ޚަބަރު
ރައީސް މުޢިއްޒުގެ ތަރައްޤީގެ ވިސްނުމުގައި ފުލުހުންގެ ދައުރު މުހިންމު: ދިފާޢީ ވަޒީރު

ދިފާޢީ ވަޒީރު މުޙައްމަދު ޣައްސާން މައުމޫން
ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖެއަށް ގެންނަވަން ބޭނުންފުޅުވާ ތަރައްގީގައި ފުލުހުންގެ ފުޅާ ދައުރެއް އޮތް ކަމަށެވެ. މިގޮތަށް ވަޒީރު ވިދާޅުވީ ފުލުހުންގެ 38 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

ދިފާޢީ ވަޒީރު މުޙައްމަދު ޣައްސާން މައުމޫން
ވަޒީރު ޣައްސާން ވިދާޅުވި ގޮތުގައި ރައީސް މުޢިއްޒު ވެރިކަމުގެ ހުވާކުރެއްވީ ރައްޔިތުން ހަވާލުކުރެއްވި މުހިންމު ޒިންމާތަކެއް އުފުއްލަވައިގެން ރައްޔިތުންނާއި މުޖުތަމަޢު ރައްކާތެރިކުރައްވަން ކަމަށެވެ. އަދި މިނިވަންކަމާއި އިސްތިގުލާލު ދަމަހައްޓަވައި، އިގްތިސާދީގޮތުން ފުދުންތެރި ޤައުމަކަށް ހެއްދެވުމުގެ މަސައްކަތް ޒިންމާދާރުކަމާއެކު ރައީސް ކުރައްވަމުން ގެންދަވާ ކަމަށްވެސް ވަޒީރު ފާހަގަކުރެއްވިއެވެ.
ބައިނަލްއަގުވާމީ މުޖުތަމަޢުގައި އިގްތިސާދީގޮތުން ފުދުންތެރި އަދި ތަރައްގީވެފައިވާ ޤައުމުތަކުގައި ހުންނަ މުހިންމު ސިފަތަކުގެ ތެރޭގައި މިނިވަންކަމާއި މުސްތަގިއްލުކަމާއި އަމަންއަމާންކަން އަދި އަދުލު އިންސާފު ގާއިމުވެފައި އޮތުމާއެކު ވަކިވަކިފަރުދުންނާއި މުދަލުގެ ރައްކާތެރިކަން ކަށަވަރުވެފައި އޮތުން ހިމެނޭ ކަމަށް ވަޒީރު ވިދާޅުވިއެވެ. ރާއްޖޭގައިވެސް މި ކަންކަން ކަށަވަރުކޮށްދިނުމުގައި ފުލުހުންގެ ދައުރު މުހިންމު ކަމަށް އެމަނިކުފާނު ފާހަގަކުރެއްވިއެވެ.
އިގްތިސާދީ ގޮތުން ފުދުންތެރިކަން ހޯދުންވިޔަސް އިޖުތިމާޢީ ފޭރާން ހަރުދަނާކުރައްވަން ވިޔަސް މިހުރިހާ މަސައްކަތްޕުޅެއްގެ ހަގީގި އެއް މޭސްތިރިންނަށްވާނީ އަބަދުވެސް ދިވެހި ފުލުހުން
ވަޒީރު ޣައްސާން
ކޯހުގެ ދަސްވެނިންނާ މުޚާތަބުކުރައްވައި ވަޒީރު ޣައްސާން ވިދާޅުވީ އެ ދަސްވެނިންގެ ޒިންމާ ވަރަށް ބޮޑު ކަމަށާއި އެ ޒިންމާ އޮތީ ޤައުމާއި ރައްޔިތުންނާއި ޤާނޫނުއަސާސީއަށް ކަމަށެވެ. އަދި ދިވެހި ރައްޔިތުންނަށް ޚިދުމަތް ކުރުމުގައި ދެމިތިބުމަށާއި ޤައުމަށް ވަފާތެރިވުމަށާއި ނަފްސަށްވުރެ ޤައުމު އިސްކުރެއްވުމަށް ވަޒީރު އިލްތިމާސްކުރެއްވިއެވެ.