ޚަބަރު
ތުރުކީގައި އިމާރާތެއް ވެއްޓި 2 މީހަކު އިމާރާތުގެ ދަށުގައި ތާށިވެއްޖެ

ޙާދިސާ ހިނގި ސަރަޚައްދު ފޮޓޯ:އިންޓަނެޓް
ތުރުކީގެ މެދުތެރޭގައި ހުރި ކޮންޔާ ސިޓީގައި އިމާރާތެއް ވެއްޓި، އިމާރާތުގެ ދަށުގައި ތާށިވި ދެ މީހަކު ސަލާމަތްކުރުމަށް ސަލާމަތީ ޚިދުމަތްތަކުން މަސައްކަތް ކުރަމުންދާ ކަމަށް އެ ގައުމުގެ އިސްވެރިން ވަނީ ބުނެފައެވެ. މި ހާދިސާގައި މިހާތަނަށް އެއްވެސް މީހަކު މަރުވެފައި ނުވާ ކަމަށް ވެސް އެ ފަރާތްތަކުން ބުނެއެވެ.
ތުރުކީގެ އެތެރޭގެ ކަންތައްތަކާ ހަވާލުވެ ހުންނެވި ވަޒީރު އަލީ ޔަރްލިކަޔާ ވިދާޅުވި ގޮތުގައި، ހުކުރު ދުވަހުގެ ރޭ ވެއްޓުނު މި އިމާރާތަކީ 4 ބުރީގެ އެޕާޓްމަންޓް އިމާރާތެކެވެ. އަދި މި އިމާރާތުގައި 79 މީހުން ދިރިއުޅޭ ކަމަށް ރަޖިސްޓްރީ ކުރެވިފައިވެއެވެ. މި އިމާރާތް ވެއްޓުނު ސަބަބު އަދި ސާފުވެފައި ނުވާ ކަމަށާއި، އެކަން ބަލައި ތަޙުޤީޤު ކުރެވޭނެ ކަމަށް ވެސް އޭނާ ވިދާޅުވިއެވެ.
މި ހާދިސާ ހިނގާފައިވަނީ، ތުރުކީގެ ސްކީ ރިސޯޓެއްގައި ހުރި 12 ބުރީގެ ހޮޓަލެއްގައި ހިނގި އަލިފާނުގެ ހާދިސާއެއްގައި 78 މީހުން މަރުވިތާ އެންމެ 3 ދުވަސް ފަހުންނެވެ. އެ ހާދިސާގައި ވެސް އިމާރާތުގެ ސަލާމަތީ ކަންކަން ހުރި ގޮތާ މެދު ސުވާލު އުފެވާލު އުފެދިފައިވެއެވެ.
މީގެ އިތުރުން، ދެ ހަފުތާއެއްހާ ދުވަސް ފަހުން ފާހަގަ ކުރާނީ ތުރުކީގެ ދެކުނާއި ސީރިއާގެ އުތުރުގައި ހިނގި ބިންހެލުމުގެ ހާދިސާގެ ދެވަނަ އަހަރީ ދުވަހެވެ. އެ ހާދިސާގައި 59،000 އަށް ވުރެ ގިނަ މީހުން މަރުވެފައިވެއެވެ. މި ހާދިސާގައި މަރުވި މީހުންގެ އަދަދު މަތިވެފައިވަނީ އިމާރާތް ކުރުމުގެ ގަވާއިދުތަކަށް އަމަލު ނުކުރުމުގެ ސަބަބުން ކަމަށް ބެލެވެއެވެ.