ނިލަންދޫ އެއަރޕޯޓުގެ ބިން ހިއްކުން އެޕްރީލަށް ނިމޭނެކަމުގެ ޔަޤީންކަން އެމްޓީސީސީން ދީފި

ފ. ނިލަންދޫ އެއަރޕޯޓް ތަރައްޤީކުރުމަށް ހަމަޖެހިފައިވާ ބިން ހިއްކުމުގެ މަސައްކަތް، ކޮންޓްރެކްޓްކޮށްފައިވާ މުއްދަތާ އެއްގޮތަށް އެޕްރީލް މަހުގެ ނިޔަލަށް ނިންމޭނެކަމުގެ ޔަޤީންކަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ދީފިއެވެ.

މި މަޝްރޫޢުގެ ދަށުން 42.6 ހެކްޓަރުގެ ބިން ހިއްކުމަށް ހަމަޖެހިފައިވާއިރު، ގޮނޑުދޮށް ހިމާޔަތްކުރުމަށް 2098 މީޓަރުގެ ބޮޑު ހިލައިގެ ރިވެޓްމަންޓް އަދި 1400 މީޓަރުގެ ޖިއޯބޭގް ރިވެޓްމަންޓް ޖެހުމަށްވެސް ވަނީ ހަމަޖެހިފައެވެ. އެމްޓީސީސީން މަޢުލޫމާތު ދެއްވިގޮތުގައި މިހާތަނަށް ބިން ހިއްކުމުގެ މަސައްކަތުގެ 24 ޕަސެންޓް ވަނީ ނިމިފައެވެ.

މި މަސައްކަތް އެމްޓީސީސީއާ ހަވާލުކުރެއްވީ އިމާރާތްކުރުމާއި ބިނާވެށި ތަރައްޤީކުރުމާބެހޭ ވުޒާރާއިން، 2022 ވަނަ އަހަރުގެ މާރިޗު މަހުގެ 27 ވަނަ ދުވަހުއެވެ. މި މަޝްރޫޢު 390 ދުވަހުގެ ތެރޭގައި ނިންމުމަށް ވަނީ ހަވާލުކޮށްފައެވެ.

ނިލަންދޫ އެއަރޕޯޓަކީ މި ސަރުކާރުން ތަރައްޤީކުރުމަށް އިޢުލާނުކޮށްފައިވާ 12 އެއަރޕޯޓުގެ ތެރެއިން އެއް އެއަރޕޯޓެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ މި އެއަރޕޯޓް ތަރައްޤީކުރެވޭނީ 1800 މީޓަރުގެ ދިގު ރަންވޭއަކާއެކު، ޖެޓް މަތިންދާބޯޓު ޖެއްސޭ ފެންވަރަށް ކަމަށެވެ.

ނިލަންދެއަތޮޅު އުތުރުބުރި (ފ. އަތޮޅު) އަކީ ރާއްޖޭގައި އެއަރޕޯޓެއް ނެތް މަދު އަތޮޅުތަކުގެ ތެރެއިން އެއް އަތޮޅެވެ. އަދި ނިލަންދޫއަކީ ސަރުކާރުން އަރބަން ސެންޓަރުގެ ގޮތުގައި ތަރައްޤީކުރަން ނިންމާފައިވާ 7 ރަށުގެ ތެރެއިން އެއް ރަށެވެ. މި ވަގުތު އެ ރަށުގައި ކުރިއަށްދާ އިތުރު މަސައްކަތްތަކުގެ ތެރޭގައި ބަނދަރު އިތުރަށް ތަރައްޤީކުރުމާއި ގިރާ ސަރަޙައްދުގައި ބޮޑުގައި ބޮޑު ހިލައިގެ ރިވެޓްމަންޓް ޖެހުން ހިމެނެއެވެ.