ކާބޫލުގައި ހުޅުވުނު އައު މިސްކިތަށް "ޣައްޒާ މިސްކިތް" ގެ ނަން ދީފި

އަފްޣާނިސްތާނުގެ ވެރިރަށް ކާބޫލުގައި އަލަށް ހުޅުވުނު މިސްކިތަކަށް "ޣައްޒާ މިސްކިތް" ގެ ނަން ދީފިއެވެ. މިއީ އިސްރާއީލުން ޣައްޒާއަށް ކުރަމުންދާ ހަނގުރާމައިގެ ޝިކާރައަކަށްވެފައިވާ މީހުންނަށް އިޙްތިރާމް އަދާކުރުމުގެ ގޮތުން އެޅި ފިޔަވަޅެކެވެ.

ޖެނުއަރީ 11 ވަނަ ދުވަހު ހުޅުވުނު މި މިސްކިތް ހުންނަނީ ކާބޫލުގެ ޤުވާ-އެ-މަރްކަޒް ސަރަޙައްދުގައެވެ. މިއީ ވިޔަފާރި ޕްލާޒާތަކާއި މަޝްހޫރު ކާޕެޓް މާރުކޭޓާ ކައިރި ސަރަޙައްދެކެވެ. 500 އަށްވުރެ ގިނަ ނަމާދުވެރިންނަށް ޖާގަ ލިބޭ މި ދެ ބުރި އިމާރާތް އަޅާފައިވަނީ އާންމުންގެ އެހީއިންނެވެ. ބިން ހަދިޔާކޮށްފައިވަނީ ކާބޫލު މުނިސިޕަލިޓީންނެވެ.

ފަންޑު އެއްކުރުމުގެ މަސައްކަތް ކުރި ވިޔަފާރިވެރިއެއް ކަމަށްވާ ހާޖީ ހަބީބުއްދީން ރެޒާއީ ބުނި ގޮތުގައި މި މިސްކިތަށް ޣައްޒާ މިސްކިތުގެ ނަން ދީފައިވަނީ ޣައްޒާގެ ފިރިހެނުންނާއި، އަންހެނުންނާއި، ކުޑަކުދިންނާއި، ޒުވާނުންނާއި އަދި ބޮޑެތި މީހުން އެމީހުންގެ ބިން ދިފާޢުކުރުމަށް ކުރަމުންދާ މަސައްކަތާއި ޤުރުބާނީތަކަށް އިޙްތިރާމް އަދާކުރުމުގެ ގޮތުންނެވެ.

އަފްޣާނިސްތާނުގެ ރައްޔިތުން ފަލަސްޠީނަށް ވަރަށް ބޮޑަށް ތާއީދުކުރެއެވެ. މީގެ ސަބަބަކީ އެތައް އަހަރެއް ވަންދެން ބޭރުގެ އިސްތިޢުމާރުގެ ދަށުގައި ދިރިއުޅުމުގެ ތަޖުރިބާ އަފްޣާނިސްތާނުގެ ރައްޔިތުންނަށް ލިބިފައިވުމެވެ. 1979 އިން 1989 އަށް ދެމިގެންދިޔަ ސޯވިއެޓް-އަފްޣާން ހަނގުރާމައާއި 2001 ގައި އެމެރިކާ އިންވޭޝަނާ ގުޅިގެން ހިނގި 20 އަހަރުގެ ހަނގުރާމައިގެ ތެރޭގައި އަފްޣާނިސްތާނުގެ ރައްޔިތުން މިކަން ތަޖުރިބާކޮށްފައިވެއެވެ.

އަފްޣާނިސްތާނަކީ 1948 ގައި ފަލަސްޠީނު ނޭޝަނަލް ކައުންސިލުން އިޢުލާންކުރި މިނިވަންކަން ބަލައިގަތް ފުރަތަމަ ޢަރަބި ނޫން ޤައުމެވެ. އޭގެ ފަހުން އައި ހުރިހާ އަފްޣާނު ސަރުކާރުތަކުންވެސް އިސްރާއީލުން ފަލަސްޠީނަށް ކުރާ ހަނގުރާމަތަކާއި ފަލަސްޠީނުގެ ބިންތައް އޮކިއުޕައިކުރުމާ ދެކޮޅަށް ފަލަސްޠީނުގެ އަރިހުގައި ވަނީ ތެދުވެފައެވެ.

ޣައްޒާ މިސްކިތުގެ އިމާމު ޢަބްދުއްރަޤީބް ޙަކީމީ ވިދާޅުވި ގޮތުގައި ކޮންމެ މުސްލިމަކުވެސް އަދި އިންސާނަކުވެސް ފަލަސްޠީނުގެ ރައްޔިތުންނާއި ޣައްޒާގެ ރައްޔިތުން ވޭތުވެދިޔަ އަހަރާއި ބައިގައި ތަޙައްމަލުކުރަންޖެހުނު ކަންކަމާ ގުޅިގެން އެކުވެރިކަން ދައްކަންޖެހެއެވެ.