އޮސްޓްރޭލިއަން އޯޕަން: ސަބަލެންކާ ބަލިކޮށް ކީސް އޭނާގެ ފުރަތަމަ ގްރޭންޑް ސްލޭމް ކާމިޔާބުކޮށްފި

މިހާރު މެލްބަންގައި ކުރިޔަށްދާ އޮސްޓްރޭލިއަން އޯޕަންގެ އަންހެނުންގެ ފައިނަލުގައި ދުނިޔޭގެ އެއްވަނައަށް ސީޑްކޮށްފައިވާ، އެރީނާ ސަބަލެންކާ ބަލިކުރުމަށްފަހު، 19ވަނައަށް ސީޑްކޮށްފައިވާ މެޑިސަން ކީސް އޭނާގެ ފުރަތަމަ ގްރޭންޑް ސްލޭމް ކާމިޔާބުކޮށްފިއެވެ.

މި މުބާރާތް ފާއިތުވި ދެ އަހަރު ކާމިޔާބުކޮށްފައިވާ ބެލަރޫސްގެ ސަބަލެންކާ ފައިނަލުން ބަލިވީ 2-1 ސެޓުންނެވެ. 

ކެރިއަރުގެ ފުރަތަމަ ފައިނަލަށް 7 އަހަރަށް ވުރެން ގިނަ ދުވަސްވީފަހުން، ކެރިއަރުގެ ދެވަނަ ގްރޭންޑް ސްލޭމް ފައިނަލަށް ނިކުތް ކީސް މި މެޗު ކާމިޔާބުކުރީ، ފުރަތަމަ ސެޓު 3-6 ގޭމުން ކާމިޔާބުކޮށްފައި ވަނިކޮށް، ސަބަލެންކާ ދެވަނަ ސެޓު 6-2 އިން ގެންދިޔަ ނަމަވެސް، ފަހު ސެޓު 5-7 އިން ކާމިޔާބުކޮށްގެންނެވެ.

މި ކާމިޔާބާއެކު، ކީސްއަކީ ކެރިއަރުގެ ފަހުކޮޅާއި ގާތްވެފައި ވަނިކޮށް ފުރަތަމަ ގްރޭންޑް ސްލޭމް ކާމިޔާބުކުރި އަންހެނުންގެ ތެރެއިން އެކަކެވެ. ކީސްގެ އުމުރުން މިހާރު 29 އަހަރުވެފައިވާއިރު، މިއަށް ވުރެން އުމުރު މަތިކޮށް ފުރަތަމަ ގްރޭންޑް ސްލޭމް ކާމިޔާބު ކުރެވިފައިވަނީ މީގެ ކުރިން ތިން އަންހެނަކަށެވެ.

އުމުރުން 25 އަހަރުގެ ސަބަލެންކާ މި މެޗަށް ނިކުތީ، ޖެހިޖެހިގެން އޮސްޓްރޭލިއަން އޯޕަން ތިން ފަހަރަށް ކާމިޔާބުކޮށްފައިވާ މަދު ކުޅުންތެރިންގެ ރަން ޞަފްޙާއިން ޖާގައެއް ހޯދުމުގެ އުއްމީދުގައެވެ. ނަމަވެސް، މެޗަށްފަހު ވާހަކަ ދައްކަމުން ސަބަލެންކާ ބުނީ، އޭނާއަށް މި މެޗު ކާމިޔާބުކުރެވޭ ވަރަށްވުރެން ކީސް މޮޅަށް ކުޅުނު ކަމަށެވެ.  

މި މެޗަށް ސަބަލެންކާ ކުރަމުން ދިޔަ އުއްމީދު، މެޗު ބެލުމަށްޓަކައި ރޮޑް ލެވަރ އެރީނާއާށް ހާޒިރުވެތިބި 15،000 ކުޅިބެލުންތެރިންނަށް ފެނިފައިވެއެވެ. އެގޮތުން، ކީސް މެޗު ކާމިޔާބުކުރުމުން އޭނާއަށް މަރުހަބާ ކިޔާ ކޯޓުން ފޭބުމަށްފަހު ސަބަލެންކާ ވަނީ އޭނާގެ ރެކެޓު ބިމަށް ޖަހާ ފުނޑުފުނޑުކޮށްލުމަށްފަހު، މޫނުމަތީގައި ތުވާލި އަޅައިގެން ގިނަ ވަގުތު ރޯން އިނދެފައެވެ. 

ފައިނަލް މެޗުގެ ކުރިން، 2023 ވަނަ އަހަރުގެ އޮސްޓްރޭލިއަން އޯޕަންއަށްފަހު މި މުބާރާތުގައި ސަބަލެންކާއަށް ގެއްލިފައިވަނީ އެންމެ ސެޓެކެވެ. އެއީ މި ފަހަރުގެ ކުއާޓާފައިނަލް މެޗުގައެވެ. 

މި މުބާރާތް ކާމިޔާބު ކުރުމުން ކީސްއަށް ފައިސާގެ އިނާމުގެ ގޮތުގައި 3.5 މިލިއަން އެމެރިކާ ޑޮލަރު ލިބޭނެއެވެ. އަދި ސަބަލެންކާއަށް ލިބޭނީ 1.9 މިލިއަން އެމެރިކާ ޑޮލަރުގެ ފައިސާގެ އިނާމެކެވެ.