ފުވައްމުލަކުގައި ކްރިއޭޓަރ ހަބެއް ގާއިމުކުރަނީ : އެއްބަސްވުމުގައި ސޮއިކޮށްފި

ފުވައްމުލަކު ސިޓީގައި ކްރިއޭޓަރ ހަބެއް ގާއިމުކުރުމަށް، ބިޒްނަސް ސެންޓަރ ކޯޕަރޭޝަން (ބީސީސީ) އާއި ފުވައްމުލައް ސިޓީ ކައުންސިލާ ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސޮއިކުރެވުނީ ބީސީސީގައި ބޭއްވުނު ރަސްމިއްޔާތެއްގައެވެ.

މި ކްރިއޭޓަރ ހަބް ގާއިމުކުރުމަށް ހަމަޖެހިފައިވަނީ ފުވައްމުލަކު ސިޓީގެ ލޯކަލް މާރުކޭޓުގެ ފުރަތަމަ ފަންގިފިލާގައެވެ. އެއްބަސްވުމުގައި ބީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހީމް ޒިޔާއު މުޙައްމަދެވެ. އަދި ފުވައްމުލަކު ސިޓީ ކައުންސިލްގެ ފަރާތުން ސޮއިކުރެއްވީ މޭޔަރު އިސްމާއީލް ރަފީގެވެ.

ބީސީސީގެ މެނޭޖިންގ ޑިރެކްޓަރު އިބްރާހިމް ޒިޔާއު މުޙައްމަދު ވިދާޅުވި ގޮތުގައި، އަތޮޅުތަކުގައި ގާއިމްކުރެވޭ ކްރިއޭޓަރ ހަބުތަކާއެކު، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ތަސައްވުރާ އެއްގޮތަށް ރާއްޖޭގައި ފަންނުވެރި އިޤްތިޞާދެއް ބިނާކުރުމަށް ކުރެވޭ މަސައްކަތް ހަލުވިވެގެންދާނެއެވެ. އަދި ފަންނުވެރިންނަށް ފުރުޞަތުތައް ފަހިވުމާއެކު، ދިމާވާ ދަތިތަކަށް ހައްލުވެސް ލިބިގެންދާނެ ކަމަށް އޭނާ ވިދާޅުވިއެވެ.

ރާއްޖޭގައި ފަންނުވެރި އިޤްތިޞާދެއް ބިނާކުރުމަށް ބީސީސީން ދަނީ ގިނަ މަސައްކަތްތަކެއް ކުރަމުންނެވެ. މީގެ ތެރޭގައި މާލޭގެ އިތުރުން ބައެއް ރަށްރަށުގައި ކްރިއޭޓިވް ކޮންފްލުއެންސްތައް ބާއްވައި ފަންނުވެރިންގެ ޚިޔާލާއި މަޝްވަރާ ހޯދުން ހިމެނެއެވެ. އަދި މާލޭގައި ގާއިމުކުރާ ކްރިއޭޓަރ ހަބުގެ މައި އިމާރާތުގެ މަސައްކަތްވެސް މިހާރު ވަނީ ފަށާފައެވެ.

ރާއްޖޭގައި ފަންނުވެރި އިޤްތިޞާދެއް ބިނާކުރުމަކީ ވަޒީރުންގެ މަޖިލީހުގެ ލަފާފުޅާއެކު ރައީސް ޑރ. މުޙައްމަދު މުއިއްޒު ނިންމަވާފައިވާ މުހިންމު ނިންމެވުމެކެވެ. މި މަސައްކަތުގެ ދަށުން ފަންނީ އަދި އީޖާދީ މަސައްކަތްކުރުމަށް ޝައުޤުވެރިވާ ފަރާތްތަކަށް މާލީ އެހީތެރިކަން ފޯރުކޮށްދިނުމަށް ފަންޑެއް ވަނީ އިފްތިތާޙްކޮށްފައެވެ. މި ފަންޑުން ފިލްމް، މިއުޒިކް، އާޓްސް އެންޑް ކްރާފްޓް އަދި ޑިޖިޓަލް ކޮންޓެންޓް ކްރިއޭޝަންގެ ދާއިރާތަކަށް އެހީތެރިކަން ފޯރުކޮށްދެއެވެ.