އަމީނީ މަގު މިފަހަރު ހުޅުވާލާނީ ތާރު ރަނގަޅަށް ހިކުމުން: އާރްޑީސީ

އަމީނީ މަގުގައި މަރާމާތުކުރަމުންދާ ސަރަޙައްދު މިފަހަރު ހުޅުވާލާނީ ތާރު އަޅާ، ތާރު ރަނގަޅަށް ހިކުމުންކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން  ވިދާޅުވެއްޖެއެވެ.

އަމީނީ މަގުގެ މާފަންނު ސްޓޭޑިއަމް ސަރަޙައްދުގެ ތާރުގަނޑު ވަރަށް ބޮޑަށް އަޑިގުޑަންވެ ހަލާކުވުމުގެ ސަބަބުން، އެ ސަރަޙައްދު މަރާމާތުކުރުމުގެ މަސައްކަތް ފެށީ މިމަހުގެ 11 ވަނަ ދުވަހުއެވެ. މި ސަރަޙައްދަކީ އަމީނީ މަގު ތަރައްޤީކުރުމުގެ 13 ސެގްމަންޓްގެ ތެރެއިން 11 އަދި 12 ވަނަ ސެގްމަންޓް ހިމެނޭ ސަރަޙައްދެވެ.

ޓެކްނިކަލް ފަރާތްތަކުން ފާހަގަކުރާ ގޮތުގައި، އެ ސަރަޙައްދުގެ މަގު އެހާ އަވަހަށް ހަލާކުވެފައިވަނީ، ތާރު އެޅުމަށްފަހު ތާރު ހިއްކުމަށް ދޭންޖެހޭ އެކަށީގެންވާ މުއްދަތު ނުދީ އާއްމު ދަތުރުތަކަށް ހުޅުވާލުމުންނެވެ. މިކަމާ ގުޅިގެން އާއްމުންވެސް އެ ސަރަޙައްދުގައި ދުއްވުމަށް ދަތިވާކަމުގެ ޝަކުވާ ކުރަމުންދެއެވެ.

އާރްޑީސީން މަޢުލޫމާތު ދެއްވާފައިވާ ގޮތުގައި، މިހާރު މަގު ހެދުމަށް ކުރަމުންދާ މަސައްކަތުގައި، ތާރުގެ ކުރިން އަޅާ އޭބީސީ ލޭޔަރ އެޅުމުގެ މަސައްކަތް ނިމި، އެ ކޮންކްރީޓް ފަށާލަ ޓެސްޓުކުރުމުގެ މަސައްކަތް ދަނީ ކުރަމުންނެވެ. އަދި ތާރު އެޅުމުގެ މަސައްކަތް ވީހާވެސް އަވަހަށް ނިންމުމަށް މަސައްކަތް ކުރަމުންދާކަމަށް އެ ކުންފުނިން ބުނެއެވެ.

އާރްޑީސީން އިތުރަށް ފާހަގަކުރެއްވި ގޮތުގައި، މިފަހަރު މަގު ހުޅުވާލާނީ ތާރު އެޅުމަށްފަހު، ތާރު ހިއްކުމަށް އެކަށީގެންވާ ވަގުތު ދީފައެވެ. މިގޮތަށް ނުހަދައިފިނަމަ، އަނެއްކާވެސް މަގު އަވަހަށް ހަލާކުވާނެކަމަށް އެ ކުންފުނިން ވިދާޅުވިއެވެ.

ފާހަގަކޮށްލެވޭ ގޮތުގައި، ސަރުކާރުން 84.4 މިލިއަން ރުފިޔާ ޚަރަދުކުރައްވައިގެން ކުރިއަށްގެންދެވި އަމީނީ މަގު ތަރައްޤީކުރުމުގެ މަޝްރޫޢުގެ ދަށުން ޖުމްލަ 1.79 ކިލޯމީޓަރުގެ ސަރަހައްދެއް ތާރު އަޅައިގެން ޒަމާނީ ފެންވަރަށް ތަރައްޤީކޮށްފައިވެއެވެ. މި މަޝްރޫޢުގެ މަސައްކަތް މުޅިން ނިންމާފައިވަނީ 2023 ވަނަ އަހަރުގެ ޖެނުއަރީ މަހުއެވެ.

އަމީނީމަގު މާފަންނު ސްޓޭޑިއަމް ސަރަހައްދުގައި ތާރު އަޅާފައިވާ ހިސާބަށް ގެއްލުންވެފައި ވުމުގެ ސަބަބުން އެ ސަރަހައްދު މަރާމާތު ކުރުމުގެ މަސައްކަތުގެ ތެރެއިން މިހާރު ކުރިއަށް ދަނީ އޭބީސީ ފަށަލަ ޓެސްޓް ކުރުމުގެ މަސައްކަތް.#TeamRDC pic.twitter.com/FyBsQ69xuN

— Road Development Corporation Ltd (@rdcmaldives) January 23, 2025