ރަސްމާދޫގައި ކައުންސިލް އިދާރާއެއް ބިނާކުރުމުގެ ބިންގާ އަޅައިފި

ރަސްމާދޫ ކައުންސިލަށް ދިމާވެފައިވާ ޖާގައިގެ ދަތިކަން ޙައްލުކުރުމުގެ ގޮތުން، އެ ރަށުގައި ކައުންސިލް އިދާރާއެއް ބިނާކުރުމުގެ ބިންގާ ބުދަ ދުވަހު އަޅައިފިއެވެ.

އައު ކަންސިލް އިދާރާއެއްގެ ބިންގާ އެ ރަށުގައި އަޅާފައި މިވަނީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރ. އަތޮޅުގެ ބައެއް ރަށްރަށަށް ކުރައްވަމުންގެނަދަވާ ދަތުރުފުޅުގެ ތެރެއިން، ރަސްމާދޫއަށް ވަޑައިގެން ބޭއްވި ޙާއްސަ ރަސްމިއްޔާތުގައެވެ.

ރައީސުލްޖުމްހޫރިއްޔާ ބައިވެރިވެ ވަޑައިގެންނެވި މި ރަސްމިއްޔާތުގައި އެ އިމާރާތުގެ ބިންގާ އަޅުއްވާދެއްވީ، ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު ޢާދަމް ޝަރީފް ޢުމަރާއި، ރަސްމާދޫ ކައުންސިލުގެ ރައީސް މުޙައްމަދު ޢާޞިފެވެ. 

ރައީސުލްޖުމްހޫރިއްޔާ ރަސްމާދޫ ރައްޔިތުންނާ ބައްދަލުކުރެއްވުމުގެ ގޮތުން ބޭއްވެވި ރަސްމިއްޔާތުގައި އެ ރަށު ކައުންސިލްގެ ރައީސް ޢާޞިފް ވިދާޅުވީ، ކައުންސިލްގެ އައު އިމާރާތެއް އެ ރަށުގައި އެޅުމަށް ނިންމެވިކަމަށްޓަކައި ސަރުކާރަށް ޝުކުރު އަދާކުރައްވާކަމަށެވެ.  

ޢާޞިފް އިތުރަށް ވިދާޅުވީ، ރަށު ކައުންސިލަކީ ރަށުގެ އެންމެ އިސް އިދާރާ ކަމުން، އެތަން ހުންނަންޖެހޭނީ ރަގަޅު ފެންވަރެއްގައި ކަމަށެވެ. ނަމަވެސް މި ހުރިހާ ދުވަހު އެ އޮފީސް ހުރީ ވަރަށް ދެރަ ހާލުގައި ކަމަށާއި، މިކަން ޙައްލުކުރުމަށް ވޭތުވެދިޔަ ސަރުކާރުތަކުން އެއްބާރުލުން ނުދެއްވާކަމުގައެވެ.

ކައުންސިލް އިދާރާތަކުގެ ޖާގައިގެ ދަތިކަން ޙައްލުކޮށްދެއްވުމަކީ ރައީސުލްޖުމްހޫރިއްޔާގެ ވަޢުދުފުޅެކެވެ. އެގޮތުން ޙާލަތުދަށް 55 ކައުންސިލް އިދާރާގެ ތެރޭގައި ރަސްމާދޫ ހިމަނުއްވައި، އެ ރަށު ކައުންސިލް އިދާރާ ހިމެނޭހެން 55  ރަށެއްގެ ކައުންސިލްގެ އައު އިމާރާތް އެޅުމަށް މެލޭޝިއާގެ ކުންފުންޏަކާ ސަރުކާރުން މި ހަފްތާގައި ވަނީ ހަވާލުކޮށްފައެވެ.

މި ޕްރޮޖެކްޓް ހަވާލުކޮށްފައިވަނީ، ކޮންޓްރެކްޓަރ ފައިނޭންސް އުސޫލުން މެލޭޝިއާގެ ކުންފުންޏެއްކަމަށްވާ ހެކްސްޓަރ ގްލޯބަލްއާއެވެ. އަދި އެއްބަސްވުމުގައިވާގޮތުން، އެ ކުންފުނިން މި ޕްރޮޖެކްޓް 2 އަހަރާއި 6 މަސްދުވަހުގެ ތެރޭގައި ނިންމަންޖެހޭނެއެވެ.