ދުނިޔެ
ހަމާސްއިން ހިފެހެއްޓި އިސްރާއީލުގެ 4 އަންހެން ސިފައިން މިނިވަންކޮށްފި

މިނިވަންކުރި އަންހެން ސިފައިން ފޮޓޯ:އަލް ޖަޒީރާ
ޣައްޒާގައި ހިފަހައްޓާފައި ތިބި އިސްރާއީލުގެ 4 އަންހެން ސިފައިން ހަމާސްއިން މިނިވަންކޮށްލައިފިއެވެ. މި ސިފައިން މިނިވަންކޮށްލީ ހުޅުވާލެވިފައިވާ ހަނގުރާމަ ހުއްޓުމުގެ އެއްބަސްވުމުގެ ދަށުންނެވެ.
ހޮނިހިރު ދުވަހު ޣައްޒާ ސިޓީގެ "ޕެލެސްޓައިން ސްކުއެއަރގައި" ރެޑް ކްރޮސްގެ އޮފިޝަލުންނާ ހަވާލުކޮށްފައިވާ މި 4 ސިފައިންނަކީ ކަރީނާ ރީވް، ޑެނިއެލާ ގިލްބޯ، ނައާމާ ލެވީ އަދި ލިރީ އަލްބާގްއެވެ. އިސްރާއީލުގެ ސިފައިންގެ ޔުނިފޯމުގައި ތިބި މި 4 ސިފައިން މިނިވަންވަމުން އެތަނަށް އެއްވެފައިވާ މީހުންނަށް އަތްޖަހައިލިއެވެ.
މި ސިފައިން މިނިވަންކުރުމުގެ ބަދަލުގައި އިސްރާއީލުގެ ޖަލުތަކުގައި ބަންދުކޮށްފައި ތިބި 200 ފަލަސްތީނު މީހުން މިނިވަންކުރާނެ ކަމަށް ބެލެވެއެވެ. މި ސިފައިން މިނިވަންކުރުމުގެ ކުރިން ހަމާސް އަދި އިސްލާމިކް ޖިހާދުގެ ސަތޭކަ އެތައް މެމްބަރުންނެއް އެތަނަށް އެއްވެފައިވެއެވެ. އަދި ރެޑް ކްރޮސްގެ މީހުންނާއި ހަމާސްގެ ފައިޓަރެއް ލިޔެކިޔުންތަކެއްގައި ސޮއިކުރި މަންޒަރު ފެނިފައިވެއެވެ.
އަލްޖަޒީރާއަށް ރިޕޯޓުކުރަމުން އިބްރާހިމް އަލް ޚަލީޖީ ވިދާޅުވީ މިއީ "ތާރީޚީ ވަގުތެއް" ކަމަށެވެ.