އޮސްޓްރޭލިއަން އޯޕަންގެ ތާރީޙީ ފައިނަލަކަށް ސަބަލެންކާ ތައްޔާރުވެއްޖެ

އޮސްޓްރޭލިއަން އޯޕަންގެ ތާރީޙީ ފައިނަލަކަށް، ދުނިޔޭގެ އެއްވަނަ އަންހެން ޓެނިސް ކުޅުންތެރިޔާ، ބެލަރޫސިއާގެ އެރީނާ ސަބަލެންކާ ތައްޔާރުވެއްޖެއެވެ.

ސެމީފައިނަލްގައި އޭނާއާ އެންމެ ގާތް އެކަކު ކަމުގައިވާ، ޕައުލާ ބަޑޯސާ 2-0 ސެޓުން ބަލިކުރުމަށްފަހު، ސަބަލެންކާ ތައްޔާރުވެފައި މިވަނީ ޖެހިޖެހިގެން މި މުބާރާތް ތިންވަނަ ފަހަރަށް ކާމިޔާބުކުރާ ކުޅުންތެރިންގެ ރަން ސަފްޙާއިން ޖާގައެއް ހޯދުމަށެވެ. މި ޝަރަފު އެންމެ ފަހުން ހޯދާފައިވަނީ 1997 އާއި 1999 އާއި ދެމެދު، މާޓިނާ ހިންގިސްއެވެ. 

ސެމީ ފައިނަލުގައި މޮޅު ކުޅުމެއް ދެއްކި ސަބަލެންކާއަށް 2023ވަނަ އަހަރުގެ ފަހުން އޮސްޓްރޭލިއަން އޯޕަންގައި ސެޓެއް ގެއްލުނީ މި މުބާރާތުގެ ކުއާޓާ ފައިނަލްގައި އެކަންޏެވެ. އެ މެޗުގައި އޭނާ ބައްދަލުކޮށްފައި ވަނީ ރަޝިޔާގެ އަނަސްތަސިއާ ޕަވްލިޗެންކޯވާއާއެވެ. 

ސެމީ ފައިނަލްގައި ދުނިޔޭގެ 11 ވަނައަށް ސީޑްކޮށްފައިވާ ސްޕެއިންގެ ބޮޑޯސާގެ މައްޗަށް އޭނާ ކުރިހޯދާފައިވަނީ 6-4 އަދި 6-2 އިންނެވެ.

ފައިނަލް މެޗުގައި ސަބަލެންކާ ނިކުންނާނީ އެމެރިކާގެ މެޑިސަން ކީސްއާ ދެކޮޅަށެވެ. ކީސް ފައިނަލަށް ދަތުރުކުރީ، ފޯރިގަދަ ކުރިމަތިލުމެއްގައި ދުނިޔޭގެ ދެވަނައަށް ސީޑް ކޮށްފައިވާ، ޕޮލަންޑުގެ އިގާ ސްވަޓެކް 2-1 ސެޓުން ބަލިކުރުމަށްފަހުއެވެ.

މި މުބާރާތުގެ އަންހެނުން ބައިގެ ފައިނަލް ކުޅުމަށް ހަމަޖެހިފައިވަނީ ހޮނިހިރު ދުވަހުއެވެ. ރޮޑް ލެވަރ އެރީނާގައި ސަބަލެންކާ އާއި ކީސް ބައްދަލުކުރުމަށް ހަމަޖެހިފައިވާ މި މެޗު ފަށާނީ ރާއްޖެގަޑިން މެންދަމު 3:30ގައެވެ.