ޚަބަރު
މިނިސްޓްރީގެ ހެލްޕްލައިން އިފްތިތާޙުކުރި ފަހުން މިދިޔަ އަހަރު ގިނަ ބަޔަކަށް ނަފްސާނީ ފުރަތަމަ އެހީ ދީފި

މެންޓަލް ހެލްތު ހެލްޕްލައިން އިފްތިތާޙުކުރުމުގެ ގޮތުން ބޭއްވި ޙަފްލާ: ފޮޓޯ: އިންފިނިޓް މޮމެންޓްސް
ހުލާސާ
މިދިޔަ 2024ވަނަ އަހަރު އެ ޚިދުމަތް 3،004 މީހަކަށް ދީފައިވޭ.
ހެލްތު މިނިސްޓްރީން ނަފްސާނީ ފަރުވާއަށް ޙާއްސަކޮށްގެން ހެލްޕްލައިނެއް އިފްތިތާޙުކުރި ފަހުން، މިދިޔަ އަހަރު ގިނަ ބަޔަކަށް ނަފްސާނީ ފުރަތަމަ އެހީ ދީފިއެވެ.
އެ މިނިސްޓްރީގެ ހެލްޕްލައިން ލޯންޗުކުރީ 2024 ފެބުރުވަރީ 21ވަނަ ދުވަހެވެ. އަދި މި ހެލްޕްލައިންގެ ޚިދުމަތް 24 ގަޑިއިރު ދެމުންގެންދާއިރު، މިދިޔަ 2024ވަނަ އަހަރު އެ ޚިދުމަތް 3،004 މީހަކަށް ދީފައިވެއެވެ. މިނިސްޓްރީން މިކަން ހާމަކޮށްފައިވަނީ ސޯޝަލް މީޑިއާގައި އާންމުކުރި ޕޯސްޓެއްގައެވެ.
ހެލްތު މިނިސްޓްރީއިން ނަފްސާނީ އެހީއަށް ޙާއްސާކޮށްފައިވާ ނަންބަރަކީ 1677އެވެ.
Since its launch, the Mental Health Helpline has attended 3,004 calls, offering vital support and guidance to those in need. #MentalHealth #SupportForAll pic.twitter.com/Iy6hYBZFTF
— Ministry of Health (@MoHmv) January 23, 2025
މިނިސްޓްރީއިން މި ހެލްޕްލައިން ތަޢާރަފްކުރީ ދިރިއުޅުމުގައި މީހުންނަށް ދިމާވާ ގޮންޖެހުންތަކުން އަރައިގަތުމަށް އެހީތެރިވުމަށާއި، ނަފުސާނީ ގޮތުން އުނދަގޫތައް ކުރިމަތިވާ ފަރާތްތަކަށް ފޯނު މެދުވެރިކޮށް ނަފުސާނީ ފުރަތަމަ އެހީ ފޯރުކޮށްދީ، ނަފްސާނީ ދުޅަހެޔޮކަން ކުރިއެރުވުމަށްކަމަށް މިނިސްޓްރީން ހާމަކޮށްފައިވެއެވެ.
މީގެ އިތުރުން، މިފަދަ ފަރާތްތަކަށް ސައިކޯ ސޯޝަލް ސަޕޯޓު ފޯރުކޮށްދީ، އެ މީހުންގެ އުދާސްތައް ހިއްސާކުރެވޭނެ ފަދަ މާހައުލެއް ގާއިމްކުރުމަކީ ވެސް މި ހެލްޕްލައިންގެ ބޭނުމެއްކަމަށް މިނިސްޓްރީން ހާމަކޮށްފައިވެއެވެ.
މި ހެލްޕްލައިން މެދުވެރިކޮށް ހުރިހާ އުމުރެއްގެ މީހުންނަށް އަންނަނީ ފަރުވާދެމުންނެވެ. އަދި ނަފްސާނީ ފުރަތަމަ އެހީ ދިނުމަށްފަހު އިތުރު ފަރުވާ ބޭނުންވާނަމަ، ހަދާފައިވާ އުސޫލުތަކުގެ ތެރެއިން ރެފަރަލް ވެސް ހަދައިދެއެވެ.