ޚަބަރު
ސާފުތާރިހުކަން ދަށް ތަނެއްގައި ވިޔަފާރިކުރަމުންދިޔަ 5 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފި

އިމިގްރޭޝަނުގެ އޮޕަރޭޝަނުގެ ތެރެއިން، ފޮޓޯ: އިމިގްރޭޝަން
ހުލާސާ
މިދިޔަ ބުރާސްފަތި ދުވަހު ހިންގި އޮޕަރޭޝަނުގައި އިމިގްރޭޝަނުގެ ބެލުމުގެ ދަށަށް 13 ބިދޭސީއަކު ގެންގޮސްފައިވޭ.
ސާފުތާރިހުކަން ދަށް ތަނެއްގައި ވިޔަފާރިކުރަމުންދިޔަ ފަސް ބިދޭސީއަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
ޤަވާއިދާ ޚިލާފަށް އުޅޭ ބިދޭސީން މަދުކުރުމުގެ މަސަކަތަށް އެކުލަވާލާފައިވާ ޓާސްކުފޯހުން އިއްޔެ އާއި މިއަދު ބަލާ ފާސްކޮށްފައި ވަނީ މާލޭގައި ބިދޭސީން ދިރިއުޅެމުންދާ ތަންތަނާއި ވިޔަފާރި ކުރަމުންދާ ތަންތަނެވެ.
އެގޮތުން މި އޮޕްރޭޝަންގައި ބަލާފާސްކޮށްފައިވާ ތަންތަނުގެ ތެރެއިން ބިދޭސީން ގެނައި ތަނަކީ، އާންމު ސިއްހަތަށް ނުރައްކާވާފަދަ ގޮތަކަށް ކާބޯތަކެތި ތައްޔާރުކުރަމުން ދިޔަ ތަނެއްކަމަށް ވެސް އިމިގްރޭޝަނުން ހާމަކޮށްފައިވެއެވެ.
ޓާސްކު ފޯހުން ވަނީ އިއްޔެ އާއި މިއަދު މާލޭގައި ބިދޭސީން ދިރިއުޅެ، ވިޔަފާރި ކުރަމުންދިއަ ތަނެއް ބަލައި ފާސްކޮށްފައި. މިތަނަކީ ވެސް އާންމު ސިއްހަތަށް ނުރައްކާވާ ގޮތަށް، ސާފުތާހިރުކަމެއް ނެތި ބިދޭސީން އުޅެމުންދިއަ ތަނެއް. އަދި މިތަނުގައި ގަވާއިދާ ހިލާފަށް އުޅެމުންދިއަ 05 ބިދޭސީއަކު… pic.twitter.com/3GuKk3oxQ8
— Maldives Immigration (@ImmigrationMV) January 26, 2025
މީގެ އިތުރުން މި ބިދޭސީން ރާއްޖޭގައި އުޅެމުން ދިޔައީ އިމިގްރޭޝަންގެ ޤަވާއިދާއި ޚިލާފަށްކަމަށް ވެސް އެ އިދާރާއިން ހާމަކޮށްފައިވެއެވެ.
މިދިޔަ ބުރާސްފަތި ދުވަހު ހިންގި މިފަދަ އޮޕަރޭޝަނުގައި އިމިގްރޭޝަނުގެ ބެލުމުގެ ދަށަށް 13 ބިދޭސީއަކު ގެންގޮސްފައިވެއެވެ.
އެ އޮޕަރޭޝަނާ ގުޅޭ ވިޑިއޯ އިން ފެންނަ ގޮތުގައި، އެ ތަނުގައި ކާބޯތަކެތި ތައްޔާރުކުރަމުން ދިޔައީ ސާފުތާހިރުކަމަށް އެއްވެސް ވަރަކަށް ބެލުމެއް ނެތިއެވެ. ކާނޯތަކެތި ބަހައްޓާފައި ހުރި ބައެއް ތެލިފަދަތަކެތި ބިންމަތީގައި ވެސް ހުއްޓެވެ.
މިދިޔަ އަހަރު ރާއްޖޭގައި ޤަވާއިދާ ޚިލާފަށް އުޅުނު 5،000 ބިދޭސީން ރާއްޖެއިން ފޮނުވާލާފައިވާއިރު، މި އަހަރުގެ އަމާޒަކީ މި އަދަދު ދެގުނަކުރުންކަމަށް، ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ކުރިން ހާމަކޮށްފައިވެއެވެ.