އެމެރިކާގައި އަނެއްކާ އަލިފާންގަނޑެއް ރޯވެއްޖެ، އެތައް ހާސް ބަޔަކު ސަލާމަތްވުމަށް ފިލައިފި

އެމެރިކާގެ ލޮސް އެންޖެލެސް ކައުންޓީގައި އަލުން އަލިފާނުގެ ބޮޑު ހާދިސާއެއް ހިނގައި، އެތައް ހާސް ބަޔަކު ސަލާމަތްވުމަށް ފިލަން ޖެހިއްޖެއެވެ. މި ސަރަހައްދަކީ މީގެ ކުރިން ވެސް އަލިފާނުގެ އެންމެ ބޮޑެތި ހާދިސާތައް ހިނގާފައިވާ ސަރަހައްދެކެވެ.

"ހިއުޖަސް ފަޔަރ" ގެ ނަމުން މަޝްހޫރުވެފައިވާ މި އަލިފާން ފެށުނީ ބުދަ ދުވަހުގެ ހެނދުނު ލޮސް އެންޖެލެސް ސިޓީގެ އުތުރު-ހުޅަނގުން 72 ކިލޯމީޓަރު ދުރުގައިވާ ކަސްޓައިކް ލޭކް ކައިރީގައެވެ. މިއީ ގިނަ މީހުން ދިރިއުޅޭ ސަރަހައްދުތަކާއި ސްކޫލްތަކާ ޖެހިގެން އޮންނަ ފަރުބަދަ ސަރަހައްދެކެވެ.

ވައިގެ ބާރުގަދަކަމާއި ހިކިފައިވާ ގަސްގަހާގެހީގެ ސަބަބުން މި އަލިފާން އެއް ދުވަހުގެ ތެރޭގައި 10،000 އޭކަރަށްވުރެ ބޮޑު ސަރަހައްދަކަށް ފެތުރުނެވެ. ނަމަވެސް، މިހާތަނަށް އެއްވެސް ގެއަކަށް ނުވަތަ ވިޔަފާރިއަކަށް ގެއްލުމެއް ލިބިފައެއް ނުވެއެވެ. އަދި އަލިފާން ކޮންޓްރޯލް ކުރެވޭނެ ކަމުގެ ޔަގީންކަން އޮފިޝަލުން ދީފައިވެއެވެ.

މި އަލިފާނުގެ ސަބަބުން 31،000 އަށްވުރެ ގިނަ މީހުން އެ ސަރަހައްދުން ނެރެން ޖެހުނެވެ. އަދި އިތުރު 23،000 މީހުންނަށް ފިލަން ޖެހިދާނެ ކަމުގެ އިންޒާރު ދެވިފައިވެއެވެ. ލޮސް އެންޖެލެސް ކައުންޓީގެ ޝެރިފް ރޮބަޓް ލޫނާ ވިދާޅުވި ގޮތުގައި، ގާތްގަނޑަކަށް 500 ގައިދީން ވެސް އެހެން ތަނަކަށް ބަދަލުކުރަންޖެހުނެވެ.

އަލިފާން ނިއްވުމުގެ މަސައްކަތުގައި ހެލިކޮޕްޓަރުތަކާއި މަތިންދާ ބޯޓުތައް ބޭނުންކުރެވެމުންދާ ކަމަށް ލޮސް އެންޖެލެސް ކައުންޓީގެ ފަޔަރ ޗީފް އެންތޯނީ މަރޯނީ ވިދާޅުވިއެވެ. އަދި މި އަލިފާން ނިއްވުމުގެ މަސައްކަތް ކުރިއަށްދާ ގޮތާމެދު ހިތްހަމަޖެހޭ ކަމަށް ވެސް އޭނާ ވިދާޅުވިއެވެ.

މޫސުމަށް އަންނަ ބަދަލުތަކުގެ ސަބަބުން މިފަދަ އަލިފާނުގެ ހާދިސާތައް އިތުރުވަމުންދާ ކަމަށް ސައިންޓިސްޓުން ބުނެއެވެ. ވިދިވިދިގެން ހޫނު އަދި ފިނި މޫސުން އައުމުގެ ސަބަބުން އަލިފާން ރޯވުމަށް ފަސޭހަ ގަސްގަހާގެހި އުފެދެމުންދާ ކަމަށް ވެސް އެ ފަރާތްތަކުން ފާހަގަކުރެއެވެ.