ކޮލަމް
ސިނގިރޭޓާއި ދުރުވާން ބޮލަށް ކޮށި ފެއްތި މީހާގެ ވާހަކަ އަލުން ދެކެވެން ފަށައިފި

އިބްރާހިމް ޔުސެލް ފޮޓޯ:އިންޓަނެޓް
ސިނގިރޭޓު ބުއިމުގެ ނުރައްކާތެރިކަމާއި އެކަމުން ދުރުވުމަށް މީހުން ކުރާ މަސައްކަތްތަކާ ބެހޭ ގޮތުން އަލުން ވާހަކަދެކެވެން ފަށައިފިއެވެ. މިގޮތުން 11 އަހަރު ކުރިން ސިނގިރޭޓު ދޫކޮށްލުމަށްޓަކައި އޭނާގެ ބޯ ކޮށްޓެއްގައި ބަންދުކުރި ތުރުކީ މީހެއްގެ ވާހަކަ އަނެއްކާވެސް ދެކެވެން ފަށައިފިއެވެ.
އިބްރާހިމް ޔުސެލް ކިޔާ މި މީހާ ވަނީ 26 އަހަރު ވަންދެން ސިނގިރޭޓު ބޮއެ، ދުވާލަކު ދެ ފޮށި ސިނގިރޭޓު ބުއިމުގެ އާދަ ދޫކޮށްލުމަށް ގިނަ މަސައްކަތްތަކެއް ކޮށްފައެވެ. ނަމަވެސް އެއްވެސް ފަހަރަކު އޭނާއަށް މި އާދަ ދޫކޮށްނުލެވުނެވެ. އެހެންކަމުން 2013 ވަނަ އަހަރު އޭނާ ވަނީ އޭނާގެ ބޯ ހެލްމެޓް ބައްޓަމުގެ ކޮށްޓެއްގައި ބަންދުކޮށް، އޭގެ ތަޅުދަނޑި އަނބިމީހާއާ ހަވާލުކޮށްފައެވެ.
މި ހާދިސާގެ ފޮޓޯތަކާއި ވީޑިއޯތައް އިންޓަނެޓުގައި ވަރަށް ބޮޑަށް ފެތުރުނު ނަމަވެސް، އިބްރާހިމް ޔުސެލްއަށް ސިނގިރޭޓު ދޫކޮށްލެވުނުކަން ޔަގީންކޮށްދޭ އެއްވެސް ހެއްކެއް މިހާތަނަށް ލިބިފައެއް ނުވެއެވެ.
ދުންފަތުގެ އިސްތިއުމާލު ކުރުމުގެ ސަބަބުން ކޮންމެ އަހަރަކު 8 މިލިއަނަށްވުރެ ގިނަ މީހުން މަރުވާކަމަށް ދުނިޔޭގެ ސިއްހީ ޖަމްއިއްޔާއިން ބުނެއެވެ. އަދި މީގެ އިތުރުން ދުންފަތުގެ އިސްތިއުމާލު ނުކުރާ މީހުންގެ ތެރެއިން ވެސް އަހަރަކު 1.2 މިލިއަން މީހުން މަރުވަނީ ދުންފަތުގެ ދުމުގެ ސަބަބުންނެވެ. ކުޑަކުދިންގެ ދެބައިކުޅަ އެއްބަޔަށްވުރެ ގިނަ ކުދިން ދުންފަތުގެ ދުމުން ތަޣައްޔަރުވެފައިވާ ވައި ތަނަފުސްކުރާ ކަމަށާއި، އަހަރަކު 65،000 ކުޑަކުދިން މަރުވަނީ ދުންފަތުގެ ދުމުގެ ސަބަބުން ޖެހޭ ބަލިތަކުންކަމަށް ވެސް ދުނިޔޭގެ ސިއްހީ ޖަމްއިއްޔާއިން ބުނެއެވެ.