ބްރޯޑްކާސްޓިންގ ޚިދުމަތަކީ ޤައުމީ ބަދަހިކަމުގެ އަގުހުރި ޚާދިމެއް: މެޑަމް ސާޖިދާ

ރާއްޖޭގެ ބްރޯޑްކާސްޓިންގ ޚިދުމަތަކީ ޤައުމީ ބަދަހިކަމުގެ އަގުހުރި ޚާދިމެއްކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.  ނޭޝަނަލް އާޓް ގެލެރީގައި ބޭއްވުނު "ވިޝަންސް އޮފް ދަ ފިއުޗަރ" ކުރެހުމުގެ މުބާރާތުގެ އިނާމު ދިނުމުގެ ރަސްމިއްޔާތުގައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ، ބްރޯޑްކާސްޓިންގ ޚިދުމަތަކީ ދުރުދުރުގައި މާކަނޑެއްގެ އުސްރާޅުތަކުގެ ނިވަލުގައި އެތުރިފައިވާ ރަށްތައް ގުޅުވައިލަދިން ވަސީލަތެއް ކަމަށެވެ.

ރައީސުލްޖުމްހޫރިއްޔާގެ އަނބިކަނބަލުން، "ވިޝަންސް އޮފް ދަ ފިއުޗަރ" އެވޯޑް ދިނުމުގެ ރަސްމިއްޔާތުގައި ބައިވެރިވެވަޑައިގެންނެވުން

ބްރޯޑްކާސްޓިންގ ދާއިރާގެ މުހިންމުކަމާއި ޚިދުމަތްތެރިކަމުގެ މައްޗަށް އަލިއަޅުވާލައްވަމުން މެޑަމް ސާޖިދާ ވިދާޅުވީ، މި ދާއިރާގެ މުހިންމުކަން ދަރިވަރުންނަށް އުނގަންނައިދީ، އެ ދާއިރާއާ މެދު ޝައުޤުވެރިކަން އުފެއްދުމަކީ ކޮންމެހެން ކުރަންޖެހޭ ކަމެއް ކަމަށެވެ. އަދި ބްރޯޑްކާސްޓިންގ ކޮމިޝަނުން އިންތިޒާމުކޮށްގެން ބޭއްވި މި ކުރެހުމުގެ މުބާރާތް ފަދަ ހަރަކާތްތައް މެދުވެރިކޮށް، ދަރިވަރުންގެ ކެރިއަރ ބިނާކުރުމުގައި އެހީތެރިވެވިދާނެކަން އެކަމަނާ ފާހަގަކުރެއްވިއެވެ.

ރައީސުލްޖުމްހޫރިއްޔާގެ އަނބިކަނބަލުން، "ވިޝަންސް އޮފް ދަ ފިއުޗަރ" އެވޯޑް ދިނުމުގެ ރަސްމިއްޔާތުގައި ބައިވެރިވެވަޑައިގެންނެވުން

މީގެ އިތުރުން، ޤައުމެއްގެ ނިސްބަތުގައި ޓީވީ އާއި ރޭޑިއޯ އަދާކުރާ ދައުރު، ފަހުގެ ޖީލުތަކަށް އެނގުމުގެ މުހިންމުކަންވެސް މެޑަމް ސާޖިދާ ފާހަގަކުރެއްވިއެވެ. އެކަމަނާ ވަނީ މިއަދުގެ ރަސްމިއްޔާތުގެ އެންމެ ޝަރަފުވެރި އިނާމުތައް ހަވާލުކޮށްދެއްވައި، އިނާމު ލިބުނު ފަރާތްތަކާއެކު ޚާއްޞަ ފޮޓޯއެއް ނަންގަވާފައެވެ. އަދި "ވިޝަންސް އޮފް ދަ ފިއުޗަރ" ގެ ކުރެހުންތައް ބައްލަވާލައްވާފައިވެއެވެ.

މި ރަސްމިއްޔާތަކީ ބްރޯޑްކާސްޓިންގ ދާއިރާއަށް ޒުވާނުން ޝައުޤުވެރިކުރުވުމަށާއި، އެ ދާއިރާގެ މުހިންމުކަން ހާމަކޮށްދިނުމަށް ބްރޯޑްކާސްޓިންގ ކޮމިޝަނުން ކުރަމުންދާ މަސައްކަތުގެ ތެރެއިން ބޭއްވުނު ހަރަކާތެކެވެ.