ދުނިޔޭގެ ފަތުރުވެރިކަން އަނބުރާ އައިސް 2019 ގެ ފެންވަރަށް - ޔޫ.އެން.ޑަބްލިއު.ޓީ.އޯ

ދުނިޔޭގެ ފަތުރުވެރިކަމުގެ ސިނާއަތު ކޮވިޑް-19 ގެ ބަލިމަޑުކަމުން އަރައިގަނެ، 2019 ވަނަ އަހަރުގެ ފެންވަރަށް އަނބުރާ އައިސްފައިވާކަމަށް އދ. ގެ ވޯލްޑް ޓޫރިޒަމް އޯގަނައިޒޭޝަން (ޔޫ.އެން.ޑަބްލިއު.ޓީ.އޯ) އިން ހާމަކޮށްފިއެވެ.

2024 ވަނަ އަހަރުގެ ތަފާސްހިސާބުތަކަށް ބަލާއިރު، ގާތްގަނޑަކަށް 1.4 ބިލިއަން މީހުން ބޭރު ޤައުމުތަކަށް ދަތުރުކޮށްފައިވެއެވެ. މިއީ ކޮވިޑް-19 ގެ ބަލިމަޑުކަމުގެ ކުރިން، 2019 ވަނަ އަހަރު ދަތުރުކުރި މީހުންގެ އަދަދާ އަޅާބަލާއިރު 99 އިންސައްތައެވެ.

މި ދަތުރުތަކުގައި ޖުމްލަ  1.9 ޓްރިލިއަން ޑޮލަރު ހޭދަކޮށްފައިވާއިރު، އެވްރެޖްކޮށް ކޮންމެ ފަތުރުވެރިއަކު 1,000 ޑޮލަރަށްވުރެ ގިނައިން ހޭދަކޮށްފައިވެއެވެ.

އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޔޫރަޕަށެވެ. 2024 ވަނަ އަހަރު 747 މިލިއަން ފަތުރުވެރިން ޔޫރަޕަށް ޒިޔާރަތްކޮށްފައިވެއެވެ. މީގެ ތެރެއިން އެންމެ ގިނަ ފަތުރުވެރިން ޒިޔާރަތްކޮށްފައިވަނީ ފްރާންސްއަށެވެ. ފްރާންސްއަށް 100 މިލިއަން ފަތުރުވެރިން ޒިޔާރަތްކޮށްފައިވާއިރު، ސްޕެއިނަށް 98 މިލިއަން ފަތުރުވެރިން ޒިޔާރަތްކޮށްފައިވެއެވެ.

އޭޝިއާ އަދި ޕެސިފިކް ސަރަހައްދަށް 316 މިލިއަން ފަތުރުވެރިން ޒިޔާރަތްކޮށްފައިވާއިރު، އެމެރިކާއަށް 213 މިލިއަން، މެދުއިރުމައްޗަށް 95 މިލިއަން އަދި އެފްރިކާއަށް 74 މިލިއަން ފަތުރުވެރިން ޒިޔާރަތްކޮށްފައިވެއެވެ.

ފަތުރުވެރިކަމުގެ ސިނާއަތު މިހާ ބާރު ސްޕީޑެއްގައި ކުރިއަރަމުން ދިއުމާއެކު، ބައެއް ޤައުމުތަކުން ފަތުރުވެރިކަން ހިފެހެއްޓުމަށް އެކި ފިޔަވަޅުތައް އަޅަމުންދާކަން ފާހަގަކުރެވެއެވެ. މިގޮތުން ސްޕެއިނާއި އިޓަލީގައި ފަތުރުވެރިކަން މަދުކުރުމަށް އެކި ފިޔަވަޅުތައް އަޅަމުންދާކަން ޔޫ.އެން.ޑަބްލިއު.ޓީ.އޯ އިން ފާހަގަކޮށްފައިވެއެވެ.