މުދަލު ޒަކާތް ވާޖިބުވާ ނިޞާބު ދަށްކޮށްފި

އިސްލާމީ ކަންތައްތަކާއި ބެހޭ ވުޒާރާއިން ޒަކާތް ވާޖިބުވާ ނިޞާބަށް ބަދަލު ގެނެސްފިއެވެ. މި މަހުގެ 22 ވަނަ ދުވަހުން ފެށިގެން މުދަލު ޒަކާތް ވާޖިބުވާ ނިޞާބު 8،800.05 ރުފިޔާއަށް ދަށްކޮށްފައިވާ ކަމަށް އިސްލާމީ ކަންތައްތަކާބެހޭ ވުޒާރާއިން ވަނީ އިއުލާނު ކޮށްފައެވެ.

މީގެ ކުރިން، 2022 ވަނަ އަހަރުގެ އޮކްޓޯބަރު މަހު ކަނޑައަޅާފައިވާ ނިޞާބުގެ އަދަދަކީ 9،240.35 ރުފިޔާއެވެ. މިއީ މިހާރު ކަނޑައަޅާފައިވާ އަދަދަށްވުރެ 440.30 ރުފިޔާ މަތީ އަދަދެކެވެ.

ރާއްޖޭގައި މުދަލު ޒަކާތް ނެރުން ވާޖިބުވާ ނިޞާބު ކަނޑައަޅަނީ އިސްލާމީ ކަންތައްތަކާބެހޭ ވުޒާރާއިންނެވެ. މުދަލު ޒަކާތުގެ ނިޞާބަކީ، މުދަލުގައި އެ މިންވަރެއް ހަމަވުމުން އެއިން މުދަލުގެ ޒަކާތް ނެރުން ވާޖިބުވާ އެންމެ މަދު މިންވަރެވެ. ދިވެހިރާއްޖޭގައި ނިޞާބު ކަނޑައަޅަނީ ރިހީގެ ނިޞާބުންނެވެ.

ރާއްޖޭގައި ރިހީގެ އަގު ކަނޑައަޅަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިންނެވެ. ނިޞާބު ކަނޑައެޅުމަށްފަހު ދިވެހިރާއްޖޭގެ ޒަކާތު ހައުސްގެ ވެބްސައިޓްގައި އިޢުލާން ކުރެއެވެ. އަހަރުގެ އެކި ދުވަސްވަރު ނިޞާބުގެ މިންވަރު ދުނިޔޭގެ ބާޒާރުގައި ރިހީގެ އަގަށް އަންނަ ބަދަލާއެކު ތަފާތުވެއެވެ.

ޒަކާތް ނެރުން ވާޖިބުވާނީ މުދަލުގައި ނިޞާބު ހަމަވެ އަދި އެ މީހެއްގެ މިލްކިއްޔާތުގައި އެމުދަލެއް ހުރެ ހިޖްރީ ގޮތުން 1 (އެކެއް) އަހަރު ހަމަވުމުންނެވެ. 2016 ވަނަ އަހަރުން ފެށިގެން މުދަލު ޒަކާތް ބަލައިގަތުން ވަނީ މީރާއަށް ބަދަލުކޮށްފައެވެ.

މި ބަދަލާއެކު، ގިނަ ރައްޔިތުންނަށް މުދަލު ޒަކާތް ދެއްކުމުގެ ފުރުޞަތު ލިބިގެންދާނެ ކަމަށް ބެލެވެއެވެ. މިއީ އިސްލާމީ ޝަރީޢާގައި ކަނޑައަޅާފައިވާ މުހިންމު އަޅުކަމެއް ކަމުގައިވާ ޒަކާތް ދިނުމަށް އިތުރު ބާރަކަށް ވެގެންދާނެ ކަމެކެވެ.