ޗައިނާ މާކެޓުން ރާއްޖެއަށް ޑިމާންޑު އޮތްކަމަށް ސަފީރު ވިދާޅުވެއްޖެ

ރާއްޖެއިން ޗައިނާއަށް ކަނޑައަޅުއްވާފައި ހުންނަވާ ސަފީރު ޑރ. ފަޟީލް ނަޖީބު ވިދާޅުވެފައިވަނީ ޗައިނާ މާކެޓުން ރާއްޖެއަށް ޑިމާންޑު އެބައޮތްކަމަށާއި ޤައުމީ އެއަރލައިނުން ޗައިނާއަށް ފެށި ދަތުރުތައް ކާމިޔާބު ދަތުރުތަކަކަށް ވެގެންދާނެކަމަށެވެ. 

މޯލްޑިވިއަންގެ ސީދާ ދަތުރުތައް ޗައިނާގެ ބެއިޖިންއަށް ފަށާފައިވަނީ މިމަހުގެ 24ވަނަ ދުވަހުއެވެ. ކޮންމެ ހަފްތާއަކު ބެއިޖިންގއަށް އެއް ދަތުރު ކުރުމަށް ވަނީ ހަމަޖެހިފައެވެ. މީގެ އިތުރުން، ޤައުމީ އެއަރލައިނުން ޗެންޑޫއަށްވެސް ޝެޑިއުލް ދަތުރުތައް ފަށާފައިވާއިރު، މިމަހުގެ 27ވަނަ ދުވަހު ޝަންގހާއީއަށްވެސް ދަތުރު ފެށުމަށް ވަނީ ހަމަޖެހިފައެވެ.

 ސަފީރު ޑރ. ފަޟީލް ނަޖީބު ވިދާޅުވީ، މޯލްޑިވިއަންގެ ދަތުރުތަކަށް އޮތް ޑިމާންޑުން ފެންނަނީ ވަރަށް އުންމީދީ މަންޒަރެއްކަމަށެވެ. އަދި ޗައިނާ މާކެޓަކީ ރާއްޖެއަށް ގިނަ އަދަދަކަށް ފަތުރުވެރިން ލިބޭނެ މާކެޓެއްކަމަށާއި، މިއީ ރާއްޖޭގެ ފަތުރުވެރިކަމަށް އަދި އިޤްތިޞާދަށް ވަރަށް ކާމިޔާބު ދަތުރުތަކަކަށް ވެގެންދާނެކަން ވަޒީރު ފާހަގަކުރެއްވިއެވެ.

ލަސްވެފައި ނަމަވެސް ފެށުނުކަމަކީ ވަރަށް ރަނގަޅު ކަމެކޭ އަޅުގަނޑު ދަންނަވާނީ. މިކަން ހިފެހެއްޓުން މީގަ އެންމެ މުހިންމު ކަމަކީ. ޗައިނާ މާކެޓްއަކީ މީހުން ނުލިބޭނެ މާކެޓެއް ނޫން. މިއީ ވަރަށް ބޮޑު މާކެޓެއް. ދުނިޔޭގައި އޮތް މިޑްލް ކްލާސް އެންމެ ބޮޑު މާކެޓް މިއީ އިނގޭތޯ. އެހެންވީމަ މިތަނުން އަޅުގަނޑުމެން މަސައްކަތް ކޮށްފިކަމަށްވަންޏާ އަޅުގަނޑުމެން މި ޚިދުމަތް ދަމަހައްޓައިފިކަމަށްވަންޏާ މިއީ ވަރަށް ސަކްސެސްފުލް ސެކްޓަރ އަކަށްވާނެ މޯލްޑިވިއަންއަށް

ސަފީރު

ސަފީރު އިތުރަށް ވިދާޅުވީ ޗައިނާގެ ޓީވީތަކާއި ނޫސްތަކުން ރާއްޖެއަށް ވަރަށް ބޮޑު ސަމާލުކަމެއްދޭކަމަށެވެ. މިއީ މުޅި ދިވެހިރާއްޖެއަށް ލިބޭ ކުރިއެރުމަކަށްވާނެތީ މޯލްޑިވިއަންގެ އެ މަސައްކަތައް ދިވެހި އެންމެހައި ރައްޔިތުން އެއްބާރުލުން ދިނުމަށް ވަޒީރު ވަނީ އެދިވަޑައިގަންނަވާފައެވެ.