ޚަބަރު
ޒަކިއްޔާގެ މަރުގެ މައްސަލައިގައި ފުލުހުން އެފްބީއައިގެ އެހީތެރިކަން ހޯދަނީ
ޒަކިއްޔާގެ މަރުގެ ތަޙުޤީޤު ދިގުލައިދާތީ ހޮޅުދޫގައި ބޭއްވި ސުލްޙަވެރި އިޙްތިޖާޖެއްގެ ތެރެއިން---
ހުލާސާ
އެފްބީއައިގެ އިތުރުން، މި މައްސަލައިގައި ފުލުހުން ސީނިއަރ ތަޙުޤީޤު ޓީމެއް ވެސް ހަރަކާތްތެރި ވަމުން އާދޭ.
މިދިޔަ އަހަރުގެ ސެޕްޓެންބަރު މަހުގެ 10ވަނަ ދުވަހު ނ. ހޮޅުދޫ އިން ޒަޙަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާ މަރުވެފައިވާ ސަބަބެއް ހޯދުމަށް ކުރަމުންދާ ތަޙުޤީޤުގައި، އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ އެހީތެރިކަން ހޯދަމުން އަންނަކަމަށް ފުލުހުން މިއަދު ހާމަކޮށްފިއެވެ.
އެގޮތުން، މި މައްސަލާގައި ދިވެހި ފުލުހުންގެ ޚިދުމަތުން ހޯދާފައިވާ ހޯދުންތައް، އެފްބީއައިއާ ޙިއްސާކޮށްފައިވާކަމަށް އެ އިދާރާއިން ވަނީ ހާމަކޮށްފައެވެ. ނަމަވެސް، މިއީ ސީދާ ކޮންމަޢުލޫމާތެއްކަމެއް ހާމައެއް ނުކުރެއެވެ.
މި މައްސަލަ ނުނިމި ދިގުލާ ދާތީ، އެ ރަށުގައި ދޭތެރެދޭތެރެއިން ސުލްޙަވެރި އިޙުތިޖާޖުކޮށް، ތަޙުޤީޤު އަވަސްކުރުމަށް ގޮވާލަމުންދެއެވެ.
އަދި އެ ރަށުގެ މީހުން ހާމަކުރަމުންދާ ގޮތުގައި މި މަރަކީ، މީހަކު ގަސްތުގައި ޒަކިއްޔާއަށް ދީފައިވާ އަނިޔާއެކެވެ. ނަމަވެސް، ޒަކިއްޔާ މަރާލާފައިވާކަމުގެ އެއްވެސް ނިޝާނެއް އަދި ހެއްކެއް ވެސް ފެނިފައިނުވާކަމަށް ފުލުހުން ހާމަކޮށްފައިވެއެވެ.
މި މައްސަލައިގެ ތަޙުޤީޤުގައި ފުލުހުންގެ ސީނިއަރ ޓީމެއް ހޮޅުދޫއަށް ގޮސް، މައްސަލަ ރިވިއުކުރުމުގެ މަސައްކަތް ކުރަމުން އަންނަކަމަށް ވެސް ފުލުހުން މިއަދު ހާމަކޮށްފައިވެއެވެ.
ދިވެހި ފުލުހުންގެ ސީނިއަރ ތަހުގީގު ޓީމެއް މި މައްސަލަ ރިވިއު ކުރުމަށްޓަކައި ނ. ހޮޅުދޫއަށް ޒިޔާރަތްކޮށްމި މައްސަލައިގެ ތަހުގީގު މުރާޖައާކޮށް، އިތުރަށް ބަލަންޖެހޭ ކަންކަން ދެނެގަތުމުގެ މަސައްކަތް ވަނީ ކުރިއަށް ގެންގޮސްފައި.
ފުލުހުން ހާމަކޮށްފައިވެއެވެ.
މި މައްސަލާގައި ޑިސެންބަރުމަހު ފުލުހުން ބޭއްވި ނޫސްވެރިންގެ ބައްދަލުވުމުގައި ހޮސްޕިޓަލާ ހަވާލާދީ ފުލުހުންގެ ޗީފް އިންސްޕެކްޓަރު މުހައްމަދު ސާމިޙް ވިދާޅުވީ، ޒަކިއްޔާ މަރުވީ ކަރަށް ލިބުނު ޒަޚަމްތަކަކާ ގުޅިގެން ކަމަށެވެ. އެގޮތުން ކަރުގެ ވާތްފަރާތުގައި ފުންކޮށް ތިން ޒަޚަމެއް އަދި ކަނާތްފަރާތުގައި ފުން ދެ ޒަޚަމެއް ހުރިކަމަށް ވެއެވެ. އަދި ކަރުގެ މެދުގައި ތިލަކޮށް ހުރި ޒަޚަމުގެ އިތުރުން، އިތުރު އެއްވެސް އަނިޔާއެއް ފެންނަން ނެތްކަމަށް ސާމިޙް ވިދާޅުވިއެވެ.
މިހާގިނަ ޒަޚަމްތަކެއް ހުރި ނަމަވެސް، އެއީ މީހަކު ދިން އަނިޔާތަކެއްކަން ބެލެވޭނެ އެއްވެސް ހެއްކެއް މިހާތަނަށް ފެނިފައިނުވާކަމަށް ވެސް ހާމަކޮށްފައި ވެއެވެ.
އުމުރުން 50 އަހަރުގެ ޒަކިއްޔާ މަރުވެފައި އޮއްވާ ފެނިފައިވަނީ އޭނާ ދިރިއުޅެމުން ދިޔަ ގޭގެ ތެރެއިންނެވެ.
