އޮސްޓްރޭލިއަން އޯޕަން: އަށް އަހަރަށްފަހު ގްރޭންޑް ސްލޭމް ފައިނަލަކުން އެމެރިކާގެ ކީސް ޖާގަހޯދައިފި

2017ވަނަ އަހަރު ޔޫއެސް އޯޕަން ކާމިޔާބުކުރި ފަހުން، އެ ޤައުމުގެ މެޑިސަން ކީސް ގްރޭންޑް ސްލޭމް ފައިނަލަކުން އަލަށް ޖާގަ ހޯދައިފިއެވެ. 

އޭނާ އޮސްޓްރޭލިއަން އޯޕަންގެ ފައިނަލަށް ދަތުރުކުރީ، ސެމީފައިނަލުގައި ދުނިޔޭގެ ދެވަނައަށް ސީޑް ކޮށްފައިވާ، ޕޮލަންޑުގެ އިގާ ސްވަޓެކް ބަލިކުރުމަށްފަހުއެވެ. ފައިނަލުގައި އޭނާ ނިކުންނަން ޖެހޭނީ، ޖެހިޖެހިގެން ތިންވަނަ ފަހަރަށް އޮސްޓްރޭލިއަން އޯޕަން ކާމިޔާބުކުރުމަށް ނިކުންނަ، ދުނިޔޭގެ އެއްވަނަ އަންހެން ޓެނިސް ކުޅުންތެރިޔާ، ބެލަރޫސިއާގެ އެރީނާ ސަބަލެންކާއާއެވެ. 

އޮސްޓްރޭލިއަން އޯޕަންގައި މިހާތަނަށް ކުޅުނު އަންހެނުންގެ އެންމެ ފޯރިގަދަ މެޗުކަމަށް ގިނަ ބަޔަކު ޤަބޫލުކުރާ، ދުނިޔޭގެ 19ވަނައަށް ސީޑްކޮށްފައިވާ ކީސް އާއި ދެވަނައަށް ސީޑްކޮށްފައިވާ ސްވަޓެކް ބައްދަލުކުރި މި މެޗު ތިން ސެޓަށް ދެމިގެން ދިޔައިރު، ސްވަޓެކްއަށް ހިތި ނިމުމެއް ގެނަސް 2-1 ސެޓުން މެޗު ކާމިޔާބުކުރީ ކީސްއެވެ. 

މި މެޗުގެ ފުރަތަމަ ސެޓު 5-7 ސްވަޓެކް ކާމިޔާބުކުރިއިރު، ފަހު ސެ ދެޓު 6-1 އަދި 7-6 އިން ކާމިޔާބުކުރީ ކީސްއެވެ. 

މި މެޗުގައި އެންމެ ފޯރިގަދަކޮށް ފެނިގެން ދިޔައީ ފަހު ސެޓެވެ. ފަހު ސެޓުގެ ސްކޯރ 5-5 ގޭމްއިން އެއްވަރުވެފައި ވަނިކޮށް، ސްވަޓެކް ހަވަނަ ގޭމް ގެންދިޔައިރު ޖެހިގެން އައި ސެޓުގައި ސާރވް ކުރުމުގެ ފުރުސަތު އޮތީ ވެސް އޭނައަށެވެ. އަދި މެޗު ޕޮއިންޓު ހޯދުމަށް، ސްކޯރ 40-30ގައި އޮއްވައި ސްވަޓެކްއަށް ލިބުނު ފުރުސަތު ގެއްލުމުން، ސްކޯރ 6-6 ގޭމްއިން އަނެއްކާ ވެސް އެއްވަރުވިއެވެ.

އެއަށްފަހު ދެން ކުޅުނު "ޗެމްޕިއަންޝިޕް ޓައި" ވެސް ލީޑުކުރީ ސްވަޓެކްއެވެ. މި ޓައިގެ އޮއިވަރު ބަދަލުވީ 8-7ގެ ސްކޯރއަކުން ސްވަޓެކް މެޗު ކާމިޔާބުކުރުމަށް ދެ ޕޮއިންޓާ ކައިރިއަށް ޖެހެލިފަހުންނެވެ. 

ނަމަވެސް ސްވަޓެކްއަށް އެކަން ނުކުރެވެނީސް، ކީސް ފަހަތުން އަރާ ތިން ގޭމް ހޯދުމަށްފަހު، ޗެމްޕިއަންޝިޕް ޓައި 8-10 އިން ކާމިޔާބުކުރިއެވެ. 

މި މުބާރާތުގެ އަންހެނުން ބައިގެ ފައިނަލް ކުޅުމަށް ހަމަޖެހިފައިވަނީ ހޮނިހިރު ދުވަހުއެވެ. ރޮޑް ލެވަރ އެރީނާގައި ސަބަލެންކާ އާއި ކީސް ބައްދަލުކުރުމަށް ހަމަޖެހިފައިވާ މި މެޗު ފަށާނީ ރާއްޖެގަޑިން މެންދަމު 3:30ގައެވެ.