ދުނިޔެ
ސަޢޫދީ ޢަރަބިއްޔާގެ ތިމާވެށި ރައްކާތެރިކުރުމަށް އޭއައި ޓެކްނޮލޮޖީގެ ބޭނުން ހިފަނީ

އޭއައި ޓެކްނޮލޮޖީ ފޮޓޯ:އިންޓަނެޓް
ސަޢޫދީ ޢަރަބިއްޔާގެ ވިޝަން 2030 ގެ ދަށުން، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ތިމާވެށީގެ ގޮންޖެހުންތަކާ ކުރިމަތިލުމަށް އެ ޤައުމުން ވަނީ ބޮޑެތި މަސައްކަތްތަކެއް ފަށާފައެވެ. މި މަސައްކަތުގެ ތެރޭގައި ބިމުގެ ފެންވަރު ދަށްވުން ހުއްޓުވުމާއި، ފެނުގެ ވަސީލަތްތައް ބެލެހެއްޓުމާއި، ދެމެހެއްޓެނިވި އާދަތައް ކުރިއެރުވުން ހިމެނެއެވެ.
ކިންގް ޢަބްދުﷲ ޔުނިވަރސިޓީ އޮފް ސައިންސް އެންޑް ޓެކްނޮލޮޖީ (ކައުސްޓް) އިން ވަނީ ޖެނެރޭޓިވް އޭއައި ދިރާސާކުރުމަށް ސެންޓަރ އޮފް އެކްސެލެންސް ފޯ ޖެނެރޭޓިވް އޭއައި ޤާއިމްކޮށްފައެވެ. މި ސެންޓަރުން ބަލަނީ ފެނުގެ ދަތިކަމާއި ބިން ހަލާކުވުން ފަދަ މައްސަލަތަކަށް ހައްލު ހޯދުމަށެވެ.
ކައުސްޓްގެ ކްލައިމެޓް އެންޑް ލައިވަބިލިޓީ އިނީޝިއޭޓިވްގެ ޑައިރެކްޓަރ ޕްރޮފެސަރ މެތިއު މެކާބެ ވިދާޅުވީ، އޭއައި ވަނީ ބިމުގެ ނިޒާމުތަކާ ބެހޭ ގޮތުން އަހަރުމެންގެ ދެނެގަތުމާއި މާނަކުރުން އިންޤިލާބީ ބަދަލަކަށް ގެނެސްފައި ކަމަށެވެ. އަދި މިކަމުގެ ސަބަބުން އަވަހަށް މަޢުލޫމާތު އެއްކޮށް، އާ ހޯދުންތަކާއި ޢަމަލީ ގޮތުން ބޭނުންކުރެވޭނެ އިރުޝާދުތައް ލިބޭ ޒަމާނަކަށް ވަދެވިފައިވާ ކަމަށެވެ.
ސެންޓަރުގެ ދިރާސާތަކުގައި ބަލަނީ ސެޓެލައިޓް އިމޭޖިންގ އާއި ބިން ދިރާސާކުރުމަށް އޭއައި އާލާތްތައް ތަރައްޤީކުރުމަށެވެ. މީގެ ތެރޭގައި ޑްރޯން އާއި ސެޓެލައިޓް ބޭނުންކޮށްގެން ތިމާވެށީގެ ބަދަލުތައް ވަގުތުން ބެލުން ހިމެނެއެވެ.
ސަޢޫދީ ގްރީން އިނީޝިއޭޓިވްގެ ދަށުން 2030 ވަނަ އަހަރާ ހަމައަށް 10 ބިލިއަން ގަސް އިންދުމާއި 40 މިލިއަން ހެކްޓަރު ބިން އާރާސްތުކުރުމުގެ ލަނޑުދަނޑިތަކަށް ވާސިލުވުމަށް އޭއައި ޙައްލުތައް ބޭނުންކުރަމުންދެއެވެ. މީގެ އިތުރުން، ސަޢޫދީ ޑޭޓާ އެންޑް އޭއައި އޮތޯރިޓީ (އެސްޑީއޭއައިއޭ) އިން ވަނީ މޫސުމަށް އަންނަ ބަދަލުތަކާ ކުރިމަތިލުމަށް ޑޭޓާއަށް ބިނާކޮށް އުފެއްދުންތެރި ސްޓްރެޓެޖީތަކެއް އެކުލަވާލުމަށް އެހެން ސަރުކާރު އިދާރާތަކާއެކު މަސައްކަތް ފަށާފައެވެ.
ކައުސްޓްގެ ކްލައިމެޓް އެނަލިޓިކްސްގެ އެސިސްޓެންޓް ޕްރޮފެސަރ ހިލްކެ ބެކް ވިދާޅުވީ، މޫސުމަށް އަންނަ ބަދަލުތަކުގެ ސަބަބުން ކަނޑުގެ ލޮނުގަނޑު ބޮޑުވުން ފަދަ ނުރައްކާތެރި މޫސުމީ ހާދިސާތައް ދެނެގަތުމަށް އޭއައި ވަރަށް މުހިންމު ދައުރެއް އަދާކުރާނެ ކަމަށެވެ.
މި މަސައްކަތްތަކުގެ ސަބަބުން، ސަޢޫދީ ޢަރަބިއްޔާގެ ބިމުގެ 90 އިންސައްތައަކީ ޞަޙަރާ ކަމުގައިވީ ނަމަވެސް، އެ ޤައުމުގެ ތިމާވެށި ރައްކާތެރިކުރުމަށް އިތުރު ފިޔަވަޅުތަކެއް އެޅުމަށް މަގުފަހިވެގެންދާނެއެވެ. އޭއައި ބޭނުންކޮށްގެން ކުރެވޭ ދިރާސާތަކުން ލިބޭ މަޢުލޫމާތުގެ އަލީގައި، ބިމުގެ ފެންވަރު ރަނގަޅުކުރުމާއި، ފެނުގެ ވަސީލަތްތައް ހީލަތްތައް ހެޔޮ ގޮތުގައި ބޭނުންކުރުމާއި، ތިމާވެށި ރައްކާތެރިކުރުމަށް އެޅޭ ފިޔަވަޅުތައް އިތުރަށް ހަރުދަނާކުރެވޭނެއެވެ.
ސަޢޫދީ ޢަރަބިއްޔާގެ ވިޝަން 2030 ގެ ލަނޑުދަނޑިތައް ޙާޞިލުކުރުމަށް އޭއައި ޓެކްނޮލޮޖީ ބޭނުންކުރުމަކީ އެ ޤައުމުގެ ދެމެހެއްޓެނިވި ތަރައްޤީއަށް އެޅޭ މުހިންމު ފިޔަވަޅެކެވެ. މި މަސައްކަތްތަކުގެ ސަބަބުން، އެ ޤައުމުގެ ތިމާވެށި ރައްކާތެރިކުރުމާއި، މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލުކަން އިތުރުވެ، މުޅި ސަރަޙައްދަށް މިސާލަކަށް ވެގެންދާނެއެވެ.