އޭސީސީގެ ތަޙުޤީޤުތައް އަވަސްކުރުމަށް ޕީޖީ އަމުރުކުރައްވައިފި

 އެންޓި-ކޮރަޕްޝަން ކޮމިޝަނުން (އޭސީސީ) ހިންގާ ޖިނާއީ ތަޙުޤީޤުތައް އަވަސްކުރުމަށް ޕްރޮސެކިއުޓަރ ޖެނެރަލް އަލްއުސްތާޛު ޢައްބާސް ޝަރީފު އަމުރުކުރައްވައިފިއެވެ. މި އަމުރު ނެރުއްވީ އޭސީސީގެ ތަޙުޤީޤުތައް އެކަށީގެންވާ އަވަސްމިނެއްގައި ހިނގަމުން ނުދާކަމުގެ ޝަކުވާ ޕްރޮސެކިއުޓަރ ޖެނެރަލްގެ ސަމާލުކަމަށް އައުމާ ގުޅިގެންނެވެ.

ޕްރޮސެކިއުޓަރ ޖެނެރަލްގެ އޮފީހުން ބުނެފައިވާ ގޮތުގައި، އޭސީސީގެ ތަޙުޤީޤުތައް ލަސްވުމުގެ ސަބަބުން ދިވެހި ދައުލަތާއި އާންމު ރައްޔިތުންގެ މަޞްލަޙަތު މަތީ މިންވަރަކަށް ހިމެނޭ މައްސަލަތަކުގެ ތަކުގެ ތަޙުޤީޤުތައް ލަސްވެ، ކޮރަޕްޝަނާއި ޚިޔާނާތުގެ މައްސަލަތަކުގައި ދައުލަތަށް ގެއްލޭ ފައިސާ އަނބުރާ ހޯދުމުގައާއި، އެފަދަ މައްސަލަތަކުގައި ދައުލަތާއި އާންމު ރައްޔިތުންގެ މަޞްލަޙަތުތަކަށް އުނިކަން އަންނަމުންދާކަން ފާހަގަކުރެވިފައިވެއެވެ.

މި ކަންކަމަށް ރިޢާޔަތްކޮށް، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 223 ވަނަ މާއްދާގެ (ދާގެ (ޅ) އާއި (ފ) ގެ ދަށުން ޕްރޮސެކިއުޓަރ ޖެނެރަލްއަށް ލިބިދޭ ބާރުގެ ދަށުން، އޭސީސީން ތަޙުޤީޤުކުރަމުންދާ ޖިނާއީ ހުރިހާ މައްސަލަތައް ޕްރޮސެކިއުޓަރ ޖެނެރަލްގެ އޮފީހަށް ހުށަހެޅުމުގައި ޢަމަލުކުރާނެ ގޮތުގެ އިރުޝާދެއް އެކުލަވާލައްވައި، އެ އިރުޝާދަށް މިއަދުން ފެށިގެން ޢަމަލުކުރެއްވުމަށް އޭސީސީގެ މައްޗަށް އަމުރުކުރައްވާފައިވެއެވެ.

ޕްރޮސެކިއުޓަރ ޖެނެރަލްގެ އަމުރުގައި، އެމްއެމްޕީއާރުސީ މައްސަލަ، ކޯވިޑް-19 އާ ގުޅިގެން ދައުލަތުގެ މުދަލާއި ފައިސާ ނަހަމަގޮތުގައި ބޭނުންކުރުމުގެ މައްސަލަ، އަދި ސަރުކާރު ހިއްސާވާ ކުންފުނިތަކާއި، ބިންވެރިޔާ އަދި ގެދޮރުވެރިޔާ ސްކީމާ ގުޅުންހުރި މައްސަލަތައް ފަދަ ދައުލަތުގެ މާލިއްޔަތާއި އާންމު ފަރުދުންގެ މަޞްލަޙަތާ ގުޅުންހުރި ޚިޔާނާތުގެ ބޮޑެތި މައްސަލަތަކުގެ ތަޙުޤީޤަށް ޚާއްޞަ ސަމާލުކަމެއްދީގެން އަވަހަށް ހިންގައި ޕްރޮސެކިއުޓަރ ޖެނެރަލްގެ އޮފީހަށް ހުށަހެޅުމަށް އިރުޝާދު ދެއްވާފައިވެއެވެ.