ޗެމްޕިއަންސް ލީގު: އިތުރު ވަގުތު ރަފީނިއާ ކާމިޔާބުކުރި ގޯލުން ބެންފީކާ މާޔޫސްކޮށްލައިފި

މެޗުގެ ފުރަތަމަ 30 މިނެޓުގެ ތެރޭގައި ތިން ގޯލު ކާމިޔާބު ކުރުމަށްފަހު، ބާސެލޯނާ ބަލިކުރުމަށް މަސައްކަތް ކުރަމުންދިޔަ ޕޯޗުގަލްގެ ބެންފީކާކޮޅަށް އިތުރު ވަގުތުގައި ރަފީނިއާ ކާމިޔާބުކުރި ގޯލުން އެ ޓީމު މާޔޫސްކޮށްލައިފިއެވެ. ރަފީނިއާގެ ގޯލުން 5-4 އިން ބެންފީކާ ބަލިވީ، މެޗު ނިމެން ހަތަރު މިނެޓާ ހަމައަށް ލީޑުގައި އޮތުމަށްފަހުއެވެ.

ބެންފީކާގެ ގްރީސްއަށް ނިސްބަތްވާ ފޯވާޑް، ވަންޖީލޭސް ޕާވްލީޑޭޒް 30 މިނެޓުގެ ތެރޭގައި ހެޓްރިކެއް ހެދިއިރު، މީގެ ތެރެއިން ދެ ގޯލަކީ، ބާސެލޯނާގެ ގޯލްކީޕަރ، ވޮޒިއެކް ސެޒްނީއަށް ހެދުނު ގޯސްތަކުން ކާމިޔާބުކުރި ގޯލުތަކެކެވެ. މި ވަގުތުގެ ތެރޭގައި ބާސެލޯނާއަށް ލިބުނު ޕެނަލްޓީއަކުން އެ ޓީމުގެ ފޯވާޑް، ރޮބަޓް ލެވަންޑޯސްކީ ވަނީ ގޯލެއް ކާމިޔާބުކޮށްފައެވެ.

އަދި ފަހު ހާފުގައި ބެންފީކާގެ ލީޑު ރަފީނިއާ ކުޑަކޮށްފައި ވަނިކޮށް، އެ ޓީމުގެ ފަހަތަށް ކުޅޭ ރޮނާލްޑް އަރައޫހޯ އަތުން ބައިކޮޅަށް ވަތް ގޯލަކުން ބެންފީކާއަށް އަނެއްކާވެސް ދެ ގޯލުގެ ލީޑެއް ލިބުނެވެ. ނަމަވެސް އޭގެ ފަހުން އިތުރު ޕެނަލްޓީއަކުން ލެވަންޑޯސްކީ ވަނީ ބެންފީކާގެ ލީޑު އަނެއްކާވެސް ހަނިކޮށްފައެވެ.

އެގޮތުން ބެންފީކާއިން 4-3ގެ ލީޑެއްގައި މެޗު ނިންމާލަން ދަނިކޮށް، މެޗުގައި ދެވަނަ ފަހަރަށް ބާސެލޯނާއަށް ނަތީޖާ ހަމަހަމަކޮށްދިނީ، މެޗު ނިމެން ހަތަރު މިނެޓަށްވެފައި ވަނިކޮށް ބަދަލު ކުޅުންތެރިއެއްގެ ގޮތުގައި ނިކުތް އެރިކް ގާސިއާއެވެ. 

އޭގެފަހުން ބެންފީކާގެ އޭންގްހެލް ޑިމާރިއާގެ ނުރައްކާތެރި ހަމަލާއަކުން ބެންފީކާ ލީޑު ނަގަން މަސައްކަތް ކުރިއެވެ. ނަމަވެސް ސެޒްނީ ވަނީ ހުޝިޔާރުކަމާއެކު އެ ހަމަލާ ދިފާއުކޮށްފައެވެ.

ނަތީޖާއަކަށްވީ މެޗުގެ 96ވަނަ މިނެޓުގައި ރަފީނިއާ ކާމިޔާބުކުރި ގޯލަކުން، ބާސެލޯނާއަށް މެޗުކާމިޔާބުކުރެވި، އެ ޓީމު ޗެމްޕިއަންސް ލީގުގެ ގަދަ-16 ޔަގީންކުރުމެވެ. 

ބާސެލޯނާ ކުޅުނު 7 މެޗުން 18 ޕޮއިންޓު ލިބިފައިވާއިރު، އެ ޓީމު އޮތީ ލީގު-ފޭސްގެ ދެވަނައިގައެވެ. އަދި ބެންފީކާ އޮތީ 10 ޕޮއިންޓާއެކު ލީގު-ފޭސްގެ 18ވަނައިގައެވެ.