ކާބޯތަކެތީގެ ކުނި މެނޭޖްކުރާގޮތުގެ މަޢުލޫމާތު އެފްއެންބީޝޯގައި އާންމުންނަށްދީފި

މާލެ ސަރަޙައްދުގެ ތިމާވެށި ރައްކާތެރިކުރުމާއި ކުނި މެނޭޖްކުރުމުގެ މަޝްރޫޢު އެފް އެންޑް ބީ ޝޯގައި ބައިވެރިވެއްޖެއެވެ. މި މަޝްރޫޢަކީ މޫސުމަށް އަންނަ ބަދަލުތަކާއި، ތިމާވެށި އަދި ހަކަތައާބެހޭ މިނިސްޓްރީގެ ދަށުން ހިންގާ މަޝްރޫޢެކެވެ.

މި މަޝްރޫޢުގެ ފަރާތުން މި ޝޯގައި ބައިވެރިވެފައިވަނީ ކާބޯތަކެތީގެ އުކާލެވޭ ބައިތައް މެނޭޖްކުރުމާ ގުޅޭގޮތުން ހޭލުންތެރިކަން އިތުރުކުރުމަށާއި، މިކަމާ ގުޅޭގޮތުން މިނިސްޓްރީން ކުރަމުންދާ މަސައްކަތްތަކާ ބެހޭ މަޢުލޫމާތު ޢާންމުންނާ ހިއްސާކުރުމުގެ މަޤްޞަދުގައެވެ.

ޝޯގައި ފާހަގަކޮށްލެވުނު އެއް ކަމަކީ "ކާބޯތަކެތީގެ ރައްކާތެރިކަމާއި ކުނި މެނޭޖްކުރުން" މި ނަމުގައި ބޭއްވުނު ޕެނަލް ޑިސްކަޝަންގައި މިނިސްޓްރީގެ ޑެޕިއުޓީ މިނިސްޓަރ އަޙްމަދު ނިޒާމް ބައިވެރިވެވަޑައިގަތުމެވެ.

މީގެ އިތުރުން، މަޝްރޫޢުގެ ފަރާތުން ވަނީ ޝޯގައި ބައިވެރިވާ ފަރާތްތަކަށާއި ޢާންމު ރައްޔިތުންނަށް މަޝްރޫޢާ ބެހޭ އިތުރު މަޢުލޫމާތު ހޯދުމަށް ދަޢުވަތު ދެއްވާފައެވެ. މިގޮތުން މަޝްރޫޢުގެ ސްޓޯލަށް ޒިޔާރަތްކޮށް މަޢުލޫމާތު ސާފުކުރެއްވުމަށް އެދިވަޑައިގެންފައިވެއެވެ.

މި ޝޯގައި މާލެ ސަރަޙައްދުގެ ތިމާވެށި ރައްކާތެރިކުރުމާއި ކުނި މެނޭޖްކުރުމުގެ މަޝްރޫޢުގެ ބައިވެރިވުމަކީ ދެމެހެއްޓެނިވި ގޮތެއްގައި ކުނި މެނޭޖްކުރުމުގެ މުހިންމުކަން ފާހަގަކޮށް، މިކަމާ ގުޅޭގޮތުން ޢާންމުންގެ ހޭލުންތެރިކަން އިތުރުކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.