ޢިމާރާތްކުރުމުގެ ދާއިރާގެ ވަޒީފާގެ ފުރުޞަތުތަކާ ގުޅޭ މަޢުލޫމާތު ދިނުމަށް ވިލާ ކޮލެޖުގައި ސެޝަނެއް ބާއްވައިފި

ޢިމާރާތްކުރުމުގެ ދާއިރާގައި ހުރި ވަޒީފާގެ ފުރުޞަތުތަކާ ގުޅޭ މަޢުލޫމާތު ދިނުމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން އިއްޔެ ވިލާ ކޮލެޖުގައި ޚާއްޞަ ސެޝަނެއް ބާއްވައިފިއެވެ.

މި ސެޝަން ފައްޓަވައިދެއްވީ މިނިސްޓަރ އޮފް ސްޓޭޓް އިބްރާހީމް ނަޒީމްގެ އަގުހުރި ބަސްކޮޅަކުންނެވެ. މިނިސްޓްރީގެ ޓެކްނިކަލް ޓީމުން ކުރިއަށް ގެންދިޔަ މި ސެޝަންގައި އާކިޓެކްޓް އަޙްމަދު ޖިނާން އަދި އިންޖިނިއަރ ފާޠިމަތު ސައިނާ ބައިވެރިވެ ވަޑައިގެންނެވިއެވެ.

މިނިސްޓްރީން މަޢުލޫމާތު ދެއްވިގޮތުގައި މިއީ ޢިމާރާތްކުރުމުގެ ދާއިރާގައި ހުރި ގިނަގުނަ ފުރުޞަތުތަކާ ބެހޭ މުހިންމު މަޢުލޫމާތު ދަރިވަރުންނާ ހިއްސާކުރުމަށް ބޭއްވޭ ސިލްސިލާ ސެޝަންތަކުގެ ތެރެއިން ފުރަތަމަ ސެޝަނެވެ. މި ސެޝަންތަކުގެ މައިގަނޑު މަޤްޞަދަކީ ޢިމާރާތްކުރުމުގެ ދާއިރާއިން ކިޔަވާ ދަރިވަރުންނަށް މި ދާއިރާގައި ހުރި ވަޒީފާގެ ފުރުޞަތުތަކާއި ކެރިއަރ ޕާތްތަކާ ބެހޭ މަޢުލޫމާތު ފޯރުކޮށްދިނުމެވެ.

މިފަދަ ސެޝަންތަކުން ދަރިވަރުންނަށް މުސްތަޤްބަލުގައި އިޚްތިޔާރުކުރާނެ މަސައްކަތުގެ ދާއިރާ ކަނޑައެޅުމަށް އެހީތެރިވެދޭނެކަމަށް މިނިސްޓްރީން ފާހަގަކުރެއްވިއެވެ. އަދި ކުރިއަށް އޮތް ތަނުގައި މިފަދަ އިތުރު ސެޝަންތައް ބޭއްވުމަށް ރާވާފައިވާކަމަށްވެސް މިނިސްޓްރީން މަޢުލޫމާތު ދެއްވިއެވެ.