ޚަބަރު
ރައްޔިތުންނާ ރިވެތި ބަހުން ވާހަކަ ނުދެއްކޭނޭ އެއްވެސް ޙާލަތެއް ފުލުހުންނަށް އައިސްގެން ނުވާނެ: ސީޕީ

ފުލުހުންގެ 38 ވަނަ ޕޮލިސް އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ވަނައަކަށް ދިޔަ އޮފިސަރަކަށް ކޮމިޝަނަރ އޮފް ޕޮލިސް އެވޯޑު އަރުވަނީ، ފޮޓޯ: ޕޮލިސް
ހުލާސާ
ފުލުހުންގެ ފުށުން ފެންނަން ބޭނުންވާ ތިން ކަމެއް ސީޕީ ފާހަގަކުރެއްވި.
މި ކޯހުގައި 127 އޮފިސަރަކު ސަނަދު ހާސިލްކުރެއްވި.
ރައްޔިތުންނަށް ޚިދުމަތްކުރުމަށް ނިކުންނަ ފުލުހުންނަށް ރައްޔިތުންނާ ރިވެތި ބަހުން ވާހަކަ ނުދެއްކޭނޭ އެއްވެސް ޙާލަތެއް އައިސްގެން ނުވާނެކަމަށް، ކޮމިޝަނަރ އޮފް ޕޮލިސް (ސީޕީ)، ޢަލީ ޝުޖާއު ވިދާޅުވެއްޖެއެވެ.
ދ. ވާނީގައި އޮތް ފުލުހުންގެ 38 ވަނަ ޕޮލިސް އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުން ސީޕީ މިހެން ވިދާޅުވީ، ފުލުހުން ޚިދުމަތަށް ނިކުންނައިރު ސަމާލުކަންދޭންޖެހޭ ތިން ކަމެއް ފާހަގަކުރައްވަމުންނެވެ.
އެގޮތުން ފުލުހުން މަސައްކަތަށް ނިކުންނަނީ ރައްޔިތުންނަށް ޚިދުމަތްދޭން ކަމަށާއި، އެހެންކަމުން އެ ޒިންމާ އަދާކުރަމުންދާއިރު ރައްޔިތުންނަށްވުރެ ވަކިން މާތްކޮށް ފުލުހުން ވާހަކަ ދައްކަންޖެހޭ ބަޔަކު ނުތިބޭނެކަމަށް ސީޕީ ވިދާޅުވިއެވެ.
ރައްޔިތުންނާ ރިވެތި ބަހުން ވާހަކަ ނުދެއްކޭނޭ އެއްވެސް ޙާލަތެއް އައިސްގެން ނުވާނެ. ރައްޔިތުންނަށްވުރެން ވަކިން މާތްކޮށް ވާހަކަ ދައްކަންޖެހޭ އިތުރު ބަޔަކު ނުތިބޭނެ. ފުލުހުންގެ މަސައްކަތަށް ރައްދުވާ މި ނޭދެވޭ ސިފަ ތިޔަ އޮފިސަރުންގެ ފުށުން ޙައްލުކޮށްދޭނެކަމަށް އުއްމީދުކުރަން.
ތަމްރީނު ކޯހުގެ ދަސްވެނީންނާ މުޙާތަބުކުރައްވައި ސީޕީ ވިދާޅުވިއެވެ.
އަދި ފުލުހުންގެ ޑިއުޓީގެ ވަގުތުގައި މޯބައިލް ފޯނު ބޭނުންކުރަން ތިބުމުގެ ސަބަބުން މަގުމަތީގައި ހިނގާކަންކަން ނޭންގޭ ހިސާބަށް ކަންތައްތައްދާކަމުގެ ކަންބޮޑުވުން ރައްޔިތުންގެ ފުށުން ހާމަކޮށްފައިވާ ކަމަށާއި، އެހެންކަމުން ސީޕީ ދެން ވިދާޅުވީ، ޑިއުޓީގެ ވަގުތުގައި ޑިއުޓީގެ ބޭނުމަށް ނޫނީ މޯބައިލް ފޯން ބޭނުންނުކުރުމަށެވެ. އަދި ޑިއުޓީގެ ހުރިހާ ވަގުތެއްގައި ރާއްޔިތުންނަށް ޙާއްސަވެގެން ތިބުމަށް ސީޕީ ވިދާޅުވިއެވެ.
