ޗެލްސީ ބަލިކުރުމަށްފަހު މެންޗެސްޓަރ ސިޓީ ގަދަ ހަތަރަކަށް ޖެހިލައިފި

އިންގްލިޝް ޕްރިމިއަރ ލީގުގައި 3-1 އިން ޗެލްސީ ބަލިކުރުމަށްފަހު ޗެމްޕިއަން މެންޗެސްޓަރ ސިޓީއިން ލީގުގެ ގަދަ ހަތަރަކަށް ކުރިޔަށް ޖެހިލައިފިއެވެ.

މެޗުގައި ފުރަތަމަ ލިޑު ނެގީ ޗެލްސީއިންނެވެ. މިއީ ސިޓީގެ ޑިފެންސް ލައިނަށް ހެދުނު ގޯހަކުން ޗެލްސީއިން ކާމިޔާބުކުރި ގޯލެކެވެ. ޖެނުއަރީ ޓްރާންސްފާރގައި 33.6 މިލިއަން ޕައުންޑަށް ސިޓީއަށް ބަދަލުވުމަށްފަހު އެ ޓީމުގެ ޖާޒީގައި ފުރަތަމަ ފަހަރަށް ކުޅެމުންދިޔަ އުޒްބެކިސްތާނުގެ ޑިފެންޑަރު، އަބްދުލްކޯދިރު ޚުސަނޯވް ބޮލުން ފަހަތަށް ކުޅެލަން އުޅުނު ބޯޅައިގައި އޭނާއަށް ރަގަޅަށް ޖައްސާ ނުލެވުނުއިރު، އެ ބޯޅަ ހޯދީ ޗެލްސީގެ ނިކޮލަސް ޖެކްސަންއެވެ. އެއަށްފަހު ގޯލު ކުރިމައްޗަށް ދުވަމުން ދިޔަ މަޑުއެކެއަށް ޕާސްކޮށްލުމުން ހުސް ގޯލުގެ ތެރެއަށް އެ ބޯޅަ ފޮނުވާލައި ޗެލްސީއިން ލީޑު ނެގީ ތިންވަނަ މިނެޓުގައެވެ. 

އެއަށްފަހު މެޗުގެ ނަތީޖާ ހަމަހަމަކުރުމަށް ސިޓީއިން ގިނަ ހަމަލާތަކެއް އުފައްދާފައިވެއެވެ. އެގޮތުން ފޮޑެން ފޮނުވާލި ބާރުހަމަލާ ގޯލުގެ ދަނޑިއަށް އަމާޒުވިއިރު، ޖެނުއަރީ ޓްރާންފާރގައި ސިޓީއާ ގުޅުނު ދެވަނަ ކުޅުންތެރިޔާ، އިޖިޕްޓުގެ އުމަރު މަރުމޯޝް ޖެހި ގޯލު އޮފްސައިޑުކަމަށް ރެފްރީ ވަނީ ނިންމާފައެވެ. 

ނަމަވެސް ސިޓީއިން ފުރަތަމަ ހާފު ނިމުމުގެ ކުރިން ގޯލެއް ކާމިޔާބުކޮށް މެޗުގެ ނަތީޖާ ހަމަހަމަކުރިއެވެ. ސިޓީގެ ކަނާތް ފަރާތުން ފަހަތަށް ކުޅޭ މެތިއުޒް ނުނޭޒް ގޯލަށް ފޮނުވާލި ބޯޅަ ކީޕަރު ދިފާއުކުރުމުން ރީބައުންސަށް ނިކުތް ބޯޅަ ހޯދުމަށްފަހު ގޯލަށް ފޮނުވާލީ، އެ ޓީމުގެ ވާތްފަރާތުން ފަހަތަށް ކުޅޭ ޖެސްކޯ ގާޑިއޯލްއެވެ. 

މި މެޗުގައި ސިޓީއަށް ލިބުނު އެންމެ ބޮޑު އެޑްވާންޓޭޖަކަށްވީ، މެޗުގެ 68 ވަނަ މިނެޓުގައި ޗެލްސީގެ ގޯލްކީޕަރު ރޮބާޓް ސަންޗޭޒްއަށް ހެދުނު ގޯހަކުން އާރލިން ހާލަންޑު ކާމިޔާބުކުރި ރީތި ގޯލެވެ. ސިޓީގެ ގޯލްކީޕަރ އެޑަސަން ކުރިޔަށް ކުޅުނު ބޯޅައަށް، ގޯލް ދޫކޮށްލާފައި ބޯޅަ ހޯދުމަށް ނިކުތް ސަންޗޭޒްއަށް ބޯޅަ ލިބުމުގެ ކުރިން، އޭނާގެ ބޯމަތިން ހާލަންޑު ވަނީ އެ ބޯޅަ ގޯލަށް ފޮނުވާލާ، ސިޓީއަށް ލީޑު ނަގާދީފައެވެ.

މި މެޗުގައި ސިޓީގެ ތިންވަނަ ގޯލު ކާމިޔާބުކޮށްދިނީ ފޮޑެންއެވެ.

މި ނަތީޖާއާއެކު 23 މެޗުން ލިބުނު 41 ޕޮއިންޓާއެކު ސިޓީ އޮތީ ހަތަރު ވަނައިގައެވެ. އަދި ފަސްވަނައިގައި އޮތް ނިއުކާސްލް ޔުނައިޓެޑަށް ވެސް 41 ޕޮއިންޓު ލިބިފައިވެއެވެ.