ތޫނު އެއްޗަކުން ހަމަލާ ދިނުމަށްފަހު ބިދޭސީއެއްގެ އަތުން ފައިސާތަކެއް ފޭރުނު ބަޔަކު ހައްޔަރުކޮށްފި

ތޫނު އެއްޗަކުން ހަމަލާ ދިނުމަށްފަހު ބިދޭސީއެއްގެ އަތުން ފައިސާތަކެއް ފޭރުނު ބަޔަކު ފުލުހުންގެ ބެލުމުގެ ދަށަށް ގެންގޮސްފިއެވެ. 

ފުލުހުން ހާމަކޮށްފައިވާ ގޮތުގައި، ބުދަ ދުވަހުގެރޭގެ 10:14 ހާއިރު މި ހާދިސާ ހިނގައިގެން އުޅޭކަން އެނގުނީ، ރަސްފަންނު ސަރަޙައްދުގައި ފައިމަގުގައި ޕެޓްރޯލް ކުރަމުން ދިޔަ ފުލުހުންގެ ބީޓަކަށެވެ. އެ ބީޓަށް އެ ސަރަޙައްދުން ބަޔަކު ދުވެފަދާތަން ފެނުމުން، އެމީހުންގެ ފަހަތުން ދުވެފަ ދިޔަ ބިދޭސީމީހާއާ ބައްދަލުކޮށް ވާހަކަދެއްކުމުން، ފުރަތަމަ އެ ދިޔައީ  އޭނާއަށް ހަމަލާ ދިނުމަށްފަހު އޭނާގެ ފައިސާތަކެއް ފޭރިގަނެގެން ފިލަން ދިޔަ ބައެއްކަން ފުލުހުންނަށް އެނގުނެވެ.

އެހެންކަމުން، އެހެން ފުލުހުންގެ އެހީތެރިކަމާއެކު، އެމީހުން ހައްޔަރުކުރެވުނީ ނޯތު ހާބަރު ސަރަޙައްދުންކަން ފުލުހުން ހާމަކޮށްފައިވެއެވެ. 

މި މައްސަލައިގައި ހައްޔަރުކޮށްފައިވަނީ ދިވެހި ތިން ފިރިހެނުންނެވެ. އެއީ ސ. ހިތަދޫ، ޣައްޒާ، މުބާރިކް މުޙައްމަދު، 34 އަހަރު، އާއި ޏ. ފުވައްމުލަކު/ދިގުވާންޑު، ގުރަހާގެ، އަޙުމަދު ފަޔާޟް، 30 އަހަރު، އާއި އެ ރަށު ކައިރުގެ، އަޙުމަދު ނަދީފް، 36 އަހަރު، އެވެ. 

ފުލުހުންނަށް މަޢުލޫމާތު ލިބިފައިވާ ގޮތުގައި، މި މީހުން ފޭރިފައިވަނީ 1،000ރ. އާއި 10 ޔޫރޯ އާއި 10 ބަނގުލަދޭޝް ޓާކާ އާއި 20 ސްރީލަންކަން ރުޕީ އާއި 500 އިންޑިއަން ރުޕީ އަދި 2 ސިންގަޕޫރު ޑޮލަރެވެ. ނަމަވެސް އެމީހުންގެ އަތުން ފެނިފައިވަނީ، 1،000ރ. އާއި 20 ސްރީލަންކަން ރުޕީސް އަދި 2 ސިންގަޕޫރު ޑޮލަރެވެ.

މި މީހުން ދިން ހަމަލާގައި ބިދޭސީމީހާއަށް ލިބުނު ގެއްލުމުގެ ތަފްސީލު ހާމަކޮށްފައި ނެތަސް، މި މައްސަލަ އިތުރަށް ތަޙުޤީޤު ކުރަމުން އަންނަކަމަށް ފުލުހުން ހާމަކޮށްފައި ވެއެވެ.