ވަރަށް ގިނައިން ރައްޔިތުންކުރާ އެއް ޝަކުވާއަކީ، ފުލުހުން މަގުމަތިން ފެނެއޭ، އެކަމަކު ތިބެނީ ފޯނާ ކުޅޭށޭ. މަގުމަތީގައި ހިނގާ އެއްވެސްކަމަކަށް ފަރުވާ ނުބަހައްޓަ، ތިބެނީ ފޯނަށް ގެއްލިފައޭ. މިކަން ރަނގަޅުކުރަން އެބަޖެހޭ. އުއްމީދުކުރަން، ތިޔަ އޮފިސަރުން ރައްޔިތުންގެ ޚިދުމަތުގެ ތިބޭއިރު، އަބަދުވެސް ރައްޔިތުންނަށް ޙާއްސަވެގެން ތިބޭނެކަމަށް.
ރައްޔިތުންގެ އެއް ޝަކުވާ ޙިއްސާކުރައްވަމުން ސީޕީ ވިދާޅުވިއެވެ.
ފަހު ކަމެއްގެ ގޮތުން ސީޕީ ފާހަގަކުރެއްވީ، ފުލުހުންނަށް ލިބޭ ޤާނޫނީ ބާރުތައް ޒިންމާދާރުކަމާއެކު ބޭނުންކުރުމުގެ ވާހަކައެވެ. އެގޮތުން، އެ ބާރުތަކަކީ ހިތުހުރިގޮތަކަށް ބޭނުންކުރުމަށް ފުލުހުންނަށް ލިބޭ ބާރުތަކެއް ނޫން ކަމަށާއި، ބާރުގެ ބޭނުން ނުކޮށް، ދިމާވާ ކަންކަން ޙައްލުކުރުމަށް މަގުދައްކައިދީ، އިސްލާޙުކުރަން ފުރުސަތުދޭ ބަޔަކަށް ފުލުހުން ވާންޖެހޭކަމަށް ވިދާޅުވިއެވެ.
ސީޕީގެ ވާހަކަފުޅު ނިންމާލެއްވުމުގެ ކުރިން، ފުލުހުންގެ ޚިދުމަތުގެ ފެންވަރު ރަގަޅުކުރުމަށް ކުރެވެމުންދާ ބައެއް މަސައްކަތްތަކަށް ވެސް އަލިއަޅުވާލެއްވެވިއެވެ. އެގޮތުން ފުލުހުންގެ ހުނަރު ތަރައްޤީ ކުރުމަށް ފުލުހުންނަށް ބޭނުންވާ ތަމްރީނުތައް، ރާއްޖެއާއި ރާއްޖޭން ބޭރުން ލިބެމުންދާ ކަމަށާއި، ފުލުހުންގެ މަރުކަޒުތައް ރާއްޖޭގެ ރަށްރަށުގައި ޤާއިމްކުރުމުގެ މަސައްކަތް މިހާރު ފަށާފައިވާކަމަށް ސީޕީ ވިދާޅުވިއެވެ.
ފުލުހުންގެ 38 ވަނަ އަސާސީ ތަމްރީނު ޕްރޮގްރާމްގައި މި އަހަރު 127 އޮފިސަރަކު ވަނީ ސަނަދު ޙާސިލުކޮށްފައެވެ. އޭގެތެރޭގައި ހިމެނެނީ 37 އަންހެން އޮފިސަރުންނާއި 90 ފިރިހެން އޮފިސަރުންނެވެ. މި ރަސްމިއްޔާތުގައި އެކި ސްކޮޑްތަކުން ވަނަވަނައަށް ދިޔަ އޮފިސަރުންނަށް އިނާމު ވެސް ވަނީ ދެއްވާފައެވެ.
މި ތަމްރީން ޕްރޮގްރާމަކީ ފުލުހުންގެ ޚިދުމަތުން ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ދިނުމުގައި ބޭނުންވާ ހުނަރުތަކާއި ޢިލްމާއި ސުލޫކު ދަސްކޮށް ދިނުމަށް އިންތިޒާމުކޮށް ކުރިއަށްގެންދާ ޕްރޮގްރާމެކެވެ.