް ދެއްކުމުންނެވެ. އޭނާއަށް ފުރަތަމަ ރީނދޫ ކާޑު ދެއްކީ ފުރަތަމަ ހާފުގައި ފައުލެއް ހޯދުމަށް ޝަކުވާ ކުރުމުންނެވެ. އަދި މެޗުގެ 59ވަނަ މިނެޓުގައި ދެވަނަ ކާޑު ދެއްކީ ލުއިޒް ދިއާޒަށް ކުރި ފައުލަކަށެވެ.

ނަމަވެސް ހައިރާންކަން ގެނުވީ، އޭގެ ތިން މިނެޓު ފަހުން ލިލް އިން މެޗުގެ ނަތީޖާ ހަމަހަމަކުރުމުންނެވެ. އެ ޓީމުގެ އެޓޭކިންގް މިޑްފީލްޑަރަކަށް ކުޅެމުން އަންނަ ހަކޮން ހަރަލްޑްސަން ފޮނުވާލި ޝޮޓެއް ބްލޮކްވެފައި ނިކުތުމުން ގޯލަށް ފޮނުވާލީ، ފޯވާޑް ޖޮނަތަން ޑޭވިޑެވެ. 

ގޯލެއް ކާމިޔާބު ކުރެވުނު ނަމަވެސް، މި ނަތީޖާއާއެކު ލިލްއަށް ހިފަހައްޓައިލެވުނީ ފަސް މިނެޓެވެ. ލިވަޕޫލަށް ލިބުނު ކޯނަރެއްގައި، އެ ޓީމަށް އަނބުރާ ލީޑު ނަގައިދިނީ، ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ހާވީ އެލިއޮޓްއެވެ.

ލީގުގައި އެންމެ ފަހުން ކުޅުނު މެޗުގެ އިތުރު ވަގުތު ކާމިޔާބުކުރި ދެ ގޯލާއެކު ލިވަޕޫލް މޮޅުކޮށްދިން ޑާވިން ނުނޭޒް ވަނީ މި މެޗުގެ އިތުރު ވަގުތުގައި ވެސް ގޯލެއް ކާމިޔާބުކޮށްފައެވެ. ނަމަވެސް ރެފްރީ ވަނީ އެ ގޯލު އޮފްސައިޑްކަމަށް ނިންމާފައެވެ.

މި ސީޒަންގެ ޗެމްޕިއަންސް ލީގުގައި ކުޅުނު ހުރިހާ މެޗެއް ލިވަޕޫލުން މިވަނީ ކާމިޔާބުކޮށްފައެވެ. އެހެންކަމުން އެ ޓީމު އޮތީ ޗެމްޕިއަންސް ލީގުގެ ލީގު-ފޭސްގެ އެއްވަނައިގައެވެ.

މި ލިޔުން ކިޔާލުމުން

Ads by MSS