ޓޯވް ކުރުމުން ނުގެންގޮސް ހުރި ގިނަ ވެހިކަލްތަކެއް ނައްތާލައިފި

ޓޯވް ކުރުމުގެ ސަބަބުން ވެރިފަރާތުން ނުގެންގޮސް ހުރި ގިނަ ވެހިކަލްތަކެއް ފުލުހުން ނައްތާލައިފިއެވެ. 

ޤަވާއިދާ ޚިލާފަށް މާލޭ އޭރިއާގައި ޕާކުކޮށްފައި ހުރުމުގެ ސަބަބުން ޓޯވްކޮށްފައި ހުރި ވެހިކަލްތަކުގެ ތެރެއިން ފުލުހުން ހޮނިހިރު ދުވަހު ނައްތާލާފައިވަނީ 446 އުޅަނދެކެވެ. 

ފުލުހުންގެ އިދާރާއިން ހާމަކޮށްފައިވާ ގޮތުގައި، ނައްތާލެވުނު އުޅަނދުތަކުގެ ތެރޭގައި ހިމެނެނީ ދެ ފުރޮޅުލީ 378 އުޅަނދާއި، ހަތަރު ފުރޮޅުލީ 40 އުޅަނދާއި އަދި 28 ބައިސްކަލެވެ.

ފުލުހުން ޓޯވ ކޮށްފައިވާ އެއްގަމު އުޅަނދުތަކުގެ ތެރެއިން ވެރިފަރާތުން ނުގެންގޮސް ހުރި 446 އުޅަނދު ގަވާއިދުގައިވާ ގޮތުގެ މަތިން މިއަދު ވަނީ ނައްތާލާފައި.

މިއަދު ނައްތާލި އުޅަނދުތަކުގެ ތެރޭގައި ހިމެނެނީ ދެ ފުރޮޅުލީ 378 އުޅަނދާއި ހަތަރު ފުރޮޅުލީ 40 އުޅަނދު އަދި 28 ބައިސްކަލް. pic.twitter.com/pgKJpCDnoa

— Maldives Police (@PoliceMv) January 25, 2025

މަގުމަތީގެ ރައްކާތެރިކަން ކަށަވަރުކުރުމުގެ ގޮތުން، ޤަވާއިދާ ޚިލާފަށް ޕާކުކޮށްފައި ހުންނަ އުޅަނދުތައް ޓޯވކުރުމުގެ މަސައްކަތުގެ ތެރެއިން 2024ވަނަ އަހަރު ޖުމްލަ 15،514 އުޅަނދެއް ޓޯވކޮށްފައިވާކަމަށް ފުލުހުން ހާމަކޮށްފައިވެއެވެ.

ފުލުހުންގެ ތަފާސް ހިސާބުތައް ދައްކާގޮތުން، މިދިޔަ އަހަރު ހިންގި ޓޯވް އޮޕަރޭޝަންތަކުގައި ޖުމްލަ 15،514 އުޅަނދެއް އެ އިދާރާގެ ބެލުމުގެ ދަށަށް ވަނީ ގެންގޮސްފައެވެ. އޭގެ ތެރެއިން %75 އުޅަނދަކީ ސައިކަލެވެ.

އެގޮތުން، މިދިޔަ އަހަރު ޓޯވކުރި އުޅަނދުތަކުގެ ތެރޭގައި ހިމެނެނީ 11،645  ސައިކަލާއި، 2،567 ކާރާއި 478 ޕިކަޕާއި 369 ވޭން އަދި 87 ޓްރަކެވެ. އަދި އޭގެ ތެރެއިން 546  އުޅަނދެއް ނައްތާލާފައިވާއިރު، 13،562  އުޅަނދެއް ވަނީ އޭގެ ވެރިފަރާތާއި ހަވާލުކޮށްފައިކަމަށް ފުލުހުން ހާމަކޮށްފައިވެއެވެ. 

މި އޮޕަރޭޝަންތަކާ ގުޅިގެން ފުލުހުން ވިދާޅުވެފައިވާ ގޮތުގައި، މަގުމަތީގެ ރައްކާތެރިކަން ކަށަވަރުކުރުމަށް އާންމުންގެ އެއްބާރުލުން ވަރަށް މުހިންމެވެ.