ޢުމްރާއަށް މީހުން ގެންދިއުމުގެ ނަމުގައި އޮޅުވާލައިގެން ފައިސާ ނެގި މައްސަލަ ޕީޖީއަށް

ޢުމްރާއަށް މީހުން ގެންދިއުމުގެ ނަމުގައި އަލްމަޝްއަރް ޕްރައިވެޓް ލިމިޓެޑުން އޮޅުވާލައިގެން ފައިސާ ހޯދި މައްސަލައިގައި ދަޢުވާ ކުރުމަށް އެދި ފުލުހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.

ފުލުހުން މިއަދު ހާމަކުރި ގޮތުގައި، 2024 ވަނަ އަހަރު ޢުމްރާއަށް މީހުން ގެންދާނެ ކަމަށް ބުނެ އަލްމަޝްއަރް ޕްރައިވެޓް ލިމިޓެޑުން 27 މީހެއްގެ އަތުން 500،000 ރުފިޔާއަށްވުރެ ގިނަ ރުފިޔާ ނަގައި، މަކަރާއި ހީލަތުން ފައިސާ ނަގައި އެ ފައިސާއަށް ޚިޔާނާތްތެރިވެފައިވާ މައްސަލައިގައި ދަޢުވާކޮށްދިނުމަށް އެދި މި މަހުގެ 19 ވަނަ ދުވަހު ޕްރޮސެކިއުޓަރ ޖެނެރަލްގެ އޮފީހަށް ވަނީ ފޮނުވާފައެވެ.

މި މައްސަލައިގައި ދަޢުވާކުރަނީ އަލްމަޝްއަރް ޕްރައިވެޓް ލިމިޓެޑްގެ ކުންފުނީގެ ވެރިޔާ، މ. ހަވީރީފިނި ޢަލީ ފާރިޝްގެ މައްޗަށެވެ. މީގެ އިތުރުން، އަލްމަޝްއަރް ޕްރައިވެޓް ލިމިޓެޑުގެ އިތުރުން ޓްރިއާ ޕްރައިވެޓް ލިމިޓެޑާއި، ހާފްޓޯން މޯލްޑިވްސް ޕްރައިވެޓް ލިމިޓެޑްގެ މައްޗަށްވެސް ދަޢުވާކޮށްދިނުމަށް ފުލުހުން ވަނީ އެދިފައެވެ.

ރާއްޖެއިން މީހުން ޢުމްރާއަށް ގެންދިއުމަށް ނަގަންޖެހޭ ހުއްދަ ނެތި އަދި ޢުމްރާއަށް މީހުން ގެންދިއުމާ ބެހޭ އުސޫލާ ޚިލާފަށް އަލްމަޝްއަރު ޓުއާރސްއިން ޢަމަލުކޮށްފައިވާތީ، މި މައްސަލަ އިސްލާމީ ކަންތައްތަކާ ބެހޭ ވުޒާރާއިން ފުލުހުންނަށް ހުށަހެޅީ މިދިޔަ އަހަރުގެ އޭޕްރިލް މަހުގެ 17 ވަނަ ދުވަހުއެވެ.

އިސްލާމިކް މިނިސްޓްރީން ވަނީ އެ ގްރޫޕުން ޢުމްރާއަށް ގެންދިއުމުގެ ހުއްދަ ނެތި ޢުމްރާއަށް ގެންދިއުމާއި، އޮޅުވާލައިގެން މީހުން އަތުން ފައިސާ ނެގުމާއި، އަދި އެ ގްރޫޕުން ޢުމްރާއަށް ގެންދިޔަ ބަޔަކު ރާއްޖެ ނާދެވި ހާލުގައި ޖެހުނު މައްސަލަވެސް ބަލާފައެވެ.